બાળ સ્મશાન ગૃહમાં માસુમોના અવશેષોને કૂતરા ફાડી ખાય છે, દારૂડીયા મહેફિલો કરે છે

ભાવનગર: શહેરમાં કુંભારવાડાના મુખ્ય સ્મશાનની પાછળ બાળકો માટે સ્મશાન આવેલું છે. આ બાળ સ્મશાનને ફરતે કોઇ રક્ષણ માટે વંડી, દિવાલ કે ફેન્સિંગ પણ નથી. આ સંજોગોમાં આજુબાજુના વિસ્તારના રેહવાસીઓએ બળાપો કાઢતા જણાવ્યું હતું કે દિવસે જે લોકો બાળકની લાશને દફનાવી જાય છે તે જ લાશ આ કોઇ ફેન્સીંગ કે દીવાલ વગરની જમીનમાં કૂતરાઓ આવીને દફનાવેલી લાશને બહાર ખેંચી જાય છે. આથી જ આ સ્થળે કેટલાય કૂતરાઓ 24 કલાક અડિંગો જમાવીને બેઠા રહે છે. આ સ્મશાનમાં દફન કરેલા માસુમોના શરીરને કૂતરાઓ બહાર કાઢી ફાડી ખાય છે. તો આ અવાવરૂ જેવી જગ્યામાં દારૂડિયાઓ રોજ રાત્રે મહેફિલ જમાવી દારૂ, જુગાર જેવા અનેક અસામાજિક કૃત્યો આચરે છે. જેથી આ સ્મશાનમાં ઠેર ઠેર દારૂની બોટલો જોવા મળે છે. આમ મોત બાદ બાળકોની લાશનો મલાજો પણ જળવાતો નથી.