ઈચ્છાપોર-સાયણ રોડ પર શ્રમિકો ભરેલો ટેમ્પો પલટી જતાં 8ને ઈજાઓ પહોંચી

સુરતઃસુરત જિલ્લામાં ડાંગર કાપવાની મજૂરી કામ સાથે જોડાયેલા શ્રમિકોનો ટેમ્પો પલટી મારી ગયો હતો. નવસારી જવા નીકળેલા શ્રમિકોનો ટેમ્પો ઈચ્છાપોર સાયણ રોડ પરથી પસાર થઈ રહ્યો હતો એ દરમિયાન પલટી મારી જતાં ટેમ્પોમાં સવાર 10માંથી 8 શ્રમિકોને વધતી ઓછી ઈજાઓ પહોંચી હતી. એક્સિડન્ટ અંગે 108 અડાજણ લોકેશનની ગાડીને જાણ થતાં એમ્બ્યુલન્સમાં તમામ ઈજાગ્રસ્તોને સિવિલ હોસ્પિટલ ખસેડવામાં આવ્યાં હતાં. બિહારના નિવાસી તમામ શ્રમિકો છેલ્લા ત્રણ ચાર મહિનાથી સુરત જિલ્લામાં ડાંગર કાપવાનું કામ કરી રહ્યા છે અને આજે તમામ મિત્રો સાથે નવસારી જવા માટે નીકળ્યાં હતાં.