તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

2019 આવ્યું, શું શું લાવ્યું?

3 વર્ષ પહેલા
  • કૉપી લિંક

જુઓને, આપણે ઊઘડતા વર્ષના પહેલાં જ મહિનાથી ફિલ્મો જોવામાં બિઝી થઈ જવાના છીએ. જાન્યુઆરીમાં ચાર-ચાર ઇન્ટરેસ્ટિંગ ફિલ્મો ત્રાટકવાની છે. આવતા શુક્રવારે ભૂતપૂર્વ વડાપ્રધાન મનમોહનસિંહના જીવન પર આધારિત ‘ધ એક્સિડેન્ટલ પ્રાઇમ મિનિસ્ટર’ અને 2016માં થયેલી સર્જિકલ સ્ટ્રાઇક પર આધારિત ‘ઉરી’.

 

ત્યાર બાદ મહિનાના છેલ્લા શુક્રવારે, પચીસમીએ, અતિ લોકપ્રિય મહારાષ્ટ્રીયન નેતા બાળાસાહેબ ઠાકરેના જીવન પર આધારિત ‘ઠાકરે’ તેમજ ઝાંસીની રાણી લક્ષ્મીબાઈની પરાક્રમગાથા વર્ણવતી ‘મણિકર્ણિકા’. આ ચારમાંથી એકેયને મિસ કરવાનું મન થતું નથી! અનુપમ ખેર અને નવાઝુદ્દીન સિદ્દિકીને ટાઇટલ રોલમાં ચમકાવતી અનુક્રમે ‘ધ એક્સિડેન્ટલ પ્રાઇમ મિનિસ્ટર’ અને ‘ઠાકરે’નાં ટ્રેલર રિલીઝ થતાંની સાથે જ વિવાદ ફાટી નીકળ્યો છે. ડો. મનમોહનસિંહ આજની તારીખે કડેધડે છે અને બાળાસાહેબ ઠાકરે હજુ હમણાં સુધી આપણી વચ્ચે હતા. સમકાલીન પાત્રોને કેન્દ્ર બનાવીને ફિલ્મ, નાટક કે ટીવી સિરીઝ બનાવવાં સહેલાં નથી. વિકી કૌશલની કરિયર એટલી ઇન્ટરેસ્ટિંગ રીતે આગળ વધી રહી છે કે ‘ઉરી’ના સોલો હીરો તરીકે એ કેવીક કમાલ કરી શકે છે તે જોવાની મજા આવશે.


ફેબ્રુઆરીમાં આહા! આપણી સુપર ફેવરિટ ઝોયા અખ્તરની ફિલ્મ ‘ગલી બોય’ આવશે. ટાઇટલ રોલમાં કોણ છે? રણવીર સિંહ. તમે જરા આ જુવાનિયાનો ઝગમગતો બાયોડેટા જુઓ. સંજય ભણસાલીથી લઈને રોહિત શેટ્ટી સુધી અને આદિત્ય ચોપડાથી લઈને કરણ જોહર સુધીના બોલિવૂડના તમામ ટોપ ફિલ્મમેકર્સની પહેલી પસંદ જાણે આ એક જ છે - રણવીર સિંહ!

 

‘સિમ્બા’ જેવી સોલિડ મસાલા ફિલ્મ કરતાં તદ્દન જુદો મિજાજ ધરાવતી ‘ગલી બોય’ મુંબઈના અસલી રેપર (એટલે કે આર-એ-પી રેપ સોંગ્સ બનાવનારા) અન્ડરડોગની અસલી કહાણી પર આધારિત છે. આ ફિલ્મમાં આપણને પહેલી વાર આલિયા ભટ્ટ અને રણવીર સિંહની જોડી જોવા મળશે. આ જ વર્ષે રણવીરની બીજી બે અતિ મહત્ત્વાકાંક્ષી ફિલ્મો પણ આવશે. એક છે, કરણ જોહરના ડિરેક્શનમાં (અને ‘બાહુબલિ’ના પ્રભાવમાં) બની રહેલી ઐતિહાસિક ફિલ્મ ‘તખ્ત’ અને બીજી છે, કપિલ દેવની બાયોપિક ‘એઇટી-થ્રી’. કરણ જોહરે પોતાની ટિપિકલ સ્ટાઇલમાં કહ્યું છે કે, ‘તખ્ત’ એટલે સમજોને કે એ મોગલ કાળની ‘કભી ખુશી કભી ગમ’! ‘તખ્ત’માં વિકી કૌશલ, આલિયા ભટ્ટ, અનિલ કપૂર અને જ્હાન્વી કપૂર પણ છે. ઇન્ટરેસ્ટિંગ!


કરણ જોહરના ધર્મા પ્રોડક્શન હેઠળ બની રહેલી બીજી સુપર-એમ્બિશિયસ ફિલ્મ એટલે ‘બ્રહ્માસ્ત્ર’. સુપર એમ્બિશિયસ એટલા માટે કે એક સુપરહીરો ફિલ્મ છે અને એને ટ્રિલોજીની જેમ ડિઝાઇન કરવામાં આવી છે. મીન્સ કે ફિલ્મની કથા પાર્ટ-ટુ અને પાર્ટ-થ્રી સુધી લંબાશે. ‘સંજુ’ પછી રણવીર કપૂર હવે ‘બ્રહ્માસ્ત્ર’માં દેખાશે. હિરોઇન છે એના અસલી જીવનની ગર્લફ્રેન્ડ, આલિયા ભટ્ટ. ધર્મા પ્રોડક્શન આ વર્ષે ખૂબ બધી ફિલ્મો રિલીઝ કરવાનું છે. ‘સ્ટુડન્ટ ઓફ ધ યર પાર્ટ ટુ’ (ટાઇગર શ્રોફ, નવોદિત તારા સુતરિયા અને અનન્યા ચંકી પાંડે) ઉપરાંત ‘કલંક’ પણ આ જ વર્ષે આવશે. ‘કલંક’ની સ્ટારકાસ્ટ ધ્યાનાકર્ષક છે – સંજય દત્ત, માધુરી દીક્ષિત, વરુણ ધવન, આલિયા ભટ્ટ, સોનાક્ષી સિંહા અને આદિત્ય રોય કપૂર. ડિરેક્ટર? અભિષેક વર્મન.


રણવીરનાં શ્રીમતીજી દીપિકા પદુકોણના શું પ્લાન છે આ વર્ષે? આઇ મીન, રિસેપ્શનો અને હનીમૂનોમાંથી નવરાં પડ્યાં બાદ? દીપિકાની એક હટકે ફિલ્મ આ વર્ષે આવશે. એનું ટાઇટલ છે, ‘છપાક’. ડિરેક્ટર, મેઘના ગુલઝાર. લક્ષ્મી અગરવાલ નામની યુવતી પર એના ઘવાયેલા પ્રેમીએ કેવી રીતે એસિડથી એટેક કર્યો હતો અને કુરૂપ થઈ ગયા પછી પણ લક્ષ્મી કેવી રીતે હિંમતભેર જીવનમાં આગળ વધી એની આ અસલી પ્રેરણાદાયી કહાની આ ફિલ્મમાં જોવા મળશે. બ્રિલિયન્ટ સબ્જેક્ટ. વન્ડરફુલ ચોઇસ. વિક્રમ મેસી ઘવાયેલા પ્રેમીના રોલમાં દેખાશે.  
દીપિકાની કટ્ટર હરીફ કંગના આ વર્ષે  ‘મણિકર્ણિકા’ ઉપરાંત રાજકુમાર રાવ સાથે પણ ચમકશે. ફિલ્મનું ટાઇટલ જેટલું ઇન્ટરેસ્ટિંગ છે એટલું જોખમી પણ છે, ‘મેન્ટલ હૈ ક્યા’! ન કરે નારાયણ પણ ફિલ્મ ધારો કે ન ચાલી તો ટ્રોલિયાઓને (એટલે કે સોશિયલ મીડિયા પર ટ્રોલ કરનારાઓને) જલસો પડી જશે અને કંગનાનું આવી બનશે.   

 

આ ફિલ્મી વર્ષ પણ 2018ની માફક મસ્ત મજાનું જશે એવા પૂરેપૂરા આસાર છે. બે તેજસ્વી ગુજરાતી ફિલ્મમેકર આ વર્ષે બોલિવૂડમાં ગ્રાન્ડ એન્ટ્રી કરશે

સલમાન ખાન આ વર્ષે એક કોરિયન ફિલ્મ આધારિત એવી ‘ભારત’ લઈને આવશે. પહેલાં આ ફિલ્મમાં પ્રિયંકા ચોપરા હિરોઇન બનવાની હતી. લગ્નનું ખરું કારણ હોય કે રામ જાણે, પણ એની જગ્યાએ પછી કેટરીના કૈફ ગોઠવાઈ ગઈ. ‘ભારત’માં સલ્લુભાઈના ફેનલોકોને જલસો પડશે એવું અત્યારે તો લાગે છે. કેટરીના ‘એબીસીડી-થ્રી’માં પણ દેખાશે વરુણ ધવન સાથે. કેટરીનાની ઉંમર થઈ, પણ એ હજુય ઝનૂનથી બોલિવૂડની રેસમાં દોડી રહી છે. 2018માં ત્રણેય સુપરસ્ટાર ખાન સાથે એની એક-એક ફિલ્મ રિલીઝ થઈ. બોલિવૂડની કોઈ પણ હિરોઇન માટે આ બહુ મોટી વાત ગણાય, પણ બુંદિયાળ કેટરીનાનાં બદનસીબ જુઓ. ‘રેસ’, ‘ઠગ્સ ઓફ હિન્દોસ્તાન’, ‘ઝીરો’ ત્રણેય પિટાઈ ગઈ. જોઈએ, કેટરીનાનું આ વર્ષ કેવુંક જાય છે.


‘ઝીરો’ના બોક્સઓફિસ પર્ફોર્મન્સથી ડઘાઈ ગયેલા શાહરુખ ખાન આ વર્ષે પોતાના બેનર હેઠળ બની રહેલી ‘બદલા’માં કદાચ ટચૂકડા રોલમાં દેખાશે. સુજોય ઘોષના ડિરેક્શનમાં બની રહેલી આ ફિલ્મમાં અમિતાભ બચ્ચન અને તાપસી પન્નુ મુખ્ય ભૂમિકામાં છે. શું ખાન નંબર થ્રી આમિરનું આ વર્ષ સાવ ખાલી જવાનું છે? હોય કંઈ. આ જ મહિને છવ્વીસમી જાન્યુઆરીએ એમની ‘રૂબરૂ રોશની’ નામની ફિલ્મનું ટીવી પર પ્રીમિયર થવાનું છે. આ એક સરપ્રાઇઝ ગિફ્ટ છે આમિરના ચાહકો માટે. ‘સત્યમેવ જયતે’ ટીવી શોના સુપર ટેલેન્ટેડ કો-ડિરેક્ટર અને રિસર્ચર સ્વાતિ ચક્રવર્તીએ આ ફિલ્મ ડિરેક્ટ કરી છે.


આમિરને ‘દંગલ’માં ડિરેક્ટ કરનાર નીતેશ તિવારી આ વર્ષે ‘છિછોરે’ નામની કોમેડી ફિલ્મ લઈને આવશે. હીરો છે, સુશાંત રાજપૂત અને હિરોઇન શ્રદ્ધા કપૂર. આમિરની વાત કરીએ એટલે ‘લગાન’ના ડિરેક્ટર આશુતોષ ગોવારિકર યાદ આવે, આવે ને આવે જ. આશુતોષ ગોવારિકરને કશુંય નાનું કે સાદું બનાવવામાં રસ જ નથી. એમની ‘કેસરી’ આગલી ફિલ્મોની માફક ભવ્યાતિભવ્ય હોવાની. અક્ષયકુમાર અને પરિણીતિ ચોપરાને ચમકાવતી ‘કેસરી’માં અંગ્રેજો સામેના સ્વાતંત્ર્ય સંગ્રામનું ઓર એક પાનું ખૂલશે. આશુતોષની ઓર એક પિરિયડ ડ્રામા પણ સંભવતઃ આ જ વર્ષે રિલીઝ થશે ‘પાણીપત’. પાણીપતના યુદ્ધ પર આધારિત આ ફિલ્મમાં સંજય દત્ત અને અર્જુન કપૂર દેખાશે. આશુતોષની છેલ્લી ફિલ્મો ધડાધડ ફ્લોપ થઈ છે એટલે એમને એક હિટની સખત જરૂર છે. ‘કેસરી’ અને ‘પાણીપત’ આશુતોષની કમબેક ફિલ્મો બની શકે એમ છે. ટચવૂડ!


આશુતોષની છેલ્લી ફિલ્મ ‘મોંહે-જો-દરો’ના હીરો હૃતિક રોશનને એના ચાહકો સોલિડ મિસ કરી રહ્યા છે. એની ‘સુપર થર્ટી’ નામની ફિલ્મ આ વર્ષે આવશે. તેજસ્વી પણ ગરીબ વિદ્યાર્થીઓનું આઇઆઇટીનું સપનું પૂરું કરવા માટે પોતાની જિંદગી લખી આપનાર બિહારીબાબુ આનંદકુમારના અસલી જીવન પર આ ફિલ્મ આધારિત છે. કમબખ્તી એ થઈ ગઈ છે કે ડિરેક્ટર વિકાસ બહલ ‘મી ટૂ’ મૂવમેન્ટમાં બદનામ થઈ ગયા હોવાથી ફિલ્મની રિલીઝ પાછળ ઠેલાતી જાય છે. વિકાસ બહલના અંગત જીવનનું નૈતિક સ્તર જેવું હોય એવું, પણ આ ફિલ્મ ખૂબ પ્રોમિસિંગ છે એ તો નક્કી.   
બોલિવૂડના બીજા બંગાળી ડિરેક્ટરબાબુની વાત કરીએ તો દિબાકર બેનર્જી ‘સંદીપ ઔર પિંકી ફરાર’ લઈને આવશે. યશરાજની આ કોમડી ફિલ્મમાં અર્જુન કપૂર અને પરિણીતિ ચોપરા લીડ રોલમાં છે. આ બન્નેને પણ હિટની તાતી જરૂર છે.   
લિસ્ટ ખૂબ લાંબું છે અને અફકોર્સ ઘણાં બધાં સ્ટાર્સની આ વર્ષે આવનારી ફિલ્મો વિશે વાત થઈ નથી, પણ આપણે છેલ્લે બે તેજસ્વી ગુજરાતી ડિરેક્ટરોની વાત કરીને ચર્ચાને વિરામ આપીએ. આ વર્ષે ગુજરાતી ફિલ્મ ઇન્ડસ્ટ્રીના બે યુવા ફિલ્મમેકરો બોલિવૂડમાં એન્ટ્રી કરી રહ્યા છે – અભિષેક જૈન (‘કેવી રીતે જઈશ?’, ‘બે યાર’) અને મિખિલ મુસળે (‘રોંગસાઇડ રાજુ’). અભિષેકની ફિલ્મમાં કાર્તિક આર્યન અને જેક્લિન ડિસોઝા મુખ્ય રોલમાં છે, જ્યારે મિખિલની ‘મેડ ઇન ચાઇના’માં રાજકુમાર રાવ અને મૌની રોય લીડ કરે છે. ઓલ ધ બેસ્ટ, બોય્ઝ! ⬛shishir.ramavat@gmail.com

અન્ય સમાચારો પણ છે...