• Gujarati News
  • Utility
  • A Woman Infected With Two Variants Of The Corona Died On The 5th Day, Identified By Genome Sequencing, Such Investigations Are Rare In India; Learn Everything Related To It

દુનિયાનો પહેલો કેસ:કોરોનાનાં બે વેરિઅન્ટથી સંક્રમિત મહિલાનું 5માં દિવસે મૃત્યુ, જીનોમ સિક્વન્સિંગથી ઓળખ થઈ, ભારતમાં આવી તપાસ ઘણી ઓછી; જાણો તેનાથી સંબંધિત દરેક બાબત

3 મહિનો પહેલા

બેલ્જિયમના આલ્સ્તો શહેરની એક હોસ્પિટલમાં થોડા દિવસ પહેલા એક મહિલા પહોંચી હતી. તે વારંવાર સંતુલન ગુમાવી રહી હતી. જો કે, તેના શ્વાસ બરાબર ચાલતા હતા. ઓક્સિજન લેવલ પણ 94% કરતા વધારે હતું, પરંતુ તપાસમાં તે એક નહીં કોરોનાનાં બે અલગ વેરિઅન્ટ એટલે કે બે પ્રકારના કોરોનાથી સંક્રમિત હતી. થોડા કલાકોમાં જ તેના ફેફસાં સુધી સંક્રમણ પહોંચી ગયું અને પાંચમાં દિવસે તેનું મૃત્યુ થઈ ગયું. મહિલા કોરોનાના આલ્ફા અને બીટા વેરિઅન્ટથી સંક્રમિત હતી. આ બંનેને WHO ડિસેમ્બર 2020માં ‘વેરિઅન્ટ ઓફ કન્સર્ન’ જાહેર કરી ચૂક્યું છે. હકીકતમાં, આ દુનિયાનો પહેલો કેસ છે જેમાં કોઈને બે વેરિઅન્ટ એટલે કે ડબલ ઈન્ફેક્શન થયું હોય. સાયન્ટિસ્ટ તેને કોરોનાનો એક નવો પ્રકાર માની રહ્યા છે. ગત શનિવારે યુરોપિયન કોંગ્રેસ ઓફ ક્લિનિકલ માઈક્રોબાયોલોજી એન્ડ ઈન્ફેક્શિયસ ડિસીઝમાં સાયન્ટિસ્ટ્સે આ અનોખા કેસ પર ચર્ચા કરી. એક્સપર્ટ્સના જણાવ્યા પ્રમાણે, ડબલ ઈન્ફેક્શનને લઈને દુનિયાને અલર્ટ રહેવાની જરૂર છે. આ કેસ ભારત માટે બે કારણોસર ઘણો ખાસ છે. પ્રથમ- આપણા દેશમાં ડેલ્ટા, ડેલ્ટા પ્લસ, લેમ્બ્ડા અને કપ્પા જેવા વેરિઅન્ટ એક્ટિવ છે અને બીજું ભારત વેરિઅન્ટના પ્રકારની તપાસ કરવા, એટલે કે જીનોમ સિક્વન્સિંગમાં ઘણો પાછળ છે.

મહિલા એકલી રહેતી હતી, વેક્સિન નહોતી લીધી

  • 90 વર્ષની આ મહિલાની કોઈ ખાસ મેડિકલ હિસ્ટ્રી નથી, એટલે તેને બીજી બીમારીઓ નહોતી.
  • મહિલા એકલી રહેતી અને ઘરે નર્સિંગ કેર લેતી હતી.
  • શરૂઆતમાં તેને શ્વાસ લેવામાં કોઈ તકલીફ નહોતી થઈ. તેના શરીરમાં ઓક્સિજન લેવલ પણ સારું હતું.
  • તેને બે વેરિઅન્ટ્સથી ઈન્ફેક્શન કેવી રીતે થયું, તે હજી સ્પષ્ટ નથી.
  • મહિલાએ કોરોના વેક્સિન નહોતી લીધી

બે અલગ અલગ લોકોથી ઈન્ફેક્શન થયું
યુરોપિયન કોંગ્રેસ ઓફ ઈન્ફેક્શિયસ ડિસીઝમાં આ કેસ પર રિપોર્ટનું નેતૃત્વ કરનાર ડૉ. એની વેંકીકબર્ગેનના જણાવ્યા પ્રમાણે, બેલ્જિયમમાં આલ્ફા અને બીટા વેરિઅન્ટ ફેલાયેલો છે, તેથી એ વાતની સંપૂર્ણ સંભાવના છે કે મહિલા બે અલગ અલગ લોકોથી સંક્રમિત થઈ હશે.

જીનોમ સિક્વન્સિંગ વધારવામાં આવે તો આવા કેસ વધુ મળશે
બેલ્જિયમનો આ કેસ ભલે દુનિયામાં પહેલો કેસ માનવામાં આવી રહ્યો હોય પરંતુ ડૉ. એની વેંકીરબર્ગેન સહિત બીજા સંશોધકોનું કહેવું છે કે, બ્રાઝિલમાં આ વર્ષની શરૂઆતમાં બે વેરિઅન્ટ્સ સંક્રમિત થવાના કેસ મળ્યા હતા, પરંતુ તે કેસ પર કોઈ રિસર્ચ નથી થયું. આ સંશોધકોનું કહેવું છે કે જો કોરોનાવાઈરસના વેરિઅન્ટ્સની તપાસ માટે જીનોમ સિક્વન્સિંગ વધારવામાં આવે તો બેલ્જિયમ જેવા વધુ કેસ સામે આવી શકે છે.

ફ્લૂના દર્દીઓમાં પણ બે વેરિઅન્ટ્સ મળ્યા
ડૉ. વેંકીરબર્ગેનના જણાવ્યા પ્રમાણે, સામાન્ય ફ્લૂના દર્દીઓમાં પણ ફ્લૂ વાઈરસના એકથી વધુ વેરિઅન્ટ પહેલા મળી ચૂક્યા છે. આવી સ્થિતિમાં કોઈને કોરોનાના બે વેરિઅન્ટનું સંક્રમણ થવું એ આશ્ચર્યજનક વાત નથી.

તો શું બે વેરિઅન્ટ્સ કોરોનાને ગંભીર બનાવે છે? ત્રણ નિષ્ણાતોથી સમજો
સાયન્ટિસ્ટ્સના જણાવ્યા પ્રમાણે, કોઈ એક દર્દીમાં બે વેરિઅન્ટ મળવાથી કોરોના ગંભીર થવાની આશંકા છે, પરંતુ આ દાવાની પુષ્ટિ કરવા માટે હજી વધુ રિસર્ચ કરવાનું બાકી છે.

  1. બેલ્જિયમ મામલાના કેસ રિપોર્ટનું નેતૃત્વ કરનાર ડૉ. એની વેંકીરબર્ગેનના જણાવ્યા પ્રમાણે, બેલ્જિયમની આ મહિલાની હાલત ખરાબ કરવામાં બે વેરિઅન્ટની ભૂમિકા વિશે કંઈ કહેવું મુશ્કેલ છે. હજી સુધી આવો બીજો કોઈ કેસ સામે નથી આવ્યો. જીનોમ સિક્વન્સિંગ ઓછું થવાને કારણે ડબલ વેરિઅન્ટની અસર પર ઘણું ઓછું રિસર્ચ થયું છે.
  2. વાયરોલોજિસ્ટ અને ઈંગ્લેન્ડની વારવિક યુનિવર્સિટીમાં મોલિક્યૂલર ઓન્કોલોજીના પ્રોફેસર લોરેન્સ યંગના જણાવ્યા મુજબ, એ જાણવું જરૂરી છે કે વેરિઅન્ટ ઓફ કન્સર્નથી ઈન્ફેક્ટેડ થવા પર કોવિડની ગંભીરતા પર અને વેક્સિનની એફિકેસી પર શું અસર પડે છે.
  3. દિલ્હીમાં ઈન્ટરનેશનલ સેન્ટર ફોર જેનેટિક એન્જિનિયરિંગ એન્ડ બાયોટેક્નોલોજીના પૂર્વ ડાયરેક્ટર ડૉ. વીએસ ચૌહાણે એક ઈન્ટરવ્યુમાં જણાવ્યું કે, કોઈ દર્દીની ગંભીરતા તેના સ્વાસ્થ્ય, ઈમ્યુનિટી અને વાઈરસની ક્ષમતાથી નક્કી થાય છે, અલગ અલગ પ્રકારના વાઈરસથી નહીં.

આખરે આ જીનોમ અને જીનોમ સિક્વન્સિંગ શું છે?

  • જનીન આપણી જૈવિક લાક્ષણિકતાઓમાંથી આપણી લંબાઈ, વાળનો કલર, આપણી આંખોનો કલર જેવી બાબતો નક્કી કરે છે. એટલે કે કોઈ એક જીવનો સંપૂર્ણ જેનેટિક કોડ જીનોમ કહેવાય છે.
  • જીનોમ કોઈ જીવને બનાવતી પુસ્તક છે, તો જનીન તે પુસ્તકનું ચેપ્ટર.
  • કોઈપણ બે જીવોનું જીનોમ એક જેવું ન હોઈ શકે. સરળ શબ્દોમાં કહીએ તો જીનોમ જૈવિક દુનિયાનું ઓળખ પત્ર છે.
  • મનુષ્ય સહિત મોટાભાગના જીવોનું જીનોમ DNAવાળુ હોય છે, પરંતુ કોરોના જેવા વાઈરસના જીનોમ RNAવાળા હોય છે.
  • જીનોમનું અધ્યન કોઈપણ જીવની રચના, લાક્ષણિકતાઓ અને કામ કરવાની રીત સમજાવી શકે છે.
  • જીનોમને નરી આંખે નખી જોઈ શકાતા. માઈક્રોસ્કોપથી જોવા પર પણ તેને સમજવા મુશ્કેલ હોય છે, તેથી વૈજ્ઞાનિક તેને કોડમાં બદલી દે છે. આ જ જીનોમ સિક્વન્સિંગ છે.
  • વાઈરસના જીનોમ RNAવાળા હોય છે, તેથી તેના સિક્વન્સિંગ માટે પહેલા DNAમાં રૂપાંતરિત થાય છે.

હવે સમજીએ વાઈરસનું મ્યૂટેશન શું છે?
કોરોનાવાઈરસ કોઈ ઈન્ફેક્ટેડ વ્યક્તિના શરીરમાં પોતાની કોપી બનાવે છે. આ પ્રક્રિયા ચોક્કસ નથી હોતી. આ દરમિયાન હંમેશાં વાઈરસથી જીનોમ સિક્વન્સમાં કંઈક ફેરફાર થાય છે. આ ફેરફારને મ્યૂટેશન કહેવામાં આવે છે. વાઈરસના આ નવા સ્વરૂપને તેના નવા વેરિઅન્ટ કહેવામાં આવે છે. મોટાભાગના મ્યૂટેશનથી વાઈરસ પર કોઈ ફરક નથી પડતો, પરંતુ કોઈ મ્યૂટેશન એવું હોય છે જે વાઈરસથી ઈન્ફેક્ટ કરવાની તાકત અથવા ઈમ્યુનિટીથી બચવાની ક્ષમતાને વધારે છે. તેનાથી તેને સંક્રમિત લોકો ગંભીર રીતે બીમાર થવા લાગે છે અને મૃત્યુ દર પણ વધી જાય છે.

કોરોનાની વિરુદ્ધ લડાઈમાં જીનોમ સિક્વન્સિંગ કેમ જરૂરી છે?

  • કોરોનાની લડાઈમાં જીનોમ સિક્વન્સિંગ એટલે કે કોરોના વેરિઅન્ટની ઓળખ જરૂરી છે.
  • ધારો કે, કોઈ વિસ્તારમાં અચાનક કોરોનાના કેસ વધી જાય છે. આવી સ્થિતિમાં જીનોમ સિક્વન્સિંગથી જાણી શકાય છે કે શું સંખ્યામાં આ વધારો નવા વેરિઅન્ટના કારણે તો નથી થયોને?
  • વેરિઅન્ટની ઓળખથી એ જાણી શકાય છે કે આ વાઈરસ ક્યાંથી આવ્યો. જે રીતે કહેવામાં આવી રહ્યું છે કે ભારતમાંથી મળેલો ડેલ્ટા વેરિઅન્ટ અત્યાર સુધી દુનિયાના 111 દેશોમાં ફેલાઈ ચૂક્યો છે.

જીનોમ સિક્વન્સિંગ વગર બેલ્જિયમના કેસને શોધી ન શકાયો હોત

  • જો બેલ્જિયમવાળા કેસના જીનોમ સિક્વન્સિંગ ન હોત તો એ જાણી શકાયું ન હોત કે કોઈ વ્યક્તિ બે વેરિઅન્ટથી પણ ઈન્ફેક્ટેડ થઈ શકે છે.
  • આ આધારે હવે સાયન્ટિસ્ટ એ શોધવામાં વ્યસ્ત છે કે ક્યાંય તેનાથી કોરોના વધારે સંક્રામક તો નથી થતો અથવા તેનાથી મૃત્યુની આશંકા તો નથી વધી જતીને.