Back કથા સરિતા
નીરવ પંચાલ

નીરવ પંચાલ

સ્પોર્ટ્સ (પ્રકરણ - 31)
લેખક યુવા ટેક્નોક્રેટ છે અને ‘દિવ્ય ભાસ્કર’માં ખેલકૂદ પર લખે છે.

અનેક ઐતિહાસિક ઘટનાઓથી સભર દાયકો

  • પ્રકાશન તારીખ23 Dec 2019
  •  
સ્પોર્ટ્સ- નીરવ પંચાલ
આ વર્ષ અને આ દાયકાને પૂરું થવાને હવે એક પખવાડિયાથી પણ ઓછો સમય રહ્યો છે. સ્પોર્ટ્સના સંદર્ભે આ દાયકામાં જે નવાં પરિવર્તનો આવ્યાં, રેકોર્ડ તૂટ્યા, વિવાદો સર્જાયા કે પછી ખેલાડીઓએ સ્પોર્ટ્સને અલવિદા કીધું હોય એ બધું ય કોઈ રોમાંચક ઘટનાઓથી ઓછું નથી. 2011 આઈસીસી વર્લ્ડકપ ઇવેન્ટ જીતવાનો ઉન્માદ હોય કે લંડન ઓલિમ્પિક્સ - આપણે અનેક ઐતિહાસિક ઘટનાઓના સાક્ષી રહ્યા.
મજાની વાત એ છે કે 2010ના પ્રારંભમાં પણ ભારતીય સ્પોર્ટ્સ માટે એક ઉજ્જ્વળ તક હતી અને હવે 2020માં પણ 2010ની જેમ એવા ત્રિભેટે ઊભા છીએ જ્યાંથી આગળ જવું કે પછી ભૂલોમાંથી શીખવાને બદલે એની એ જ ભૂલો દોહરાવ્યા કરવી એ આપણી પર નિર્ભર રહેશે. 2010 કોમનવેલ્થમાં ભારતે રેકોર્ડ બ્રેકિંગ 101 મેડલ જીત્યા હતા, પરંતુ તેના મિસમેનેજમેન્ટને કારણે કોમનવેલ્થ ગેમ્સ મેડલ્સના લીધે ઓછો અને ભ્રષ્ટાચારને કારણે વધુ યાદ રહ્યો છે.
2008 ઓલિમ્પિકમાં ભારતે 3 મેડલ જીત્યા હતા, જે 2012 લંડન ઓલિમ્પિક્સમાં બમણા થઈને 6 થયા. ત્યારથી ઓલિમ્પિક્સમાં ભારતનું નસીબ ચમકશે એવી આશા બંધાઈ ગઈ હતી. 2016માં રિયો ઓલિમ્પિક્સમાં ઓછામાં ઓછા 12 મેડલ જીતીશું એવી ધારણા હતી, પરંતુ 122 એથ્લીટ્સે માંડ 2 મેડલ જીત્યા અને ભારતનો નંબર મેડલ ટેલીમાં 67મા ક્રમાંકે આવ્યો. 2020માં જોકે એક તક છે, જેમાં ભારતના શૂટર્સે પોતાના શાનદાર પ્રદર્શનથી મેડલ જીતી શકવાની તક સર્જી છે. એ સિવાય બેડમિન્ટન, બોક્સિંગ અને રેસલિંગમાં પણ તાજેતરમાં સારાં પરિણામોને કારણે મેડલ ટેલી ડબલ ડિજિટમાં પહોંચે એવી શક્યતાઓ સર્જાઈ છે.
ક્રિકેટમાં ઓલિમ્પિક કરતાં વધુ સારું પ્રદર્શન રહ્યું. 2010માં ભારત ટેસ્ટ રેન્કિંગમાં 1 નંબર પર હતી, જ્યારે 2019માં પણ ટેસ્ટ રેન્કિંગમાં અત્યારે નંબર એક પર છે. લિમિટેડ ઓવર્સ ફોર્મેટમાં 2011નો વર્લ્ડ કપ જીત્યા પછી 2013ની ચેમ્પિયન્સ ટ્રોફી પણ ભારતે જીતી. ત્યારબાદ ભારતની ટીમ 2015 વર્લ્ડકપ, 2017 ચેમ્પિયન્સ ટ્રોફી અને 2019 વર્લ્ડકપમાં સેમી ફાઇનલ અને ફાઇનલ મેચ સુધી પહોંચ્યા બાદ ટ્રોફી જીતવામાં 3 વાર નિષ્ફ‌ળ રહી. હવે છેક 2023ના વર્લ્ડકપ સુધી રાહ જોવી એ ફરજિયાત છે.
2020નું વર્ષ ને દાયકો ભારતીય સ્પોર્ટ્સ માટે ખૂબ અગત્યના છે એ કહેવું અતિશયોક્તિભર્યું નથી. દુનિયામાં ગ્લોબલ પાવર બનવું એ માત્ર ઇકોનોમિક્સ કે વસ્તી પર આધારિત નથી, ખેલકૂદ ઇત્યાદિ પર પ્રભુત્વ મેળવવું પણ એટલું જ અગત્યનું છે.
[email protected]
x
રદ કરો

કલમ

TOP