આઈફોન 12 પ્રોમાં પ્રોબ્લેમ:યુઝર્સે એપલ ફોરમમાં બેટરી ડ્રેનેજની ફરિયાદ કરી, સ્ક્રીન બંધ રહ્યા પછી પણ બેટરી ઊતરી જાય છે

ભારતીય માર્કેટમાં એપલના સૌથી લેટેસ્ટ આઈફોન 12 સિરીઝનું વેચાણ શરુ થઇ ગયું છે. આ દરમિયાન નવા આઈફોનનો ઉપયોગ કરનારા યુઝર્સે દાવો કર્યો છે કે, સ્ટેન્ડબાય થયા પછી પણ ફોનની બેટરી ઝડપથી ઊતરી જાય છે. એપલે આઈફોન 12ના લોન્ચિંગ પછી દાવો કર્યો હતો કે, તેમાં બેટરી બેકઅપ આઈફોન 11ની સરખામણીએ વધારે છે.

એપલ ફોરમ પર યુઝરે ફરિયાદ કરી
Master26A નામના યુઝરે એપલના ડિસ્કશન ફોરમ પર ફરિયાદ કરી છે કે, તેના નવા આઈફોન 12 પ્રોની બેટરી ઝડપથી પૂરી થઇ જાય છે. તેના ફોનની સ્ક્રીન મોટાભાગે બંધ રહે છે. તેણે ફોનમાંથી 5G સિગ્નલ પણ બંધ કરી નાખ્યું હતું. એ પછી પણ ફોનની બેટરીમાં ડ્રેનેજની તકલીફ થઇ રહી છે.

આ ફરિયાદ પર આઈફોન 12નો ઉપયોગ કરનારા બીજા યુઝર્સે પણ બેટરી ઊતરી જવાનો પ્રોબ્લેમ શેર કર્યો છે. યુઝર્સે સ્ક્રીનની ઓન/ઓફ સ્ટેટિસ્ટિક્સની સાથે બેટરી ગ્રાફ પણ શેર કર્યો છે. સ્ક્રીન બંધ થયા પછી ફોનમાં બેટરી અમુક કલાક પછી ડિસ્ચાર્જ થઇ ગઈ. એપલે આઈફોન 11 પ્રો અને 11 પ્રો મેક્સની સરખામણીએ નવા આઈફોન 12 પ્રો અને 12 પ્રો મેક્સ પર બેટરીનો આકાર નાનો કરી દીધો છે.

આઈફોન 12નો બેટરી ટેસ્ટ
એક યુટ્યુબર દ્વારા આઈફોન 12 સિરીઝના સ્માર્ટફોન્સ અને આઈફોન 11 સિરીઝના સ્માર્ટફોન્સની બેટરી બેકઅપને લઈને અમુક ટેસ્ટ કર્યા હતા. તેમાં ખબર પડી કે આઈફોન 12ની બેટરી આઈફોન 11થી સારી છે પરંતુ આઈફોન 11 પ્રો અને 11 પ્રો મેક્સની સરખામણીમાં નબળી રહી. ટેસ્ટમાં આઈફોન 12 અને 12 પ્રોની બેટરી 6.5 કલાક ચાલી. તો આઈફોન 11 પ્રોની બેટરી 7.5 કલાક ચાલી. આઈફોન 11 પ્રો મેક્સની બેટરી 8 કલાક 29 મિનિટ ચાલી.