દંડ:ફેસબુક પર વિશ્વાસ કરતાં પહેલાં ચેતી જજો, ઈટાલીની ઓથોરિટીએ ડેટાના દુરુપયોગ બદલ 61 કરોડ રૂપિયાનો દંડ ફટકાર્યો

ઈટાલીની કોમ્પિટિશન ઓથોરિટીએ ફેસબુક પર 7 મિલિયન યુરો (આશરે 61 કરોડ રૂપિયા)નો દંડ ફટકાર્યો છે. રેગ્યુલેટરીએ જણાવ્યું કે આ દંડ યુઝર્સના ડેટાનો દુરુપયોગ કરવા માટે લગાવાયો છે. જોકે આ મામલે ફેસબુકે કોઈ પ્રતિક્રિયા નથી આપી.

પહેલાં પણ 43 કરોડની પેનલ્ટી લાગી હતી
નવેમ્બર 2018માં ઈટાલીની એન્ટિટ્રસ્ટ બોડીએ નિર્ણય લીધો હતો કે ફેસબુકે પોતાના યુઝર્સનો ડેટા કલેક્ટ કરવા અને તેના ઉપયોગ માટે યોગ્ય માહિતી આપી નહોતી. ત્યારબાદ રેગ્યુલેટરીએ ફેસબુક પર 5 મિલિયન યુરો (આશરે 43 કરોડ રૂપિયા)નો દંડ ફટકાર્યો હતો. સાથે જ કંપનીને દરેક રજિસ્ટર યુઝર્સના પર્સનલ પેજ પર એક સંશોધિત વિવરણ આપવા માટે પણ કહ્યું હતું.

રેગ્યુલેટરીએ પોતાના નિવેદનમાં કહ્યું હતું કે, હાલની તપાસે સાબિત કર્યું કે ફેસબુકે સંશોધિત નિવેદન આપ્યું નથી અને પહેલાનું વલણ પણ બદલ્યું નથી. ફેસબુકે ડેટાના આર્થિક મુલ્યનો જોતાં યુઝર્સના ડેટાનો ઉપયોગ કેવી રીતે થાય તે નિર્ણય યુઝર્સના હાથમાં જ સોંપવો જોઈએ.