‘બુધવારની બપોરે’ અને ‘એન્કાઉન્ટર’ જેવી કોલમોથી જાણીતા હાસ્યકાર અશોક દવે વરિષ્ઠ હાસ્યકારોમાં સમાવિષ્ટ છે.

મળી ગયો છે, નસકોરાંનાશક ઉપાય!

  • પ્રકાશન તારીખ18 Apr 2019
  •  

રોજ ખૂન કરવું હોય અને થાય નહીં, એવી દયાજનક પરિસ્થિતિ એટલે બાજુમાં સૂતેલા વરજીનાં આખી રાત ચાલતાં તોતિંગ નસકોરાં. પથારીમાં અડધા ઊભા થઈ જઈને ઘસઘસાટ ઊંઘતા ગોરધન સામે જોઈને ખૂન્નસ તો આવે અને કાયદો છૂટ આપતો હોય તો ‘એક ખૂન માફ’ના ધોરણે એનું ગળું દબાવી દેવાનાં ઝનૂનો ઊપડે, પણ એ થઈ શકતું નથી. ટેક્નિકલી તો ગળું નહીં, ગોરધનનું નાક દબાવી દેવું જોઈએ, પણ મગજની નસ તો સવારે ફાટી જાય જ્યારે સાલો કબૂલ ન કરે કે, આખી રાત એનાં નસકોરાં બોલે છે ને તમારી ઊંઘની તો... હમણાં કહું એ... પયણઈ જાય છે!
પોતાનાં નસકોરાં બોલે છે, એ વાત કબૂલ કોઈ કરતું નથી, કારણ કે આપણાંય બોલતાં હોય એ આપણેય ક્યાં સ્વીકારીએ છીએ? આપણને લહેર એ વાતે પડી જાય છે કે, આપણાં નસકોરાં લાઇફટાઇમમાં આપણે સાંભળ્યાં હોતાં નથી. કહેવાય છે કે, પ્રત્યેક નસકોરાંનો ધ્વનિ ભિન્ન ભિન્ન હોય છે. પ્રસ્તુતિ અલગ અલગ હોય છે. એકની સાથે બીજાનું કદી મળતું ન આવે. એમાંય, આ છેલ્લી સદીમાં તો ભારતમાં એવાય કલાકારો થઈ ગયા છે કે, દરેક નસકોરે ધ્વનિ જુદો જુદો કાઢી શકે. લંબાઈ જુદી હોય, પ્રબળતા નાની-મોટી હોય કે વચમાં પડતા ઇન્ટરવલો નોખા હોય. એનુંય પાછું કાંઈ નક્કી નહીં. એક ‘લાંઆઆઆઆઆ...બું’ નસકોરું આવ્યું, તો જરૂરી નથી કે એના પછી આવનારું બીજું એ જ સાઇઝ અને માપનું હોય. એકાદું તો નાનકડું ઠમકું મૂકીને પતી જાય. આપણે રાહો જોતા હોઈએ કે, બીજું, ત્રીજું, અગિયારમું કે વહેલી પરોઢ સુધીનું એકસરખું લાંબું કે ટૂંકું હશે, પણ નસકોરાંનો સંગીતકાર પતિ ‘તાલ સે તાલ મિલા’ના ધોરણે વગાડે જાય છે. લાચારીથી તમે સાંભળી લો છો બહેનો, પણ તમે કરી કાંઈ શકતાં નથી. સોરી લેડીઝ. નસકોરાં કોઈનાં બાપનાં કે માપનાં થયાં નથી. એના તાલ ઉપર તમારી ઊંઘ બગડે છે, એ જાણીને લયમાં સાથે મેન્ડોલિન કે સિતાર વગાડી શકાતી નથી.
કહે છે કે, પશ્ચિમના દેશોમાં તો નસકોરાંને ઠોકી નાખવા માટેની રિવોલ્વરોય શોધાઈ છે. સીધી ગોરધનના મોઢા ઉપર જ ઠોકવાની. એનાથી માણસ ન મરે, પણ ધ્યાન રાખીને ન ફોડો તો નાક ઊડી જાય, પણ પછી લાઇફટાઇમની શાંતિ ને? આમાં એકથી વધારેને તો ઉડાડવાના હોય નહીં, એટલે આવી રિવોલ્વરોમાં એક જ ગોળી આવે. ઘણી ગુજરાતણો દેશી ઉપચાર તરીકે નસકોરાં બોલાવતા પોતાના ગોરધનો માટે રૂના તેલવાળાં પૂમડાં સ્ટોકમાં રાખે છે, જેથી પહેલી ઘંટી બજી કે, તરત જ એક ફોયણામાં પૂમડું ખોસી નાખવાનું. આ તો એક ફેમિલીને ત્યાં અમે ડિનર પર ગયા હતા, ત્યાં પાલક-પનીરના શાકમાંથી આવું પૂમડું નીકળ્યું, ત્યારે ખબર પડી કે, તેલમાં ઝબોળેલાં પૂમડાં તો કોઈના નાકમાં ભરાવવાના કામમાંય આવે છે. કેટલીક જુનવાણી વિચારસરણી ધરાવતી મહિલાઓ રાત્રે સૂતી વખતે ઓશિકા નીચે નાનકડી સાણસી જેવું હથિયાર છુપાવી રાખે છે ને જેવાં પેલાનાં નસકોરાં શરૂ થાય ને ગોરધનના નાક ઉપર સાણસી ભરાવી દેવાય, પરંતુ ઉત્તરસંડા, ફ્રાન્સ, કુકરવાડા કે સાઉથ કોરિયાની મહિલાઓ આવા ફાલતુ કામ માટે સાણસીનો ઉપયોગ યોગ્ય માનતી નથી. એ લોકો સાણસીથી ગોરધનોનાં નાકો દબાવવાને બદલે નાક ઉપર સાણસી ઠોકવાની વિચારધારા ધરાવે છે. એમાં ગોરધન મારવાનો નથી, પણ બાકીની જિંદગીમાં દિવસે જાગતાય નાનકડું નસકોરું બોલાવવાની હિંમત કરતો નથી.
મારા જામનગરમાં નસકોરાંનો નાશ કરવા બજરનો ઉપયોગ અસરકારક મનાયો છે. બજર એટલે છીંકણી. ચપટી ભરીને અમારી જામનગરણો ગોરધનની મૂછો ઉપર ભભરાવી દે છે. અલબત્ત, આમાં પૂરતા પ્રમાણમાં કળા અને કૌશલ્યની આવશ્યકતા રહે છે. જરાક અમથી બજર નાકને બદલે ખુલ્લા મોંઢામાં ગઈ તો પેલાને ભાવવા માંડે છે અને બીજી માંગે છે. ન છૂટકે, સદીઓથી જામનગરમાં બધા માટે કોમન વપરાતી ગાળ ‘રાંઇન્ડનો હુવાય દેતો નથ્થી!’ બોલાઈ જાય છે. (અનુવાદ : ‘રાઇન્ડ’ એટલે લગ્ન પછી વિધવા થયેલી સ્ત્રી. અમારી બાજુ, લગ્ન પહેલાં વિધવા થવાની જરૂરત પડતી નથી. કહેવાય છે કે, વિધવા થવાનું મૂળ કારણ ‘લગ્ન’ હોય છે.)
તો કેટલીક ઉચ્ચ શિક્ષિત વાઇફો, આમેય ઘોંટાઈ ગયા પછીનો ગોરધન કોઈ કામનો રહેતો ન હોવાથી બીજા બેડરૂમમાં સૂવા જતી રહે છે. અલબત્ત, સદરહુ ઉપચારનો આધાર ગોરધનનાં નસકોરાંની તીવ્રતા અને બુલંદી ઉપર રહેલો છે. ઘોંટાઈ ગયા પછીય પ્રચંડ અવાજો કાઢી શકતા ગોરધનોથી ત્રાસેલી મહિલાઓને બીજા રૂમમાં ગયા પછીય નિરાંતની નીંદર મળતી નથી. પલાંઠી વાળીને અડધી રાત્રે લમણે હાથ મૂકીને બેસી રહેવું એ કાચીપોચી વાઇફોનું કામ નથી. ગોરધનો માટે આને આદર્શ સ્થિતિ ચોક્કસ કહેવાય, પણ વાઇફોને રોજ એકલા સૂવાની(કે જાગવા)ની ટેવ પડી જાય, એ આપણા માટે સારું નથી. એ લોકો બહુ લાંબા સમય સુધી એકલી સૂવાનું સહન કરી શકતી નથી. સોચ લો, ઠાકુર!
નસકોરાં વ્યક્તિગત જ નહીં, જથ્થામાંય ઉપલબ્ધ છે. ખાસ કરીને ઘણા બધા સાથે પ્રવાસમાં ગયા હોઈએ ત્યારે. અમારા વખતમાં લગ્નપ્રસંગે જાનમાં જવાનું થતું અને જાનૈયાઓનો ઉતારો એક મોટા ઓરડામાં થતો, જેમાં રાત્રે એકસામટી 30-40 પથારીઓમાં ભેગાં મળીને બધાને સુવાનું હોય. લગ્નપ્રસંગના મૂડમાં મોડી રાત સુધી હલ્લાગુલ્લા કર્યા પછી એક મોટા રૂમમાં બધા સાથે સૂતા હોય. આખા દિવસની હાહાહીહીહૂહૂ પછી ભારેમાઇલો થાક લાગ્યો હોય એટલે ઊંઘો તરત આવી જાય. લાઇટો બંધ થાય અને મસ્તમજાની ઠંડકમાં તો કેવું મોઢું મલકાઈને ઊંઘ આવવા માંડે!
બસ, એ જ ઘડીએ, ફિલ્મ ‘શોલે’માં પહાડ ઉપર બેઠેલો ગબ્બરસિંહ હાથમાં રાઇફલ સાથે પૂરી ઠંડકથી ભડાકો કરે છે, એમ રૂમની નીરવ શાંતિ અને ઠંડકમાં આસ્તે રહીને કોકનું પહેલું નસકોરું આળસ મરડીને ઊભું થાય. મધ્ય રાત્રિએ કૂતરાંના રડવાનો અવાજ હજી સારો, પણ અહીં તો એકે શરૂ કર્યું, ત્યાં પશ્ચિમ બાજુથી કોક બીજા વીરલાનું શરૂ થાય. ત્રીજો કે ચોથો હજી તો શરૂ જ થયો ન હોય, પણ પહેલાવાળો એવો ઉપડ્યો હોય કે, બીજાઓનાં સારાં માઇલાં નસકોરાં દબાવી દઈ કાળરાત્રિમાં સન્નાટો બોલાવી દે. કયા મોરલાએ કળા કરી છે, એ અંધારામાં તો આપણને કાંઈ દેખાય નહીં, પણ ધ્વનિની દિશામાં અડધા ઊભા થઈને જોઈએ, ત્યાં આવા 4-5 કવ્વાલો સામસામી પોતાની રચનાઓ પ્રસ્તુત કરતા હોય. એકનો જવાબ બીજો આપે. ‘સાંભળનારા દાઝે જોને!’ સવારે ઊઠીને આ કવ્વાલો પાછા માને નહીં કે, એ રચનાઓની પ્રસ્તુતિ એમની હતી. આ પણ નમ્રતાનો ભાવ કહેવાય કે, પોતાના સર્જનનું કોઈ ગુમાન નહીં! મારે તો ખરીદવાની જરૂરત પડી નથી, પણ સાંભળ્યું છે કે, દોઢસો-બસો રૂપિયામાં હવે માર્કેટમાં નસકોરાંનાશક સાધનો ઉપલબ્ધ છે. નાકના બંને ફોયણાંમાં રાત્રે ભરાવી દેવાના. જોકે, ન્યાય એ મુદ્દે થવો જોઈએ કે આવું સાધન નસકોરાંવાળો નાકમાં નંખાવે, એને બદલે સાંભળનારી પોતાના કાનમાં શું કામ ન નંખાવે?
તમે લખ્યું છે, નસકોરાંનાશક ઉપાય મળી ગયો છે. ‘ક્યાં છે?’ નથી મળ્યો, હવે તો પેટમાંથીય ‘પેટકોરાં’ બોલે છે!

સિક્સર
મારી ઇન્ટરનેટ સર્વિસ એટલી ધીમી છે કે,
આ ‘સિક્સર’ લખવાની શરૂઆત મેં છ વર્ષ
પહેલાં કરી હતી!

ashokdave52@gmail.com

તમારો ઓપિનિયન પોસ્ટ કરો

લેટેસ્ટ કમેન્ટ્સ

તમારો પ્રશ્ન પોસ્ટ કરો

અનામિક ઉમેરોપ્રશ્ન ઉમેરો

લેખકને તમારો પ્રશ્ન મોકલો

અનામિક ઉમેરોપ્રશ્ન ઉમેરો
x
રદ કરો

કલમ

TOP