નવા વર્ષમાં પણ છટણી ચાલુ:શું આવનાર વર્ષમાં પણ કર્મચારીઓએ નોકરીની અસુરક્ષા સાથે કામ કરવું પડશે? ગૂગલ સહિત 4 કંપનીઓમાં છટણી થવાના એંધાણ

કોવિડ -19ના સમયથી જે કર્મચારીઓનો છટણી શરુ થઈ હતી તે હજુ આ વર્ષે પણ યથાવત છે એવું લાગી રહ્યું છે. ટેક જાયન્ટ ગૂગલે 20 જાન્યુઆરીનાં રોજ એવું સ્ટેટમેન્ટ આપ્યું હતું કે, ‘તે 12,000 કામદારો અથવા તેના લગભગ 6 ટકા કર્મચારીઓને છૂટા કરી રહી છે.’ આ વર્ષની શરુઆતમાં જ આર્થિક મંદી વિશેના ઘણા અનુમાનો લગાવવામાં આવ્યા હતા ત્યારે ગૂગલ જેવી ટેક કંપનીનું આ સ્ટેટમેન્ટ તે વાતને સાચી સાબિત કરી રહ્યું છે. જો કે, ગૂગલ સિવાય પણ માઈક્રોસોફ્ટ, એમેઝોન અને સ્વિગી જેવી કંપનીઓ પણ આ જ પગલું લેશે તેવા સંકેતો મળ્યા છે, તો આજે જાણીએ કે, 2023ની શરુઆતમાં કઈ-કઈ કંપનીઓમાં નજીકનાં સમયમાં છટણી જોવા મળી શકે.

ગૂગલ પેરેન્ટ આલ્ફાબેટ 12,000 કર્મચારીઓને નોકરીમાંથી કાઢી મૂકશે
ગૂગલની પેરેન્ટ કંપની આલ્ફાબેટે 20 જાન્યુઆરીના રોજ જાહેરાત કરી હતી કે, તે લગભગ 12,000 કર્મચારીઓ અથવા તેના વૈશ્વિક કાર્યબળના 6 ટકા હિસ્સામાં કાપ મૂકવાની યોજના ધરાવે છે. આ છટણીની અસર વૈશ્વિક સ્તરે પડશે. ચીફ એક્ઝિક્યુટિવ ઓફિસર સુંદર પિચાઇએ આ અંગે શુક્રવારના રોજ એક મેઇલમાં કર્મચારીઓને જણાવ્યું હતું.

માઇક્રોસોફ્ટ 10,000 નોકરીઓ કાપ મૂકશે
માઇક્રોસોફ્ટ કોર્પે બુધવારે જણાવ્યું હતું કે, ‘તે નાણાકીય વર્ષ 2023નાં ત્રીજા ક્વાર્ટરનાં અંત સુધીમાં 10,000 નોકરીઓમાં ઘટાડો કરશે, જે તાજેતરના સંકેત છે કે, યુએસ ટેકનોલોજી સેક્ટરમાં છટણીઓ વેગ આપી રહી છે કારણ કે, કંપનીઓ આર્થિક મંદી માટે કમર કસી રહી છે.’ માઇક્રોસોફ્ટે જણાવ્યું હતું કે, ‘છટણીનાં પરિણામે નાણાકીય વર્ષ 2023ના બીજા ત્રિમાસિક ગાળામાં $1.2 અબજનો ચાર્જ લાગશે, જે શેર દીઠ નફા પર 12 સેન્ટની નકારાત્મક અસર દર્શાવે છે.’

એમેઝોન ઇન્ડિયાનો ટર્મિનેશન દરમિયાન સ્ટાફ ઘટ્યો
ઓનલાઇન કર્મચારી સમુદાય પ્લેટફોર્મ - ગ્રેપવાઇન પરની એક પોસ્ટ અનુસાર, એમેઝોન ઇન્ડિયાનાં કર્મચારીઓ તેમની છટણી વિશે જાણ થયા પછી તેમની ઓફિસોમાં તૂટી પડ્યા હતા. એક અનામી પ્રોફાઇલવાળા કર્મચારીએ આ પ્લેટફોર્મ પર લખ્યું હતું કે, ‘મારી ટીમનો 75 ટકા હિસ્સો જતો રહ્યો છે. જો કે, હું બાકીના 25% માં છું પરંતુ, હું કામ કરવા માટે પ્રોત્સાહિત થતો નથી. તેઓ લોકોને કેબિનમાં બોલાવીને ફાયર કરી રહ્યા છે. લોકો ઓફિસમાં રડી રહ્યા છે.’ એમેઝોને તાજેતરમાં જાહેરાત કરી હતી કે તે 18 જાન્યુઆરીથી 18,000 થી વધુ કર્મચારીઓની છટણી કરશે. એમેઝોનનાં CEO એન્ડી જેસીએ કર્મચારીઓને મોકલેલા એક મેઇલમાં નોકરીમાં કાપ પાછળનાં કારણો તરીકે ‘અનિશ્ચિત અર્થતંત્ર’ અને ‘ઝડપી ભરતી’ને ટાંક્યા હતા.

સ્વિગી 380 કર્મચારીઓની છટણી કરશે
ફૂડ ડિલિવરી પ્લેટફોર્મ સ્વિગી તેના ફૂડ ડિલિવરી બિઝનેસમાં ધીમી વૃદ્ધિને પગલે કંપનીવ્યાપી પુનર્ગઠનનાં ભાગરૂપે 380 કર્મચારીઓને છોડી રહ્યું છે, એમ ચીફ એક્ઝિક્યુટિવ શ્રીહર્ષ મજેટ્ટીએ ET દ્વારા સમીક્ષા કરેલી આંતરિક નોંધમાં કર્મચારીઓને જણાવ્યું હતું. સ્વિગી લગભગ 6,000 લોકોને રોજગારી આપે છે અને છટણી તેના કુલ કાર્યબળના લગભગ 6 ટકાને અસર કરશે. મજેટીએ જણાવ્યું હતું કે અસરગ્રસ્ત કર્મચારીઓને તેમના કાર્યકાળના આધારે ત્રણથી છ મહિનાના પગારનું વળતર મળશે, જેમાં ઓછામાં ઓછા ત્રણ મહિનાના વેતનની ખાતરીપૂર્વક ચૂકવણી કરવામાં આવશે.

ગોમિકેનિક 70% કર્મચારીઓની છટણી કરશે
ઓટોમોબાઈલ સર્વિસિંગ સ્ટાર્ટઅપ ગોમેકેનિકનાં કો-ફાઉન્ડર અમિત ભસીને 18 જાન્યુઆરીએ જાહેરાત કરી હતી કે, કંપની તેના લગભગ 70 ટકા કર્મચારીઓને નોકરીમાંથી કાઢી મૂકશે. સોફ્ટબેંક અને મલેશિયન સોવરેન ફંડ ખઝાનાહે ડ્યુ ડિલિજન્સ (DD) પછી કાર સર્વિસિંગ સ્ટાર્ટઅપમાં ભંડોળના સોદામાંથી પીછેહઠ કરી હતી, જેના કારણે કંપનીના ખાતાઓ અને કામગીરીમાં સ્પષ્ટ ક્ષતિઓ સામે આવી હતી.

દરરોજનાં સરેરાશ 3 હજાર કર્મચારીઓની છટણી
જાન્યુઆરીમાં ભારત સહિત વૈશ્વિક સ્તરે દરરોજનાં લગભગ સરેરાશ 3,000 ટેક કર્મચારીઓની છટણી કરવામાં આવી રહી છે. વૈશ્વિક સ્તરે આર્થિક મંદી અને મંદીના ભય વચ્ચે છટણીની ગતિએ વેગ પકડ્યો છે. અત્યાર સુધીમાં 166 ટેક કંપનીઓ દ્વારા 65,000થી વધુ કર્મચારીઓની હકાલપટ્ટી કરવામાં આવી છે. વર્ષ 2022માં Layoffs.fyi ટ્રેકિંગ વેબસાઈટ અનુસાર 1,000થી વધુ કંપનીઓએ 1,54,336 કર્મચારીઓને છૂટા કર્યા હતા