Mon, Nov 16, 2026Updated 02:17 PM IST
Google Preferred Source CTA

ભાસ્કર એક્સપ્લેનર
ટ્રમ્પે જેને જેહાદી કહ્યા, તે સાંસદ બની ગયા:અમેરિકી સેનેટમાં પહેલી વાર કોઈ મુસ્લિમ કેવી રીતે પહોંચ્યો, અબ્દુલ અલ-સૈયદની કહાની

11 દિવસ પેહલા
  • કૉપી લિંક

‘જો તમે બ્લેક કે યહૂદી છો અને અબ્દુલને વોટ આપો છો, તો તમે પાગલ છો. તે એક જેહાદી છે. તે ખતરનાક અને હિંસક જેહાદી છે.’

.

આ શબ્દો અમેરિકી રાષ્ટ્રપતિ ડોનાલ્ડ ટ્રમ્પના છે, જે તેમણે અબ્દુલ અલ-સૈયદ માટે કહ્યા હતા. મિડટર્મ ચૂંટણી પરિણામોમાં 52% કરતાં વધુ મતો સાથે ડેમોક્રેટિક પાર્ટીના અબ્દુલ અમેરિકાના પ્રથમ મુસ્લિમ સેનેટર બની ગયા છે.

ઇજિપ્તથી આવેલા સ્થળાંતરિતોના પુત્ર છે સૈયદ

42 વર્ષના અબ્દુલ વ્યવસાયે તબીબ અને મહામારી વિજ્ઞાની (એપિડેમિયોલોજિસ્ટ) છે. 1970ના દાયકામાં તેમના માતા-પિતા ઇજિપ્તથી અમેરિકા આવ્યા હતા. સાઉથ મિશિગનના ડેટ્રોઇટ શહેરમાં 31 ઓક્ટોબર 1984ના રોજ સૈયદનો જન્મ થયો હતો. 3 વર્ષના થયા, ત્યારે માતા-પિતાના છૂટાછેડા થઈ ગયા. તેમનો ઉછેર પિતા અને સાવકી માતાએ કર્યો.

પોતાના પરિવાર સાથે અબ્દુલ અલ-સૈયદ (જમણેથી ત્રીજા). અબ્દુલના માતા-પિતાના છૂટાછેડા પછી તેમના માતા અમેરિકાના મિઝોરી રાજ્ય જતા રહ્યા હતા.
પોતાના પરિવાર સાથે અબ્દુલ અલ-સૈયદ (જમણેથી ત્રીજા). અબ્દુલના માતા-પિતાના છૂટાછેડા પછી તેમના માતા અમેરિકાના મિઝોરી રાજ્ય જતા રહ્યા હતા.

અબ્દુલે મિશિગન યુનિવર્સિટી અને કોલંબિયા યુનિવર્સિટીમાંથી મેડિકલ સાયન્સનો અભ્યાસ કર્યો. તેઓ એપિડેમિયોલોજીના આસિસ્ટન્ટ પ્રોફેસર પણ રહ્યા. ત્યારબાદ તેઓ જાહેર સેવામાં આવી ગયા.

અબ્દુલ સૈયદનો પ્લાન રાજકારણમાં આવવાનો નહોતો. તેમની ચૂંટણી વેબસાઇટ અનુસાર તેઓ ચૂંટણી એટલા માટે લડી રહ્યા છે કારણ કે, ‘ખરાબ રાજકારણ અમેરિકી લોકોને બીમાર કરી રહ્યું છે. અમેરિકામાં જીવન આટલું મુશ્કેલ ન હોવું જોઈએ.’

2015માં અબ્દુલ 30 વર્ષની વયે ‘ડેટ્રોઇટ હેલ્થ ડિપાર્ટમેન્ટ’ના એક્ઝિક્યુટિવ ડિરેક્ટર બન્યા. 2018માં મિશિગનના ગવર્નર બનવાની રેસમાં પણ તેઓ હતા, પરંતુ ડેમોક્રેટિક પાર્ટીના ઉમેદવારથી જીતી શક્યા નહોતા.

જિહાદ, આતંકવાદ અને મુસ્લિમ બ્રધરહુડને સમર્થનના આક્ષેપો લાગ્યા

પ્રચાર દરમિયાન ટ્રમ્પે સૈયદને જેહાદી અને આતંકવાદીઓનું સમર્થન કરનારા ગણાવ્યા. ટેક્સાસના રિપબ્લિકન સેનેટર ટેડ ક્રૂઝે તો ચેતવણી આપી કે જો અબ્દુલ સૈયદ સેનેટની ઇન્ટેલિજન્સ કમિટીમાં જાય છે, તો અમેરિકા ખતમ થઈ શકે છે. વિપક્ષી ઉમેદવાર માઇક રોજેર્સે સવાલો ઉઠાવ્યા કે સૈયદ અમેરિકાના પક્ષમાં છે કે આતંકવાદી જૂથોના.

પૂર્વ રાષ્ટ્રપતિ બરાક ઓબામા સહિત ડેમોક્રેટિક પાર્ટીના તમામ મોટા નેતાઓએ સૈયદ માટે પ્રચાર કર્યો.
પૂર્વ રાષ્ટ્રપતિ બરાક ઓબામા સહિત ડેમોક્રેટિક પાર્ટીના તમામ મોટા નેતાઓએ સૈયદ માટે પ્રચાર કર્યો.

વાસ્તવમાં, સૈયદના બહેન ઇમાન અબ્દેલહાદીએ 2012માં એક સોશિયલ મીડિયા પોસ્ટ કરીને જણાવ્યું હતું કે તેમની માતા 70ના દાયકામાં ઇજિપ્તમાં મુસ્લિમ બ્રધરહુડ સાથે જોડાઈને સક્રિયતા (એક્ટિવિઝમ) ધરાવતી હતી.

છૂટાછેડા પછી પણ સૈયદના માતા મિઝોરી સ્ટેટ જતા રહ્યા હતા અને ઇસ્લામિક અમેરિકન રિલીફ એજન્સી (IARA) સાથે નર્સ તરીકે કામ કરવા લાગ્યા હતા. 2004માં FBIએ આતંકવાદીઓ સાથે સંબંધની શંકાના આધારે IARA પર દરોડો પાડ્યો, ત્યારે સૈયદના માતાની પણ પૂછપરછ થઈ હતી. રિપબ્લિકન પાર્ટીએ આ મુદ્દાને પણ ચૂંટણીમાં ઢસડ્યો.

સ્પષ્ટતામાં સૈયદે કહ્યું હતું કે તેમનો ઉછેર તેમની માતાએ નહીં પરંતુ પિતા અને સાવકી માતાએ કર્યો છે. તેમને મુસ્લિમ બ્રધરહુડ સાથે કોઈ લેવાદેવા નથી.

ઉપ રાષ્ટ્રપતિ જેડી વેન્સે 15 ઓક્ટોબરની રેલીમાં લોકોને કહ્યું, ‘તમે તે નાના ધૂર્ત વ્યક્તિથી વધુ સારાના હકદાર છો. તેણે પોતાનું મોં બંધ રાખવું જોઈએ અને તે દેશ પ્રત્યે થોડી કૃતજ્ઞતા દર્શાવવી જોઈએ જેણે તેને બધું જ આપ્યું છે.’

4 નવેમ્બરે પરિણામો આવ્યા, તો સૈયદે રિપબ્લિકન ઉમેદવાર માઇક રોજેર્સને હરાવી દીધા. વિક્ટ્રી સ્પીચમાં જેડી વેન્સને જવાબ આપતા કહ્યું, ‘જેડી હબીબી, રમુજી વિરોધાભાસ એ છે કે તમારે જ મને શપથ લેવડાવવા પડશે.’ વાસ્તવમાં, અમેરિકામાં સેનેટર્સને શપથ ઉપ રાષ્ટ્રપતિ લેવડાવે છે.

3 નવેમ્બરે મતદાન થયા બાદ જ 60% મતગણતરી પૂર્ણ થઈ ગઈ હતી. આ જ દિવસે સૈયદે પોતાની વિક્ટ્રી સ્પીચ આપી હતી. તેમની સાથે પત્ની ડૉ. સારા પણ હતાં.
3 નવેમ્બરે મતદાન થયા બાદ જ 60% મતગણતરી પૂર્ણ થઈ ગઈ હતી. આ જ દિવસે સૈયદે પોતાની વિક્ટ્રી સ્પીચ આપી હતી. તેમની સાથે પત્ની ડૉ. સારા પણ હતાં.

2 દિવસ પહેલાં પોતાની જ પાર્ટીના નેતા વિરોધમાં ગયા

અમેરિકી ચૂંટણીમાં ઉમેદવાર બનતા પહેલાં પાર્ટીના ઉમેદવારો વચ્ચે પણ ચૂંટણી થાય છે. ઓગસ્ટ 2026માં સૈયદ ચાર વારના સાંસદ હેલી સ્ટીવન્સને 15,000 મતોથી હરાવીને ડેમોક્રેટિક પાર્ટીના ઉમેદવાર બન્યા. હેલીએ સૈયદને હરાવવા માટે 4.2 કરોડ ડોલરથી વધુ ખર્ચ કર્યા હતા.

મિડટર્મ ચૂંટણી પ્રચારના અંતિમ રવિવારે હેલી સ્ટીવન્સ, રિપબ્લિકન ઉમેદવાર માઇક રોજેર્સ સાથે ચર્ચ પહોંચ્યા અને કહ્યું, ‘હું તે વ્યક્તિ સાથે આવી છું, જેને હું અમેરિકી સેનેટની ચૂંટણીમાં વોટ આપવાની છું.’ પ્રચારના અંતિમ દિવસોમાં હેલીના આ પગલાથી સૈયદને નુકસાન થવાની આશંકા વ્યક્ત કરવામાં આવી રહી હતી.

ચર્ચ બેઠક દરમિયાન રોજેર્સ અને હેલી. રોજેર્સ આ પહેલાં મિશિગનના 8મા મતવિસ્તારમાંથી હાઉસ ઓફ રિપ્રિઝન્ટેટિવના સભ્ય રહી ચૂક્યા છે.
ચર્ચ બેઠક દરમિયાન રોજેર્સ અને હેલી. રોજેર્સ આ પહેલાં મિશિગનના 8મા મતવિસ્તારમાંથી હાઉસ ઓફ રિપ્રિઝન્ટેટિવના સભ્ય રહી ચૂક્યા છે.

જીત બાદ સૈયદે દાવો કર્યો છે કે તેમને ચૂંટણીમાં હરાવવા માટે પોતાની પાર્ટીના લોકોએ જ 70 મિલિયન ડોલરથી વધુ ખર્ચ કર્યા છે.

અમેરિકામાં બે કારણોસર કોઈ મુસ્લિમ ઉમેદવાર જીતીને અત્યાર સુધી સેનેટ પહોંચી શક્યા નહોતા…

અમેરિકાની 35 કરોડથી વધુ વસ્તીમાં મુસ્લિમો 1.34% (આશરે 45 લાખ) કરતાં પણ ઓછા છે. દરેક રાજ્યમાંથી સેનેટની માત્ર 2 બેઠકો આવે છે. આટલી ઓછી વસ્તી સાથે રાજ્ય જીતવું સરળ નથી હોતું.

9/11ના આતંકી હુમલા બાદ અમેરિકામાં મુસ્લિમોને લઈને ડર, શંકા અને નકારાત્મકતાનો માહોલ બની ગયો હતો. મુસ્લિમ ઉમેદવારના નામ માત્રથી તેના પર વિદેશી, હિંસક કે જેહાદી હોવાનું ટેગ લગાવી દેવામાં આવે છે. સૈયદ સાથે પણ આવું કરવાનો પ્રયાસ થયો.

તો પછી સૈયદે જીતીને ઇતિહાસ કેવી રીતે રચ્યો?

તેના 3 મુખ્ય કારણો છે…

1. સામાન્ય જરૂરિયાતો અને ટેક્સના પૈસાને મુદ્દો બનાવ્યો

સૈયદે 3 મુખ્ય મુદ્દાઓ પર ચૂંટણી લડી- ઈઝરાયલને સૈન્ય મદદ આપવાનું બંધ થાય, અબજોપતિઓ પર ટેક્સ લગાવીને જાહેર આરોગ્ય સેવાઓ માટે ભંડોળ એકઠું કરવામાં આવે અને અમેરિકનોના ટેક્સનો યોગ્ય ઉપયોગ થાય.

સૈયદની ચૂંટણી વેબસાઇટ પર લખ્યું છે કે તેઓ એવી સરકાર બનાવવા માટે લડાઈ લડશે, જે અમેરિકી જનતા માટે કામ કરે. ઇલોન મસ્ક, ડોનાલ્ડ ટ્રમ્પ અને તેમના અબજોપતિ મિત્રો માટે નહીં.

ચૂંટણીના બે દિવસ પહેલાં તેમણે પત્રકાર પરિષદમાં કહ્યું, ‘આ એક કરોડ લોકોનું રાજ્ય છે જે પોતાની સરકાર પાસેથી વધુ સારા વ્યવહારના હકદાર છે. મારું ધ્યાન તે 9,999,998 લોકો પર છે, જેના વિશે તમે લોકો વાત નથી કરી રહ્યા.’

2. ધાર્મિક ટિપ્પણીઓનો વળતો જવાબ

સૈયદે ધર્મના મુદ્દાને ચૂંટણી પ્રચારથી અલગ રાખ્યો. પોતાના પર લાગેલા આક્ષેપો પર સ્પષ્ટતા આપી. ધાર્મિક સવાલો પર કહ્યું, ‘મારું નામ અને ધર્મ એ વાતનું કારણ નથી કે લોકો પેટ્રોલ કે કરિયાણાની વસ્તુઓ નથી ખરીદી શકતા, ડૉક્ટરને નથી બતાવી શકતા, કે હવા-પાણીને લઈને પરેશાન રહે છે.’

જ્યારે તેમના એન્ટી-ઈઝરાયલ સ્ટેન્ડના કારણે મિશિગનના યહૂદી મતદાતાઓ દૂર થઈ રહ્યા હતા, ત્યારે તેમણે યહૂદી ધર્મગુરુઓ સાથે બેઠકો કરી અને સંદેશ આપ્યો કે તેઓ ઈઝરાયલ સરકારનો વિરોધ કરી રહ્યા છે, યહૂદીઓનો નહીં.

3. ડેમોક્રેટિક પાર્ટીની લહેર

ટ્રમ્પની વિદેશ નીતિ અને લાવેલા કાયદાઓના કારણે ચૂંટણી પહેલાં જ તેમની અપ્રૂવલ રેટિંગ ઘટીને માત્ર 38% રહી ગઈ હતી. ઓપિનિયન પોલ્સ શરૂઆતથી જ ડેમોક્રેટિક પાર્ટીની સરસાઈ તરફ ઈશારો કરી રહ્યા હતા.

મિશિગનમાં 1994 પછી, કોઈ રિપબ્લિકન કેન્ડીડેટે સેનેટ બેઠક જીતી નથી. સૈયદને આ લહેરનો પણ ફાયદો મળ્યો.

ન્યૂઝ હજી બાકી છે

પૂરા ન્યૂઝ વાંચો દિવ્ય ભાસ્કર એપ પર. સાથે જ મેળવો ઝડપી અપડેટ અને બહેતર રીડિંગ એક્સપિરિયન્સ
  • પસંદના ન્યૂઝ
  • ન્યૂઝ સૌથી ફાસ્ટ
  • લાઇવ અપડેટ
પૂરા ન્યૂઝ વાંચો એપ પર
પ્રીમિયમ મેમ્બર છો, તો લોગિન કરો

ન્યૂઝ હજી બાકી છે

પૂરા ન્યૂઝ વાંચો દિવ્ય ભાસ્કર એપ પર. સાથે જ મેળવો ઝડપી અપડેટ અને બહેતર રીડિંગ એક્સપિરિયન્સ
Scan QR to download app
એપ ડાઉનલોડ કરવા માટે QR સ્કેન કરો
Download android app - Divya BhaskarDownload ios app - Divya Bhaskar
  • મનપસંદ એલર્ટ
  • ન્યૂઝ સૌથી ફાસ્ટ
  • લાઇવ અપડેટ
પ્રીમિયમ મેમ્બર છો, તો લોગિન કરો

Local News

Today Weather Update

Our Group Site Links