Marvellous Motera:મોટેરાની સુંદરતા પર મોહી ગયા ખેલાડીઓ, સ્ટેડિયમની ભવ્યતા જોઈ વિદેશીઓ પણ આફરીન થયા, હાર્દિક અને પંતે ટ્વીટ કરીને જય શાહને અભિનંદન પાઠવ્યા

ભારત અને ઇંગ્લેન્ડની ટીમ મોટેરા ક્રિકેટ સ્ટેડિયમ ખાતેની પ્રથમ ઇન્ટરનેશનલ મેચ માટે અમદાવાદ આવી ગઈ છે. 1 લાખ 10 હજારની બેઠક ક્ષમતા ધરાવતાં સ્ટેડિયમની મુલાકાત લીધા બાદ ભારત અને ઇંગ્લેન્ડ બંનેની ટીમ સુંદરતા અને ફેસિલિટી પર આફરીન થઈ ગઈ છે. હાર્દિક પંડ્યા, કુલદીપ યાદવ, કેવિન પીટરસન સહિત અનેક લોકોએ સ્ટેડિયમના વખાણ કરતાં ટ્વીટ કરી છે. તેમજ આ બદલ BCCI સેક્રેટરીને જય શાહને અભિનંદન પાઠવ્યા છે.

BCCIએ શેર કરી પ્લેયર્સના રિએક્શન વાળો વીડિયો
હાર્દિકે કહ્યું કે, ફેન્સ સ્ટેડિયમમાં આવે તે પછી કેવો માહોલ હોય તે અનુભવ કરવા માટે હવે અમે રાહ જોઈ શકીએ એમ નથી. જ્યારે ચેતેશ્વર પૂજારાએ કહ્યું કે, આ એક બહુ મોટું સ્ટેડિયમ છે. મોટેરા ખાતે પ્રથમવાર રમવા માટે બહુ ઉત્સુક છીએ. તો ઓપનર મયંક અગ્રવાલે કહ્યું કે, મોટેરામાં પ્રવેશ કરતાં જ સ્ટેન્ડ્સ જોવા, જે રીતે બન્યું છે તે જોવું, એ ફેન્ટાસ્ટિક ફીલિંગ છે. શુભમન ગિલે જિમના વખાણ કરતાં કહ્યું કે, આ બહુ મોટું અને સ્પેસવાળું જિમ છે. અહીંની ફેસિલિટી પણ બહુ સારી છે.

હાર્દિકે કહ્યું કે, વર્લ્ડના સૌથી મોટા ક્રિકેટ સ્ટેડિયમમાં ઉભું રહેવું એક અલગ જ અનુભવ છે. આ એકદમ મેગ્નિફિસિયન્ટ છે. તેણે આ લખીને જય શાહને ટેગ કર્યા. જ્યારે ઋષભ પંતે લખ્યું કે, અમદાવાદમાં ક્રિકેટ માટેની આવી વર્લ્ડ ક્લાસ ફેસિલિટી જોઈને સારું લાગ્યું. 24 તારીખે અહીં મેચ રમવા માટે ઉત્સુક છું.

તો બીજી તરફ, ઇંગ્લેન્ડના ફાસ્ટ બોલર સ્ટુઅર્ટ બ્રોડે વીડિયો શેર કરીને કહ્યું કે, વર્લ્ડના સૌથી મોટા ક્રિકેટ સ્ટેડિયમનો ફર્સ્ટ લુક. 1 લાખ 10 હજારની બેઠક ક્ષમતા બહુ ઈમ્પ્રેસીવ લાગી. જ્યારે પૂર્વ ઇંગ્લિશ બેટ્સમેન કેવિન પીટરસને કહ્યું કે, આ સ્ટેડિયમ કેટલું અદ્ભૂત લાગી રહ્યું છે. 1 લાખ 10 હજારની બેઠક ક્ષમતા છે. આ એક થિએટર ઓફ ડ્રિમ્સ છે!

મોટેરા મોદીનું વિઝન છે
સ્ટેડિયમ વિશે વાત કરતાં ગુજરાત ક્રિકેટ એસોસિયેશનના વાઇસ-પ્રેસિડન્ટ પરિમલ નથવાણીએ ભાસ્કરને થોડા સમય પહેલાં ઇન્ટરવ્યુમાં કહ્યું હતું કે અમે ત્યારના ગુજરાત ક્રિકેટ એસોસિયેશનના તત્કાલીન પ્રેસિડેન્ટ અને હાલના પ્રધાનમંત્રી નરેન્દ્ર મોદીને જૂના અર્ધા સ્ટેડિયમને ડિમોલિશ કરીને રિનોવેટ કરવાની વાત કરી હતી. જોકે તેમનું વિઝન તદ્દન જુદું હતું. તેમણે મને પૂછ્યું કે સ્ટેડિયમને કેટલો સમય થઇ ગયો છે? મેં કહ્યું, 25 વર્ષથી વધુ સમય વીતી ગયો છે. તો તેમણે કહ્યું, સ્ટેડિયમને અર્ધું તોડીને રિનોવેટ કરવાનો કોઈ અર્થ નથી.

મોદીનું ડ્રીમ હંમેશાં નંબર 1 બનવાનું રહ્યું છે. મોદીએ અમને કહ્યું હતું, વર્લ્ડના કયાં કયાં સ્ટેડિયમ સૌથી મોટાં છે? અમે કહ્યું, મેલબર્ન ક્રિકેટ ગ્રાઉન્ડ, બ્રિસ્બેન અને સિડનીનાં સ્ટેડિયમ છે તેમજ અમે તેમને કહ્યું હતું કે તમે કહેશો એ પ્રમાણે મોટામાં મોટું સ્ટેડિયમ બનાવીશું. તો તેમણે કહ્યું હતું બનાવવું જ હોય તો આપણે વર્લ્ડનું સૌથી મોટું સ્ટેડિયમ બનાવીએ અને અમને 1 લાખથી વધુની બેઠક ક્ષમતાવાળું બનાવવા કહ્યું હતું. એ દરમિયાન અત્યારે ભારતના ગૃહમંત્રી અમિત શાહ ગુજરાત ક્રિકેટના પ્રેસિડેન્ટ બન્યા હતા. તેમનું પણ એ જ ડ્રીમ હતું અને તેમણે કહ્યું હતું કે 'સાહેબે કીધું છે 1 લાખ તો આપણે 1 લાખને 10 હજારની ક્ષમતાવાળું સ્ટેડિયમ બનાવીએ.'