સિનિયર પ્લેયરની દરિયાદિલી:પોલાર્ડ રન આઉટ થઈ જતાં સૂર્યકુમાર નિરાશ થઈને મેદાન પર જ બેસી ગયો, પોલાર્ડે જોડે જઈ પ્રોત્સાહિત કર્યો, વીડિયો વાઈરલ

રોહિત શર્માની આગેવાની હેઠળની મુંબઈ ઈન્ડિયન્સને બુધવારે રાત્રે પંજાબ કિંગ્સ સામે 12 રને હારનો સામનો કરવો પડ્યો હતો. આ સિઝનમાં મુંબઈની આ પાંચમી હાર છે. સતત ટૂર્નામેન્ટમાં હારતી રહેલી મુંબઈની ટીમ પંજાબ સામેની મેચમાં વિખરાયેલી જોવા મળી હતી. જસપ્રિત બુમરાહ સિવાયના દરેક બોલરનું પ્રદર્શન ખાસ રહ્યું ન હતું. ત્યાર પછી બેટિંગ દરમિયાન 2 રન આઉટ જેણે મુંબઈની હારમાં મહત્વની ભૂમિકા ભજવી હતી. આશ્ચર્યની વાત એ છે કે આ બંને રન આઉટ વખતે સૂર્યકુમાર યાદવ મેદાન પર હાજર હતો.

અર્શદીપની 13મી ઓવર દરમિયાન સૂર્યકુમાર યાદવે લેગ-સાઇડ શોટ માર્યો, પરંતુ બોલ સીધો મયંક અગ્રવાલના હાથમાં ગયો. સૂર્યકુમાર યાદવ અહીં રન લેવા માંગતો ન હતો, પરંતુ નોન-સ્ટ્રાઈકર છેડે હાજર તિલક વર્માએ કોઈ પણ જાતના કોલ વગર દોડવાનું શરૂ કર્યું. આ દરમિયાન બંને ખેલાડીઓના તાલમેલમાં ખલેલ પડી હતી અને તિલક વર્મા રનઆઉટ થઈને પેવેલિયન પરત ફર્યો હતો. આ યુવા ખેલાડી રન આઉટ થતા પહેલા શાનદાર બેટિંગ કરી રહ્યો હતો. તેણે 20 બોલમાં 3 ચોગ્ગા અને 2 છગ્ગાની મદદથી 36 રન બનાવ્યા હતા.

કિરન પોલાર્ડ પણ ધીમી રનિંગને કારણે રન આઉટ થયો
બીજો રન આઉટ કિરોન પોલાર્ડનો હતો. આ ઘટના 17મી ઓવરના પહેલા બોલ પર બની હતી. પોલાર્ડ વૈભવ અરોરાના બોલ પર લોંગ ઓન તરફ શોટ રમે છે અને તે રન લેવાનું શરૂ કરે છે. અચાનક તેણે જોયું કે ત્યાં હાજર ઓડિયન સ્મિથે મિસફિલ્ડ કરી જેનો તે લાભ લેવા માંગતો હતો. વધુ એક રનના લોભમાં પોલાર્ડ રન આઉટ થયો હતો.

જ્યારે એક ખેલાડી બીજા છેડે બે અન્ય ખેલાડીઓને રન આઉટ થતા જુએ છે, ત્યારે તે ખૂબ જ હતાશ થઈ જાય છે અને મોટાભાગે પોતાને દોષી ઠેરવે છે. જેના કારણે તેનો આત્મવિશ્વાસ પણ ઓછો થવા લાગે છે. સૂર્યકુમાર યાદવ પણ આવી જ સ્થિતિમાં હતો. પરંતુ આ દરમિયાન કિરોન પોલાર્ડે તેને પ્રોત્સાહિત કર્યો અને મેચ જીતવા માટે પ્રેરણા આપી.

પોલાર્ડના રન આઉટ થયા બાદ સૂર્યકુમાર મોઢું લટકાવીને જમીન પર બેસી ગયો. ત્યારબાદ આ કેરેબિયન ખેલાડીએ પેવેલિયન પરત ફરતા પહેલા તેને પ્રોત્સાહિત કર્યો હતો. પોલાર્ડ જ્યારે આઉટ થયો ત્યારે સૂર્યકુમાર 19 બોલમાં 22 રન બનાવીને ક્રીઝ પર હાજર હતો. આ પછી સૂર્યકુમારે કેટલાક શાનદાર શોટ્સ રમ્યા પરંતુ તે ટીમને જીત અપાવી શક્યા નહીં. સૂર્યકુમાર 30 બોલમાં 43 રન બનાવીને આઉટ થયો હતો.