વુમનોલોજી- મેઘા જોશી / બળાત્કાર, બળાત્કારી અને પીડિતા : એક આંકડો ઉમેરાયો

article by megha joshi

Divyabhaskar.com

Dec 10, 2019, 07:46 PM IST
વુમનોલોજી- મેઘા જોશી
ફરી એક આંકડો ઉમેરાયો. સમગ્ર વિશ્વમાં કુલ વસ્તીમાંથી સાત ટકા મહિલાઓ હિંસા અને જાતીય શોષણનો ભોગ બને છે. અમુક રાષ્ટ્રમાં તો સ્ત્રી પર થતી હિંસા અને બળાત્કારનો રેશિયો તેના જીડીપીના 3.7 ટકા જેટલો છે. નેશનલ ફેમિલી હેલ્થ સર્વે અનુસાર, ભારતમાં 15થી 50 વર્ષની વયમર્યાદામાં 30 ટકા સ્ત્રીઓ હિંસા અને શોષણનો ભોગ બને છે અને દર વર્ષે ‘કેસ’ની સંખ્યા વધતી જ જાય છે. જાતીયતા અંગેની પિતૃસત્તાક માનસિકતા અને સામાજિક નિયમો અમાનુષી વર્તનને સાથ આપે છે. સામાજિક માળખું અને તેની અસમાનતા ભારતીય સ્ત્રીની એવી વાસ્તવિકતા છે જેનો સંપૂર્ણ સ્વીકાર શક્ય નથી અને અસ્વીકાર કરવો એ ઉપાય નથી. દર એક લાખની વસ્તી દીઠ નોંધાયેલ બળાત્કાર 6.3 ટકા છે. અલબત્ત, દેશની રાજધાની દિલ્હીમાં અંદાજે 23 ટકાનો આંકડો છે. વર્ષ 2012માં સામૂહિક બળાત્કારનો ભોગ બનેલ એક છોકરીનાં મૃત્યુએ ઘણી ઊંઘ ઉડાવી. જન આક્રોશે પોલીસ અને ન્યાયતંત્રને દોડતાં કર્યાં, ફાસ્ટ કોર્ટ અને ફાંસીની સજા માટે વિનંતીઓ, અરજીઓ અને સલાહો અપાઈ. રાજસ્થાન, જમ્મુ-કાશ્મીર, અરુણાચલ પ્રદેશમાં 12 વર્ષથી નાની કન્યા પરના બળાત્કારીઓને મૃત્યુદંડ પણ આપવામાં આવ્યા, પરંતુ ‘પીડિતા’ નામની ફાઈલ વધી. બળાત્કાર અને હિંસા બાદ જીવિત અથવા મૃત મહિલાઓના વર્ગીકરણ થયાં, એ અંગે સંશોધનપત્રો રજૂ થયા, કાયદા મજબૂત કરવા હિમાયત થઇ, મહિલાને સશક્ત કરવા કરોડો રૂપિયાનું બજેટ સેટ થયું, તે છતાં આંકડા તો વધ્યા જ. ભારતમાં લગભગ 31 ટકા સ્ત્રીઓ પતિ અને પરિવાર દ્વારા શારીરિક, જાતીય અને સાંવેગિક હિંસાનો ભોગ બને છે. એનો સીધો અર્થ એ કે આરોપીને પકડવા માટે પોલીસે કે સમાજે જરૂર છે ફક્ત આરોપીને ઓળખીને સજા આપવાની. પણ આ ઘરની વાત છે, સ્ત્રીની અને એમાં પણ જાતીય અંગોની વાત છે. એટલે એને ઢાંકવી સારી. એક સમય હતો, બળાત્કાર શબ્દ બોલવામાં પણ ડર લાગતો કે શરમ આવતી. છાપામાં દુષ્કર્મ વંચાઈ ગયું હોય તો પણ નજર ફેરવી લેતાં, પણ હવે અમે સશક્ત થઇ ગયાં છીએ. બળાત્કારના ફોટા જોઈએ, સોશિયલ મીડિયા પર પ્રોફાઈલ ફોટા બનાવીએ, એ વિશે બિન્દાસ્ત લેખ લખીએ છીએ. બળાત્કાર શબ્દ અને વિષય હવે કોમન થઇ ગયો છે. અમે દિલ્હીની છોકરીને નિર્ભયા કહી, કાશ્મીરની છોકરીને વિધર્મી દીકરી કહી, બિહારની બિચારી, ઓરિસ્સાની અબળા અને ગુજરાતની ગરીબડી માટે જીવ બાળ્યા છે.
જઘન્ય ગુનો થઇ જાય, એનો કરુણ અંજામ આવે તે પછી આક્રોશ અને કરુણા સિવાય કંઈ રહેતું નથી. ગુનેગારોને સજા તાત્કાલિક, વધુ ક્રૂર રીતે કે જાહેરમાં સજા થાય એવું બોલીને થોડી શાતા મળે છે, પરંતુ જ્યારે ખુદના જીવન કે પરિવારની વાત આવે છે ત્યારે એ જાહેર ન થાય એની તકેદારી રખાય છે. હૈદરાબાદની ડોક્ટર યુવતી કે એ પહેલાં દુષ્કર્મનો ભોગ બની જીવન ગુમાવનાર છોકરીના આત્માની શાંતિ માટે પ્રાર્થના કરવી હોય, તો પહેલ પોતાનાંથી જ કરો. અસ્વીકૃત વર્તનનો વિરોધ, ઘરમાં દીકરાને હોર્મોન અને સેક્સ એજ્યુકેશન અને પરંપરાને નામે લૈંગિક અસમાનતાને કારણે સ્ત્રીને થતા અન્યાયનો વિરોધ કરવો આપણા હાથમાં જ છે.
X
article by megha joshi

Next Stories

    ની  સંપૂર્ણ વાંચનસામગ્રી