એન્ટ્રી:ટેસ્લાની ભારતમાં એન્ટ્રી થઈ, ઇલોન મસ્કે કંપનીનું ‘ટેસ્લા ઈન્ડિયા મોટર્સ’ તરીકે રજિસ્ટ્રેશન કરાવ્યું

અમેરિકન કંપની ટેસ્લા ભારતમાં પ્રવેશ કરી ચૂકી છે. તે વિશ્વની સૌથી મોટી ઇલેક્ટ્રિક ઓટોમોબાઇલ કંપની છે. ટેસ્લાએ ભારતમાં તેનું યૂનિટ રજિસ્ટર્ડ કરાવ્યું છે. ફાઇલિંગ મુજબ, ટેસ્લા ઈન્ડિયા મોટર્સ અને એનર્જી પ્રાઈવેટ લિમિટેડની બેંગલુરુના સરનામાં પર રજિસ્ટ્રેશન કરાવવામાં આવ્યું છે. અહીં કંપની એક રિસર્ચ એન્ડ ડેવલપમેન્ટ યૂનિટ સાથે મેન્યુફેક્ચરિંગ શરૂ કરશે.

કંપની અહીં લક્ઝરી ઇલેક્ટ્રિક ગાડીઓનું ઉત્પાદન અને વેપાર કરશે. તે ભારતમાં મોડેલ 3 લોન્ચ કરી શકે છે. કર્ણાટકના મુખ્યમંત્રી બીએસ યેદિયુરપ્પાએ ટેસ્લાનું વેલકમ કર્યું છે. ટેસ્લાનો રજિસ્ટ્રેશન નંબર 142975 છે. તેના ડાયરેક્ટર વૈભવ તનેજા, વેંકટરંગમ શ્રીરામ અને ડેવિડ જોન ફેન્સ્ટિન છે. તનેજા ટેસ્લા ખાતે CFO છે, જ્યારે ફેન્સ્ટિન ગ્લોબલ સિનિયર ડાયરેક્ટર, ટ્રેડ માર્કેટ એક્સેસ છે.

ઇલોને સોશિયલ મીડિયા પર માહિતી આપી હતી
ટેસ્લાના CEO ઈલોન મસ્કે ગયા વર્ષે ઓક્ટોબરમાં ટ્વીટ કર્યું હતું કે, તેમની કંપની વર્ષ 2021માં ભારત જશે. જ્યારે યુઝરની ભારતના પ્લાન અંગે પૂછ્યું ત્યારે તેમણે આ ટ્વિટ કર્યું હતું. વર્ષ 2019માં તેમણે કહ્યું કે, તે આ વર્ષ (2019)માં ભારતમાં એન્ટ્રી કરી શકે છે. જો આ વર્ષે નહીં તો વર્ષ 2020 સુધીમાં આવી જશે. જો કે, વર્ષ 2020માં કોરોનાએ કંપનીના પ્લાન પર પાણી ફેરવી નાખ્યું હતું.