લોર્ડ્સમાં શેન વોર્નનું સન્માન:ઇંગ્લેન્ડ-NZ ટેસ્ટની 23મી ઓવરમાં 23 સેકન્ડ સુધી ગેમ સ્થગિત કરાઈ, આ વોર્નનો જર્સી નંબર હતો

લોર્ડ્સમાં ઈંગ્લેન્ડ અને ન્યૂઝીલેન્ડ વચ્ચે રમાઈ રહેલી ટેસ્ટ મેચમાં ઓસ્ટ્રેલિયાના પૂર્વ ખેલાડી શેન વોર્નને શ્રદ્ધાંજલિ આપવામાં આવી હતી. આ માટે, મેચના પહેલા દિવસે 23 ઓવર પછી 23 સેકન્ડ માટે રમત અટકાવવામાં આવી હતી. આ દરમિયાન હાજર દરેક લોકોએ પોતપોતાની જગ્યાએ ઉભા થઈને તાળીઓ પાડી હતી. ગ્રાઉન્ડમાં બિગ સ્ક્રીન પર શેન વોર્નનો એક વીડિયો પણ ચલાવવામાં આવ્યો હતો.

લોર્ડ્સ કોમેન્ટ્રી બોક્સ શેન વોર્ન તરીકે ઓળખાશે
શેન વોર્નને શ્રદ્ધાંજલિ આપવા માટે લોર્ડ્સ ક્રિકેટ ગ્રાઉન્ડે તેના કોમેન્ટ્રી બોક્સનું નામ પણ બદલી નાખ્યું છે. તે હવે 'ધ શેન વોર્ન કોમેન્ટરી બોક્સ' તરીકે ઓળખાશે.

ઓસ્ટ્રેલિયાના પ્રખ્યાત સ્પિનર ​​શેન વોર્નનું 4 માર્ચ 2022ના રોજ 52 વર્ષની વયે અવસાન થયું હતું. તેમના મૃત્યુ બાદ ઈંગ્લેન્ડની ટીમ પહેલીવાર ઘરઆંગણે આંતરરાષ્ટ્રીય મેચ રમી રહી છે. આ અવસરે ખેલાડીઓ સહિત તમામ દર્શકોએ 23 સેકન્ડ સુધી તાળીઓ પાડીને વોર્નને શ્રદ્ધાંજલિ આપી હતી. આ તાળીઓના ગડગડાટથી સમગ્ર લોર્ડ્સ સ્ટેડિયમ ગુંજી ઉઠ્યું હતું.

વોર્ન તેના પ્રિય ફૂટબોલરના સન્માનમાં 23 નંબરની જર્સી પહેરતો હતો.
23 ઓવર પછી રમત રોકવા અને 23 સેકન્ડ સુધી તાળીઓ પાડવા પાછળ ખાસ હેતુ હતો. તમને જણાવી દઈએ કે આ શેન વોર્નનો જર્સી નંબર હતો. ભલે તે ઓસ્ટ્રેલિયા માટે રમી રહ્યો હોય કે પછી લીગ ટીમ માટે. વોર્ન હંમેશા 23 નંબરની જર્સી પહેરતો હતો. શેન વોર્ન પણ IPLમાં રાજસ્થાન રોયલ્સ તરફથી 23 નંબરની જર્સી પહેરીને રમ્યો હતો.

શેન વોર્ને આ જર્સી નંબર તેના બાળપણના આદર્શ ફૂટબોલર ડર્મોટ બ્રેરેટનના સન્માનમાં પહેર્યો હતો અને ત્યારપછી આ નંબર તેની ઓળખ પણ બની ગયો હતો.