• Gujarati News
  • Utility
  • Patients Without Symptoms Do Not Need Hospitalization, Now There Will Be 7 Days Home Isolation, Not 14 Days

કોરોનાની નવી ગાઇડલાઇન્સ:લક્ષણો વગરના દર્દીઓને હોસ્પિટલની જરૂર નથી, હવે 14 દિવસ નહીં, 7 દિવસ હોમ આઇસોલેશન રહેશે

6 મહિનો પહેલા
  • કૉપી લિંક
  • અમેરિકા અને બ્રિટન પછી ભારત ત્રીજો મુખ્ય દેશ છે, જેને આઈસોલેશનના દિવસ ઓછા કરી દીધા છે

લક્ષણ વગરના અથવા હળવાં લક્ષણવાળા કોરોનાના દર્દીઓને હવે પોતાના ઘરે 14 દિવસની જગ્યાએ માત્ર 7 દિવસ આઈસોલેટ અથવા ક્વોરન્ટીન રહેવું પડશે. એટલું જ નહીં, કેન્દ્રીય સ્વાસ્થ્ય મંત્રાલયની તાજેતરની ગાઈડલાઈન્સમાં ઓક્સિજન સેચ્યુરેશનનું પ્રમાણમાં 94%થી બદલીને 93% કરી દેવામાં આવ્યું છે.

ગાઈડલાઈન્સ અનુસાર, આ 7 દિવસના આઇસોલેશનની શરૂઆત કોરોના ટેસ્ટ રિપોર્ટ પોઝિટિવ આવ્યાના દિવસથી ગણવામાં આવશે. આઈસોલેશન દરમિયાન જો દર્દીને સતત 3 દિવસ સુધી તાવ નથી આવતો તો તે આઠમા દિવસથી કોરોના નેગેટિવ માનવામાં આવશે. એના માટે કોરોનાની તપાસ પણ જરૂરી રહેશે નહીં.

અમેરિકા અને બ્રિટન પછી ભારત ત્રીજો મુખ્ય દેશ છે, જેણે આઈસોલેશનના દિવસ ઓછા કરી દીધા છે.

હકીકતમાં દેશમાં સતત ઓમિક્રોન વેરિયન્ટથી સંક્રમિતોની સંખ્યા વધી રહી છે. ગુરુવારે દરરોજ મળતા કોરોના દર્દીઓની સંખ્યાનો આંકડો એક લાખને પાર કરી ગયો. એક અંદાજ અનુસાર, એમાંથી લગભગ 60% દર્દી ઓમિક્રોન વેરિયન્ટના છે. ઓમિક્રોનના મોટા ભાગના દર્દીઓમાં ગંભીર લક્ષણો નથી, પરંતુ એ ડેલ્ટા વેરિયન્ટ કરતાં 30 ગણો ઝડપથી ફેલાય છે.

કોને એસિમ્પ્ટોમેટિક દર્દી કહેવામાં આવશે?
એસિમ્પ્ટોમેટિક દર્દી એવા લોકોને માનવામાં આવશે, જેમને રિપોર્ટ તો કોરોના પોઝિટિવ આવ્યો છે, પરંતુ તેમનામાં કોરોનાનાં કોઈ લક્ષણ નથી તેમજ રૂમની સામાન્ય હવામાં ઓક્સિજન સેચ્યુરેશન 93%થી વધારે હોવું જોઈએ. આ પહેલાં ઓક્સિજનનું પ્રમાણ 94% હતું.

હળવાં લક્ષણવાળા દર્દીઓ કોણ હશે?
એવા દર્દીઓને હળવાં લક્ષણવાળા માનવામાં આવશે, જેમને તાવની સાથે અથવા તાવ વગર શ્વસન તંત્ર એટલે કે અપર રેસ્પિરેટરી ટ્રેક્ટ સાથે સંબંધિત લક્ષણ હોય, પરંતુ તેમને શ્વાસ લેવામાં કોઈ તકલીફ ન થતી હોય. એ ઉપરાંત તેમનું ઓક્સિજન સેચ્યુરેશન 93% કરતાં વધારે હોય.

કેવા દર્દીઓને હોમ આઈસોલેટ કરવામાં આવશે?

  • જો ડૉક્ટર લેખિતમાં કહે કે દર્દી એસિમ્પ્ટોમેટિક છે અથવા એમાં હળવાં લક્ષણો છે તો આવા દર્દીઓને હોમ આઈસોલેટ કરવામાં આવશે.
  • એવા લોકોને હોમ આઈસોલેટ કરવામાં આવશે, જેમના ઘરે દર્દીની સાથે તેમના સંપર્કમાં આવેલા પરિવારને પણ ક્વોરન્ટીન કરવાની વ્યવસ્થા હોય.
  • દર્દીની સંભાળ લેવા માટે વ્યક્તિએ 24 કલાક ત્યાં હાજર રહેવું જોઈએ. સંભાળ રાખનાર અને ડૉક્ટર એકબીજાના સંપર્કમાં ત્યાં સુધી રહેશે, જ્યાં સુધી દર્દીનો આઈસોલેશન પિરિયડ પૂરો નથી થતો.
  • એક કંટ્રોલ રૂમનો નંબર પરિવારની પાસે રહેશે અને સમયાંતરે આઈસોલેટેડ દર્દીને ગાઈડ કરવામાં આવશે.

શું વૃદ્ધોને પણ હોમ આઈસોલેટ કરી શકાશે?

  • 60 વર્ષ કરતાં વધુની ઉંમરના વૃદ્ધો સંક્રમિત અને ગંભીર બીમારીથી પીડિત લોકોને ડૉક્ટરની પરવાનગી પછી જ હોમ આઈસોલેટ કરવામાં આવશે.
  • HIV અથવા કેન્સરથી પીડિત દર્દીઓને ઘરે આઈસોલેટ નહીં કરી શકાય, પરંતુ જો ડૉક્ટર સારવાર કર્યા પછી હોમ આઈસોલેશનની મંજૂરી આપે છે તો આવું કરી શકાય છે.

હોમ આઈસોલેટ દર્દીઓએ શું કરવાનું છે અને શું નથી કરવાનું?

  • ઘરે આઈસોલેટ દર્દીઓના પરિવારે બાકીના સભ્યોથી દૂર રહેવું. ખાસ કરીને વૃદ્ધો અને ગંભીર બીમારીથી પીડિત- જેમ કે બીપી, ડાયાબિટીસ, અને કેન્સરથી પીડિત લોકો સાથે અંતર રાખવું.
  • જે રૂમની સ્વાસ્થ્ય વિભાગે દર્દીઓ માટે પસંદગી કરી છે એ રૂમમાં આઈસોલેટ રહેવું પડશે. વારંવાર રૂમ ન બદલવો.
  • આઈસોલેશનવાળો રૂમ ખુલ્લો અને વેન્ટિલેટેડ હોવો જોઈએ, જેથી તાજી હવા અંદર-બહાર આવી શકે. દર્દીએ પોતાના રૂમની બારીઓ ખુલ્લી રાખવી જોઈએ.
  • આઈસોલેટ રહેતા દર્દીઓને રૂમની અંદર પણ ટ્રિપલ લેયર માસ્કનો ઉપયોગ કરવો પડશે. 8 કલાક પછી જો માસ્ક ભીનું અથવા ગંદું થઈ જાય તો એને બદલી નાખવું જોઈએ.
  • દર્દીની સંભાળ રાખનારી વ્યક્તિ અને દર્દી બંનેએ N95 માસ્કનો ઉપયોગ કરવો જોઈએ.
  • માસ્ક ફેંકતાં પહેલાં એને ટૂકડામાં કટ કરી લો અને ઓછામાં ઓછા 72 કલાક માટે પેપર બેગમાં નાખી દો. એના પછી માસ્ક ફેંકો.
  • દર્દીએ આરામ કરવો જોઈએ અને શરીરમાં પાણીની ઊણપ ન સર્જાવી જોઈએ.
  • સાવધાની રાખવી અને વારંવાર હાથ ધોવા. ઓછામાં ઓછા 40 સેકન્ડ સુધી સાબુથી હાથ ધોવા અને સેનિટાઈઝરનો ઉપયોગ કરવો.
  • દર્દીના વાસણ અથવા અન્ય વસ્તુ પરિવારના કોઈપણ સભ્ય સાથે શેર ન કરવી જોઈએ.
  • દરવાજો, સ્વિચ બોર્ડ, માસ્ક અને ગ્લવ્ઝ જેવી ઉપયોગી વસ્તુઓની સંભાળ રાખતી વ્યક્તિ અથવા દર્દીએ સાફ કરતા રહેવું જોઈએ.
  • દર્દીએ પોતાની પલ્સ અને ઓક્સિજન લેવલ ચેક કરતા રહેવું જોઈએ.
  • સંક્રમિત વ્યક્તિ પોતાના શરીરનું તાપમાન દરરોજ ચેક કરશે અને જો તબિયત ખરાબ થઈ જાય છે તો એ વાતનો રિપોર્ટ તરત ડૉક્ટર અને કંટ્રોલ રૂમે કરવો પડશે.

સંભાળ રાખનારી વ્યક્તિએ શું કરવું જોઈએ અને શું નહીં?

માસ્કનો ઉપયોગ કેવી રીતે કરવો?

  • દર્દીની સંભાળ રાખનારી વ્યક્તિએ ટ્રિપલ લેયર માસ્કનો ઉપયોગ કરવો જોઈએ.
  • જ્યારે દર્દીના રૂમમાં જાઓ તો પ્રયાસ કરો કે N-95 માસ્ક પહેરવું.
  • જ્યારે માસ્ક પહેર્યું હોય તો એને હાથથી સ્પર્શ ન કરો. આવું કરવાથી સંક્રમણ ફેલાઈ શકે છે.
  • જો તમારું માસ્ક ગંદું અથવા ભીનું થઈ જાય છે તો એને તરત બદલી દો.
  • માસ્કને ફેંક્યા પછી હાથ જરૂરથી ધોઈ લેવા.
  • હાથ ધોતાં પહેલાં તમારા શરીરના કોઈપણ ભાગને સ્પર્શ ન કરો.

હાથને સાફ કેવી રીતે રાખવા?

  • જ્યારે પણ હાથ ધોવો તો 40 સેકન્ડ સુધી સાબુ અને પાણીનો ઉપયોગ કરવો.
  • જો સાબુ ન હોય તો હેન્ડ વોશનો ઉપયોગ પણ કરી શકો છો.
  • હાથ ધોયા પછી ટુવાલ અથવા કોઈ સ્વસ્છ કપડાનો યુઝ કરો.
  • ટુવાલ અથવા કપડું ભીનું હોય તો એનો ઉપયોગ ફરીથી ન કરવો.
  • હાથના મોજા ઉતારતાં પહેલાં અને પછી હાથને જરૂરથી ધોવો.
  • મોજા ગંદા થઈ જાય તો એને બદલી દો અથવા ધોઈ નાખો.

દર્દીઓથી કેવી રીતે અંતર રાખવું?

  • દર્દીના શ્વાસ અને લાળ જેવી વસ્તુના સીધા સંપર્કમાં આવવાથી બચવું.
  • દર્દીની સંભાળ કરતા સમયે ડિસ્પોઝેબલ મોજાનો ઉપયોગ કરવો.
  • દર્દીનાં વાસણ, પાણીની બોટલ, ટુવાલ અને પથારી જેવી વસ્તુઓ શેર ન કરવી.
  • દર્દીનાં વાસણને મોજા પહેરીને સાબુથી સાફ કરવા.
  • મોજા ઉતાર્યા પછી હાથ જરૂરથી ધોવા.
  • દર્દીનાં કપડાં અથવા પથારી ધોતી વખતે ટ્રિપલ લેયર માસ્ક અને ડિસ્પોઝેબેલ માસ્કનો ઉપયોગ કરવો.

ઘરે દર્દીની સારવાર કેવી રીતે કરવી

  • દર્દી આઈસોલેશન દરમિયાન ડૉક્ટરના સીધા સંપર્કમાં રહેશે અને તબિયત ખરાબ થાય તો તરત રિપોર્ટ કરાવી લેવો.
  • જો દર્દીને પહેલાંથી જ કોઈ બીમારી છે તો તે ડૉક્ટરની સલાહ લીધા પછી પોતાની દવાઓ લઈ શકે છે.
  • ડૉક્ટરની સલાહ પર દર્દી કોગળા કરી શકે છે અને દિવસમાં 3 વખત નાસ પણ લઈ શકે છે.
  • સોશિયલ મીડિયાની ખોટી જાણકારીઓથી દર્દીઓએ બચવું જોઈએ.
  • ડૉક્ટરની સલાહ માટે જાતે દવા, બ્લડ ચેકઅપ અને CT સ્કેન જેવાં કામ ન કરવાં.

આઈસોલેશન દરમિયાન ક્યારે ડૉક્ટરને બતાવવું જરૂરી છે?

  • જો ત્રણ દિવસ કરતાં વધુ, 100 ડીગ્રી કરતાં વધારે તાવ હોય.
  • શ્વાસ લેવામાં તકલીફ.
  • એક કલાકમાં ઓછામાં ઓછામાં ત્રણ વખત દર્દીનું ઓક્સિજન સેચ્યુરેશન 93%થી ઓછું આવવું.
  • દર્દી એક મિનિટમાં 24 વખતથી વધારે શ્વાસ લે.
  • છાતીમાં સતત દુખાવો અથવા દબાણ મહેસૂસ થાય.
  • દર્દીને ભ્રમ થવા લાગે કે તેને ઊઠવામાં સમસ્યા થાય.
  • વધારે થાક અને સ્નાયુઓમાં દુખાવો થવા લાગે.

ક્યારે હોમ આઈસોલેશન પૂરું થશે

  • આઈસોલેશન દરમિયાન જો 3 દિવસ સુધી સતત તાવ નથી આવતો તો દર્દી 7 દિવસમાં કોરોના નેગેટિવ માનવામાં આવશે.
  • તેવી જ રીતે લક્ષણ વગરના દર્દીઓને 7 દિવસમાં હોમ આઈસોલેશનમાંથી છુટકારો મળશે.
  • 7 દિવસ પછી હોમ આઈસોલેટેડ દર્દીઓએ કોઈપણ પ્રકારનો ટેસ્ટ નહીં કરાવવો પડે.