બર્ડ ફ્લૂનો કહેર:ઝાબુઆના જે પોલ્ટ્રી ફાર્મમાંથી ધોનીએ 2 હજાર કડકનાથ ચિકનનો ઓર્ડર કર્યો હતો ત્યાં બર્ડ ફ્લૂની પુષ્ટિ થઈ

મધ્યપ્રદેશના ઝાબુઆ જિલ્લામાં બર્ડ ફ્લૂ સંક્રમણની પુષ્ટિ થઈ છે. થાન્દલા પાસે રુંડીપાડામાં એક પોલ્ટ્રી ફાર્મમાંથી ચાર દિવસ પહેલાં જ ભોપાલ મોકલવામાં આવેલાં એક કડકનાથ ચિકનમાંથી એકનો સેમ્પલ રિપોર્ટ સામે આવ્યો છે. એ સિવાય પ્રદેશના અન્ય 18 જિલ્લામાં જંગલી પક્ષીઓમાં એચ5એન8ની પુષ્ટિ થઈ છે. ઉલ્લેખનીય છે કે પૂર્વ ભારતીય કેપ્ટન મહેન્દ્ર સિંહ ધોનીએ આ ફાર્મમાંથી જ કડકનાથનાં 2 હજાર ચિકનનો ઓર્ડર કર્યો હતો. વાતાવરણ ક્લિયર થાય એ પછી એને રાંચી પહોંચાડવાનાં હતાં.

રિપોર્ટ આવ્યા પછી જિલ્લાના પશુપાલન વિભાગના અધિકારીઓ જિલ્લામાંથી પોલ્ટ્રી ફાર્મમાં પહોંચ્યા હતા. એક કિલોમીટરના વિસ્તારમાં પક્ષીઓનો નિકાલ શરૂ થયો. આ વિસ્તારની તમામ મરઘીઓને એનેસ્થેસિયા આપીને મારવામાં આવી હતી અને ત્યાર બાદ તેમને ઊંડા ખાડામાં દફનાવવાની કામગીરી શરૂ કરવામાં આવી.

ફાર્મ-સંચાલકના જણાવ્યા અનુસાર, તેમના ફાર્મમાં છેલ્લા 4-5 દિવસમાં 1.5 હજારથી વધુ મુરઘીનાં મોત થયાં હતાં. આ ફાર્મમાં 550 કડકનાથ અને લગભગ 2800 ચિકન હતાં. પશુ-ચિકિત્સા વિભાગના અધિકારીઓ અને તહેસિલની ટીમ બધાને નષ્ટ કરવા માટે લઈ ગઈ છે.

પશુપાલન વિભાગના નાયબ નિયામક વિલ્સન ડાવરે જણાવ્યું હતું કે એ વિભાગની ટીમ સાથે રુંદીપાડા ગામમાં પહોંચી ગયા છે. ઉલ્લેખનીય છે કે મહેન્દ્ર સિંહ ધોનીએ આ ફાર્મમાંથી જ કડકનાથનાં 2 હજાર ચિકનનો ઓર્ડર કર્યો હતો. વાતાવરણ ક્લિયર થાય એ પછી તેમને રાંચી પહોંચાડવાનાં હતાં.