ભાસ્કર વિશેષ / ફાસ્ટ બોલ પર બેલ્સ ન પડવાથી તેને બનાવનાર કંપની હેરાન, કહ્યું- બેલ્સનું વજન તેના માટે જવાબદાર નથી

Director of Zing Bails weighs in his option regarding the ongoing issue in World Cup

  • આ વર્લ્ડકપમાં 5 વાર એવું બન્યું કે જયારે બોલ સ્ટમ્પ પર અડ્યો પણ બેલ્સ પડી જ નહીં
  • ઓસ્ટ્રેલિયા સ્થિત જિંગ બેલ્સના ડાયરેક્ટર ડેવિડ લિગર્ટવુડનું કહેવું છે કે, ભવિષ્યમાં અમે તેમાં બદલાવ કરીશું

Divyabhaskar.com

Jun 12, 2019, 04:20 PM IST

સ્પોર્ટ્સ ડેસ્ક: વર્લ્ડકપ 2019માં 5 વખત એવું બન્યું કે, જયારે બોલ સ્ટમ્પને અડ્યો પરંતુ બેલ્સ પડી જ નહીં. જેના લીધે ખેલાડીને આઉટ આપવામાં આવ્યા નથી. રવિવારે ભારત-ઓસ્ટ્રેલિયા વચ્ચે રમાયેલી મેચની બીજી ઓવરમાં જસપ્રિત બુમરાહની સામે ડેવિડ વોર્નર સ્ટ્રાઈક પર હતો. બુમરાહની બોલિંગમાં બોલ વોર્નરના બેટને અડ્યા બાદ સ્ટમ્પ્સને પણ અડીને નીકળી ગયો હતો. બેલ્સ હલી તો ખરી પણ પડી જ નહીં. મેચ પછી બંને ટીમના કેપ્ટને બેલ્સ વજનદાર હોવાથી આવું થયું છે, તેવું કારણ આપ્યું હતું. પૂર્વ ક્રિકેટર્સે પણ સોશિયલ મીડિયા પર જિંગ બેલ્સને ટ્રોલ કરી હતી. ભાસ્કર એપે આ મુદ્દે આ બેલ્સ બનાવનાર જિંગ કંપનીના ડાયરેક્ટર ડેવિડ લિગર્ટવુડ સાથે વાત કરી હતી. તેમણે કહ્યું કે, વર્લ્ડકપમાં જે થાય છે તેનાથી અમે પણ પરેશાન છીએ. જોકે બેલ્સ ન પડવા પાછળ કારણ ફક્ત તેનું વજન નહીં હોય પરંતુ અન્ય કારણો પણ હશે. લિગર્ટવુડે કહ્યું કે ભવિષ્યમાં આવું ન થાય તે માટે અમે ફેરફાર કરીશું.

વર્લ્ડકપમાં બેલ્સ ન પડે તેવું વધુ માત્રામાં જોવા મળી રહ્યું છે

લિગર્ટવુડે કહ્યું કે, સ્ટમ્પ્સમાં બેલ્સ પડે ન પડે તે રમતનો એક ભાગ છે. જ્યાર સુધી બોલ એક ફોર્સ સાથે સ્ટમ્પને નહીં અડે ત્યાર સુધી બેલ્સ પડશે નહીં. આ જિંગ બેલ્સ સાથે જ નહીં લાકડાની બનેલી બેલ્સ સાથે પણ થાય છે. પહેલા પણ ઘણીવાર આપણે આવું જોયું છે. જોકે આ વર્લ્ડકપમાં આ વધારે જોવા મળી રહ્યું છે. તેનું એક માત્ર કારણ જિંગ બેલ્સનું વજન નથી. તેના અન્ય કારણ પણ હોય શકે, જેમ કે સ્ટમ્પ ગ્રૂવ્સ (બેલ્સને રાખવાની જગ્યા)નો આકાર અને ઊંડાઈ, પીચની સ્થિતિ, સ્ટમ્પમાં લાગેલા કેમેરા વગેરે. તેણે પોતાની કંપનીનો બચાવ કરતા કહ્યું કે, પરીક્ષામાં એ સાબિત થઇ ગયું છે કે બેલ્સનું વજન તેના ન પડવા પાછળનું સૌથી મોટું કારણ નથી.

રમતની માગ હતી હે બેલ્સ સરળતાથી ન પડે

લિગર્ટવુડ કહે છે કે, તે આને રમતની માગ સમજે છે કે બેલ્સ સરળતાથી ન પડે. જેમકે જો બેલ્સનો વજન ઓછો હોય તો તે પવનના લીધે પડી શકે છે. તેવામાં રમત વારંવાર રોકવી પડે અને સમય બગડી શકે છે. તેમજ જો બેલ્સ હલકી હોય તો તે બોલના લાગવાથી તૂટી પણ શકે છે. લિગર્ટવુડના કહેવા મુજબ, જિંગ વિકેટ સિસ્ટમનો ઉપયોગ હજારો મેચમાં થઇ ચૂક્યો છે પરંતુ, પહેલી વાર એવું થયું છે કે આવી ઘટના નિરંતર બની રહી છે. અમે આનું મોનિટરિંગ કરીશું. જરૂર પડી તો ભવિષ્યમાં ફેરફાર પણ કરીશું.

જ્યાર સુધી બેલ્સ ન પડે, ત્યાર સુધી બેટ્સમેનને આઉટ આપવામાં આવશે નહીં

ક્રિકેટના નિયમ 29.1 પ્રમાણે, બેટ્સમેનને ત્યારે જ આઉટ આપવામાં આવશે જયારે બેલ્સ પડશે. જો બોલ લાગવા પર બેલ્સ ન પડે તો બેટ્સમેન નોટઆઉટ રહે છે. આ નિયમમાં એવું પણ કહેવામાં આવ્યું છે કે, જો બોલ લાગવા પર બેલ્સ હલે પણ નીચે ન પડે તો પણ બેટ્સમેનને આઉટ આપવામાં આવશે નહીં.

જયારે બેલ્સ નથી પડી, ત્યારે બોલિંગ ટીમ જ જીતી છે

બેલ્સ ના પડવું એક રીતે બોલિંગ ટીમ માટે ગુડલક સાબિત થઈ રહ્યું છે. જ્યારે-જ્યારે બેલ્સ નથી પડી ત્યારે દર વખતે બોલિંગ ટીમ જ જીતી છે.

  • 1 બોલર: આદિલ રશિદ, બેટ્સમેન: ક્વિન્ટન ડી કોક | ઈંગ્લેન્ડ જીત્યું
  • 2 બોલર: ટ્રેન્ટ બોલ્ટ, બેટ્સમેન: દિમુથ કરુણારત્ને | ન્યુઝીલેન્ડ જીત્યું
  • 3 બોલર: મિચેલ સ્ટાર્ક, બેટ્સમેન: ક્રિસ ગેલ | ઓસ્ટ્રેલિયા જીત્યું
  • 4 બોલર: બેન સ્ટોક્સ, બેટ્સમેન: સૈફુદ્દીન | ઈંગ્લેન્ડ જીત્યું
  • 5 બોલર: જસપ્રિત બુમરાહ, બેટ્સમેન: ડેવિડ વોર્નર | ભારત જીત્યું

આઈસીસીએ 2012માં જિંગ બેલ્સની છૂટ આપી હતી

ઇન્ટરનેશનલ ક્રિકેટ કાઉન્સિલે 2012માં ઇન્ટરનેશનલ મેચોમાં જિંગ બેલ્સનો ઉપયોગ કરવાની છૂટ આપી હતી. જિંગ્સ કંપનીના કહેવા પ્રમાણે, અત્યાર સુધીમાં એક હજાર કરતા વધુ મેચોમાં તેનો ઉપયોગ થઇ ગયો છે. 2015ના વર્લ્ડકપ પછી આ બેલ્સનો ઉપયોગ શરૂ થયો હતો. ત્યારે પણ બોલ અડવા પર બેલ્સ ન પડવાની ઘટનાઓ સામે આવી હતી. જોકે ત્યારે આવું 1-2 વાર જ થયું હતું. ઇન્ટરનેશનલ મેચો સિવાય ભારતની આઈપીએલ અને ઓસ્ટ્રેલિયાની બિગ બેશમાં પણ આ બેલ્સનો ઉપયોગ થાય છે.

X
Director of Zing Bails weighs in his option regarding the ongoing issue in World Cup
COMMENT

Next Stories

    ની  સંપૂર્ણ વાંચનસામગ્રી