બુકિંગ:ઓલાના ઇ-સ્કૂટરનું બુકિંગ શરૂ થયું, સૌથી પહેલાં ડિલિવરી લેવા માટે 499 રૂપિયા ચૂકવવા પડશે

5 મહિનો પહેલા

લાંબી રાહ જોવડાવ્યા બાદ ઓલાએ આજથી તેના ઇલેક્ટ્રિક સ્કૂટરનું બુકિંગ શરૂ કરી દીધું છે. ગ્રાહકો હવે તેને olaelectric.com પર જઇને બુક કરાવી શકે છે. બુકિંગ માટે 499 રૂપિયા ચૂકવવા પડશે. કંપનીના CEO ભાવિશ અગ્રવાલે સોશિયલ મીડિયા પર આ માહિતી આપી છે.

ઓલા ઇલેક્ટ્રિકે તમિળનાડુના કૃષ્નાગિરી જિલ્લામાં વિશ્વનો સૌથી મોટો ઇલેક્ટ્રિક ટૂ-વ્હીલર પ્લાન્ટ સ્થાપ્યો છે. જ્યાં ઓલા લોકલ માગ સિવાય એશિયા, યુરોપ અને દક્ષિણ અમેરિકાના બજારોને સપ્લાય કરવા માટે વાર્ષિક 20 લાખ ઇલેક્ટ્રિક સ્કૂટર્સ બનાવશે.

પ્રથમ વર્ષે 10 લાખ સ્કૂટર્સ વેચવાનો ટાર્ગેટ
વિશ્વની સૌથી મોટી ટૂ-વ્હીલર મેન્યુફેક્ચરિંગ સુવિધા બનાવવા માટે કંપનીએ 2400 કરોડનું રોકાણ કર્યું છે. ઓલાના આ ઇ-સ્કૂટરની કિંમત હાલના અથર એનર્જી (રૂ. 1.39 લાખ) અને બજાજ ઓટોના ચેતક (રૂ. 1 લાખ) જેવી ઇ-બાઇકને જબરદસ્ત ટક્કર આપશે કારણ કે, કંપની ભારતના ઊભરતા ઇલેક્ટ્રિક ટૂ-વ્હીલર સેગમેન્ટમાં પોતાનું વર્ચસ્વ સ્થાપવા જઈ રહી છે. રિપોર્ટમાં એવું પણ સૂચવવામાં આવ્યું છે કે ઓલા પહેલા વર્ષે જ 10 લાખ ઇ-સ્કૂટર્સ વેચવાની યોજના બનાવી રહી છે.

ઓલા ઇલેક્ટ્રિક સ્કૂટરનાં ફીચર્સ
2 જુલાઇએ જ ભાવિશ અગ્રવાલે ઇલેક્ટ્રિક સ્કૂટર ચલાવતો તેનો વીડિયો ટીઝર રજૂ કર્યો હતો. 56 સેકંડના આ ટીઝરમાં કંપનીએ ઇ-સ્કૂટરનાં ફીચર્સ અને પર્ફોર્મન્સ બતાવ્યાં. તેની ચાલો જાણીએ આ સ્કૂટરનાં ફીચર્સ...

  • ઓલાનું આ ઇલેક્ટ્રિક સ્કૂટર સિંગલ ચાર્જમાં 150 કિમી ચાલશે. તેની ટોપ સ્પીડ 90 કિમી પ્રતિ કલાકની હશે. આ ઇલેક્ટ્રિક સ્કૂટર હોમ ચાર્જર સાથે આવશે. ગ્રાહકો રેગ્યુલર વોલ સોકેટથી આ સ્કૂટર ચાર્જ કરી શકશે. કંપની ઇલેક્ટ્રિક વાહન ગ્રાહકોને દેશભરમાં ચાર્જ કરવામાં કોઈ તકલીફ ન પડે તે માટે એક મોટું ઇલેક્ટ્રિક ચાર્જિંગ નેટવર્ક સ્થાપવાની પણ યોજના બનાવી રહી છે. પ્રથમ વર્ષે ઓલા 100 શહેરોમાં 5000 ચાર્જિંગ પોઇન્ટ સેટ કરશે.
  • સ્કૂટરના ટીઝરને જોતાં સ્પષ્ટ થાય છે કે તેનું મોડેલ બેસ્ટ હશે. તેમજ, સ્પીડની દૃષ્ટિએ તે પેટ્રોલ વાહનો સાથે સ્પર્ધા કરશે. આ ઉપરાંત, તેમાં મોટી બૂટ સ્પેસ આપવામાં આવી છે. ટીઝરમાં બૂટ સ્પેસમાં રાખવામાં આવતા બે હેલ્મેટ મૂકતા બતાવવામાં આવ્યા છે. સામાન્ય રીતે સ્કૂટરની બૂટ સ્પેસમાં ફક્ત એક જ હેલ્મેટની મંજૂરી છે.
  • કંપનીનો દાવો છે કે, સ્કૂટરને ફાસ્ટ ચાર્જરથી 18 મિનિટમાં 50% ચાર્જ થઈ જશે. તેમાં 75 કિમીની રેન્જ મળશે. આ સાથે, આ ઇલેક્ટ્રિક સ્કૂટરમાં સ્માર્ટફોન કનેક્ટિવિટી ફીચર પણ મળશે, જે ઓલા ઇલેક્ટ્રિક એપ્લિકેશન દ્વારા ચાર્જિંગ સ્ટેટસ વિશે રિયલ-ટાઇમ માહિતી આપવામાં મદદ કરશે.