પત્નીને છોડી પ્રેમિકા સાથે રહેતા પતિ પાસે મહિલાએ ભરણપોષણ અને મકાન માગ્યું

ત્રણ સંતાનોના પિતાને કુંવારી યુવતી સાથે પ્રેમ કરવો ભારે પડ્યો.દોઢ વર્ષથી પ્રેમિકા સાથે રહેતા પતિ સામે મહિલાએ પોતાનુ અને સંતાનોનુ ભરણપોષણ કરવા અને મકાન લઇ આપવાની શરત મુકતાં મામલો મહિલા પોલીસમાં પહોંચ્યો હતો. મહિલા પોલીસે યુવાન,તેની પ્રેમિકાને પરિવાર સાથે બોલાવી લગ્ન જીવનને થાળે પાડવા તજવીજ કરી હતી.

મહેસાણાની યુવતીના જ્ઞાતિના જ યુવાન સાથે 7 વર્ષ અગાઉ લગ્ન થયા હતા અને સંતાનમાં બે દીકરી,એક દીકરો છે.આ સંજોગોમાં પતિને અન્ય યુવતી સાથે પ્રેમસંબધ બંધાતા તેઓ વચ્ચેના સંબંધો વણસ્યા હતા અને આ મુદ્દે અવાર નવાર ઝઘડા કરતી પત્નીને છોડીને યુવાન દોઢ વર્ષ અગાઉ પ્રેમિકા સાથે અલગ રહેવા જતો રહ્યો હતો.સાસરીમાં ઓશિયાળું જીવન લાગતાં પિયર રહેવા ગઈ હતી. આ દરમિયાન મહિલાએ તાજેતરમાં મહિલા પોલીસ સ્ટેશનમાં ફરિયાદ આપી હતી.ગુરૂવારે મહિલા પોલીસ સ્ટેશન પહોચી બાંકડે બેઠેલી મહિલાએ કહ્યુ કે,મારે બે ભાઇઓ છે અને માતાનુ મૃત્યું થયુ છે.પિયરમાં રહી શકુ તેમ નથી અને સાસરીમાં પતિની ગેરહાજરીમાં હેરાન થઇ રહી છુ.આ સંજોગોમાં પોતાનુ ભરણપોષણ કરે અને રહેવા માટેની મકાનની વ્યવસ્થા કરે તેવી શરત મુકી હતી. મહિલા પોલીસે યુવાનને તેની પ્રેમિકા અને પરિવારને બોલાવી બન્ને પક્ષોને સમજાવવાની કાર્યવાહી કરી હતી.