T20 લીગ:IPL : ગાંગુલી-શાહ બે નવી ટીમના પક્ષમાં, બોર્ડમાં સર્વસંમતિ નહીં

આઈપીએલ-14 માટે બે નવી ટીમને સામેલ કરવા અંગે બીસીસીઆઈમાં એકમત નથી. અધ્યક્ષ સૌરવ ગાંગુલી અને સચિવ જય શાહ સહિત કેટલાક ટોચના અધિકારી ટીમોને સામેલ કરવા માગે છે, જ્યારે બીજા કેટલાકને શંકા છે. 24 ડિસેમ્બરે મળનારી એજીએમમાં અંતિમ નિર્ણય લેવાશે. બીસીસીઆઈના એક અધિકારીએ જણાવ્યું કે, ‘નવી ટીમને સામેલ કરવા માટે સમય ઘણો ઓછો છે. આટલા ટૂંકા ગાળામાં ટેન્ડર, ખેલાડીઓની હરાજી વગેરે મુશ્કેલ છે.

ટીમ સાથે સંકળાયેલા તમામ સ્ટેકહોલ્ડરને આટલા ઓછા સમયમાં એક પ્લેટફોર્મ પર ભેગા કરવા મુશ્કેલ છે. અમારું માનવું છે કે, નવી ટીમ આઈપીએલ 2022 માટે જોડવી જોઈએ’. લીગની 14મી સિઝન એપ્રિલમાં શરૂ થશે. જુના અધિકારી પણ 2022 પહેલા નવી ટીમ જોડવાના આઈડિયા સાથે સહમત નથી. અધિકારીએ કહ્યું કે, ‘બ્રોડકાસ્ટ ડીલ આઈપીએલ-2021 પછી સમાપ્ત થઈ જશે. ત્યાર પછી ટીમને જોડવાથી બ્રોડકાસ્ટિંગ રાઈટ્સ અને અન્ય કોમર્શિયલ પાર્ટનરશિપથી થતી રકમ પણ આપમેળે વધી જશે.’ બીજા અધિકારીએ કહ્યું કે, 8ના સ્થાને 10 ટીમ થવાથી 94 મેચ થશે.

બેમાંથી એક ટીમ અમદાવાદની હશે
જો બીસીસીઆઈની એજીએમમાં નવી ટીમ ઉમેરવાનો નિર્ણય લેવાશે તો એક ફ્રેન્ચાઈઝી અમદાવાદની હશે. બીજી ટીમ લખનઉ કે કાનપુરની હશે. પુણે પણ રેસમાં છે. રિપોર્ટ્સ મુજબ 9મી ટીમ અદાણી કે સંજીવ ગોયન્કા ગ્રુપઆરપીએસજીની હોઈ શકે છે.