સારું નેટવર્ક આવે તે માટે લેટેસ્ટ સોફ્ટવેર અપડેટ જરૂરી:જો ઘરમાં મોબાઇલ સિગ્નલમાં સમસ્યા હોય તો આ 5 સરળ ઉપાય અજમાવો

કોલ ડ્રોપ્સની સમસ્યા આજે પણ યથાવત છે. કેટલાક ઉપાયો દ્વારા ફોનના નેટવર્ક સિગ્નલને સુધારી શકાય છે. ચાલો જાણીએ આ ઉપાયો વિશે ટેક ગુરુ અભિષેક તૈલાંગ પાસેથી…

સૌથી પહેલા એ જાણી લો કે ઘરમાં સિગ્નલ્સમાં કઈ જગ્યાએ સમસ્યા થાય છે. આ માટે બેસ્ટ રસ્તો એ છે કે તમારા ફોનને ઘરના દરેક ખૂણે લઈ જાઓ અને ફોનના સિગ્નલ બાર પર નજર રાખો. ઘરના જે ભાગોમાં સિગ્નલ ઓછું દેખાઈ છે, સમજી લો કે ઘરના આ ભાગોમાં નેટવર્ક સિગ્નલને સૌથી વધુ સુધારવાની જરૂર છે.

સ્માર્ટ સિગ્નલ બૂસ્ટર
તમે મોબાઇલ સિગ્નલ સુધારવા માટે 'મોબાઇલ સ્માર્ટ સિગ્નલ બૂસ્ટર'નો ઉપયોગ કરી શકો છો. સ્માર્ટ સિગ્નલ બૂસ્ટર શક્તિશાળી બેઝબેન્ડ પ્રોસેસર દ્વારા સિગ્નલો તમારા સુધી પહોંચે તે પહેલા તેને સાફ કરે છે. તે પછી તે તમને સિગ્નલ ટ્રાન્સમિટ કરે છે. સ્માર્ટ સિગ્નલ બૂસ્ટરનો ઉપયોગ કરવો ખૂબ જ સરળ છે. તમારે ફક્ત તેને પ્લગ ઇન કરવાનું છે. આ એનાલોગ સિગ્નલ બૂસ્ટર કરતાં થોડા વધુ ખર્ચાળ છે, જો કે, જો તમારા ઘરમાં નબળા સિગ્નલ હોય તો તે એક સારો વિકલ્પ છે.

સેલ્યુલર રીપીટરનો ઉપયોગ
જો તમારા ઘરમાં સારું સિગ્નલ છે, પરંતુ તમારા ઘરના અમુક રૂમમાં સિગ્નલની સમસ્યા છે, તો તમારા માટે સેલ્યુલર રીપીટર એક સારો અને સસ્તો વિકલ્પ હશે. એક સારું સેલ્યુલર રીપીટર 2500 થી 6000 રૂપિયાની વચ્ચે સરળતાથી મળી શકે છે. સેલ્યુલર રીપીટરના એન્ટેનાને એવા સ્થાન પર મૂકો કે જે ઓછામાં ઓછા 2 સિગ્નલ મેળવે. તેને ઇન્સ્ટોલ કરવામાં તમને કેટલીક સમસ્યાઓ આવી શકે છે, તેથી ટેક્નિક સપોર્ટની જરૂર પડી શકે છે.

વાઇફાઇ કૉલિંગ સુવિધા
નવીનતમ ફોન વાઇફાઇ કૉલિંગ સુવિધા સાથે પણ આવે છે, જે તમને નબળા નેટવર્ક સિગ્નલના કિસ્સામાં કૉલ કરવા માટે તમારા હોમ વાઇફાઇનો ઉપયોગ કરવાની મંજૂરી આપે છે. આ ફીચર એક પણ રૂપિયો ખર્ચ્યા વગર તમારી સમસ્યાનો ઉકેલ લાવી શકે છે. તમારે ફક્ત તમારા ફોનના સેટિંગ્સમાં જઈને તેને સક્ષમ કરવું પડશે.

સોફ્ટવેર અપડેટ
સારા નેટવર્ક માટે ફોનમાં લેટેસ્ટ સોફ્ટવેર અપડેટ જરૂરી છે. કારણ કે ઘણી વખત કંપનીઓ અપડેટ દ્વારા નેટવર્ક સહિત અન્ય બાબતોને ઠીક કરે છે. આ સાથે જ નિયમિત સોફ્ટવેર અપડેટ ફોન પર સિગ્નલ રિસેપ્શનને સુધારવામાં મદદ કરે છે. ફોન નિર્માતાઓ નાની ભૂલો અને બદલાતી ટેકનોલોજી માટે સોફ્ટવેર અપડેટ્સમાં સોફ્ટવેર પેચ ઉમેરતા રહે છે. ઘણી વખત નેટવર્ક પ્રોવાઈડર તરફથી ટેક્નિકલ અપગ્રેડ કરવામાં આવે છે, જે તમને તમારા ફોનમાં સોફ્ટવેર અપડેટના અભાવે મળતું નથી. જેના કારણે ફોનમાં ઓછા સિગ્નલ મળવા લાગે છે.

નેટવર્ક એન્ટેના સમસ્યા
એ પણ જાણો કે શું તમારા ફોનમાં માત્ર લો સિગ્નલ તો નથી મળી રહ્યા? જો તમારા ફોનમાં ઘરના એક ભાગમાં સિગ્નલ નબળું છે અને અન્ય લોકોના ફોનને સારા સિગ્નલ મળે છે તો સમસ્યા તમારા ફોનમાં હોઈ શકે છે નેટવર્કમાં નહીં. આવી સ્થિતિમાં તમારે ફોનનું નેટવર્ક એન્ટેના બદલવું પડશે અથવા નવો ફોન લેવો પડશે.