તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો
  • Gujarati News
  • Local
  • Gujarat
  • Mehsana
  • Kadi
  • પાકિસ્તાનમાં કટોકટી |માઇક્રોસોફ્ટના કેલિબરી નામના ફોન્ટે ભાંડો ફોડ્યો

પાકિસ્તાનમાં કટોકટી |માઇક્રોસોફ્ટના કેલિબરી નામના ફોન્ટે ભાંડો ફોડ્યો

4 વર્ષ પહેલા
  • કૉપી લિંક
નવાઝ શરીફ હવે ‘ફોન્ટગેટ’ માં ફસાઇ ગયા છે

પણ ગુનેગાર ગમે તેટલો હોંશિયાર હોય તો પણ તે ગુનો કરતી વખતે નાનકડી ભૂલ કરતો હોય છે. ગુનાનું અન્વેષણ કરતી સંસ્થા જો ભૂલ પકડી શકે તો તે ગુનેગારને પકડી શકે છે. પાકિસ્તાનના મુખ્ય પ્રધાન નવાઝ શરીફે જ્યારે ભ્રષ્ટાચાર આચર્યો ત્યારે તેમને કલ્પના પણ નહીં હોય કે માઇક્રોસોફ્ટ દ્વારા વપરાતો ડિફોલ્ટ ફોન્ટ કેલિબરી તેમનાં પતનનું કારણ બનશે. પાકિસ્તાની સુપ્રિમ કોર્ટે બનાવેલી સ્પેશિયલ ઇન્વેસ્ટિગિટિવ ટીમે શોધી કાઢ્યું છે કે નવાઝ શરીફની દીકરી મારિયમે ઇ.સ.૨૦૦૬માં જે બે દસ્તાવેજો બન્યા હોવાનો દાવો કર્યો હતો તે કેલિબરી ફોન્ટમાં ટાઇપ કરવામાં આવ્યા હતા. માઇક્રોસોફ્ટ કહે છે કે ફોન્ટ જાહેર જનતા માટે ઇ.સ.૨૦૦૭માં પ્રાપ્ય બનાવવામાં આવ્યા હતા. ફોન્ટના ઉપયોગને કારણે મારિયમ નવાઝ શરીફનું જૂઠાણું સાબિત થઇ ગયું છે. ઇન્ટરનેટનો ઉપયોગ કરતા લોકોએ કૌભાંડને ફોન્ટગેટનું નામ આપ્યું છે. પનામા પેપર્સમાં બદનામ થયેલા નવાઝ શરીફે ફોન્ટગેટને કારણે કદાચ વડા પ્રધાનપદેથી રાજીનામું આપવું પડશે.

જોઇન્ટ ઇન્વેસ્ટિગેટિવ ટીમના રિપોર્ટમાં જ્યારે કેલિબરી ફોન્ટનો ઉલ્લેખ જોયો ત્યારે પાકિસ્તાની મીડિયાએ તેના વિશે વધુ જાણવા માટે વીકિપીડિયાની મદદ લીધી. વીકિપીડિયામાં લખ્યું હતું કે કેલિબરી ફોન્ટ ઇ.સ.૨૦૦૪માં બહાર પાડવામાં આવ્યા હતા. વધુ ઊંડા ઊતરતાં ખ્યાલ આવ્યો કે કોઇએ વીકિપીડિયાના પાનાંમાં ફેરફાર કરીને ફોન્ટ પ્રકાશિત કરવાની સાલ બદલી કાઢી હતી. વીકિપીડિયાને ગરબડનો ખ્યાલ આવ્યો ત્યારે તેણે કેલિબરીના પેજમાં ફેરફાર કરવા પર પ્રતિબંધ મૂકી દીધો છે.

નવાઝ શરીફના પિતા પંજાબના અમૃતસર નજીકનાં ગામમાં કંસારાની દુકાન ચલાવતા હતા. દુકાનમાં તેઓ ધાતુનાં વાસણો વેચતા હતા. ભાગલા પછી તેઓ પાકિસ્તાન રહેવા ચાલ્યા ગયા હતા. નવાઝ શરીફના પિતા માલિશ કરવાની કળામાં હોંશિયાર હતા. ટોચના રાજકારણીઓને મસાજ કરીને તેમણે પણ રાજકારણમાં રસ લેવા માંડ્યો હતો, જેનો લાભ નવાઝ શરીફને થયો હતો.

ગયાં વર્ષના એપ્રિલમાં પનામા પેપર્સનો ધડાકો થયો ત્યારે બહાર આવ્યું કે નવાઝ શરીફના સગાઓ દ્વારા કાળાં નાણાંને ધોળાં કરવા માટે પનામામાં અડધો ડઝન બોગસ કંપનીઓ ઊભી કરવામાં આવી હતી. કંપનીઓ દ્વારા લંડનના પોશ વિસ્તારમાં ચાર આલિશાન ફ્લેટો ખરીદવામાં આવ્યા હતા. નવાઝ શરીફની પુત્રી મારિયમ પણ તેમાંની એક કંપનીમાં શેરહોલ્ડર હતી.

પનામા પેપર્સમાં જાણવા મળ્યું હતું કે મારિયમ નવાઝ શરીફ બ્રિટનની નેસ્કોલ નામની કંપનીની એકમાત્ર શેરહોલ્ડર હતી. કંપની દ્વારા ઇ.સ.૧૯૯૮માં લંડનના પોશ વિસ્તારમાં મૂલ્યવાન મિલકત ખરીદવામાં આવી હતી. પનામા પેપર્સ પ્રકાશમાં આવ્યા તે પછી મારિયમે ઇ.સ.૨૦૦૬ની તારીખનો દસ્તાવેજ બનાવ્યો હતો, જેના દ્વારા તેણે નેસ્કોલ કંપનીમાં પોતાનું જોડાણ કાપી નાખ્યું હતું. દસ્તાવેજમાં કેલિબરી ફોન્ટ વાપરવામાં આવ્યા હોવાથી મારિયમનું જૂઠાણું પકડાઇ ગયું હતું.

ઇ.સ.૨૦૧૬માં પનામા પેપર્સમાં નવાઝ શરીફનાં સંતાનોનું નામ આવ્યું તે પછી પાકિસ્તાનના વિપક્ષી નેતા ઇમરાન ખાને સુપ્રિમ કોર્ટમાં નવાઝ શરીફ સામે કેસ દાખલ કર્યો હતો, જેમાં અન્ય વિપક્ષો પણ જોડાયા હતા. પાકિસ્તાની સુપ્રિમ કોર્ટે ગયા વર્ષના ઓક્ટોબર મહિનામાં કેસ દાખલ કરીને તેની દૈનિક ધોરણે સુનાવણી કરીને કેસ ફેબ્રુઆરીમાં પૂરો કર્યો હતો. મે મહિનામાં કેસનો ચુકાદો આવ્યો તેમાં પાંચ જજોની બેન્ચ પૈકી ત્રણ બે જજે નવાઝ શરીફને ગુનેગાર ઠરાવી રાજીનામું આપવાનું જણાવ્યું હતું, પણ ત્રણ જજે વધુ તપાસ માટે સ્પેશિયલ ઇન્વેસ્ટિગેટિવ ટીમની રચના કરવાનો આદેશ કર્યો હતો. સભ્યોની ટીમને તપાસ કરવા માટે ૬૦ દિવસનો સમય આપવામાં આવ્યો હતો. સ્પેશિયલ ઇન્વેસ્ટિગેટિવ ટીમે તા.૧૦ જુલાઇએ પોતાનો રિપોર્ટ સુપરત કર્યો તેમાં નવાઝ શરીફને જાણીતા આવકનાં સાધનો કરતાં વધુ સંપત્તિ ધરાવવા બદલ જવાબદાર ગણવામાં આવ્યા છે.

જ્યારથી પનામા પેપર્સમાં નવાઝ શરીફની સંડોવણી બહાર આવી છે ત્યારથી પાકિસ્તાનના રાજકારણમાં તેમનો નૈતિક પ્રભાવ ખતમ થઇ ગયો છે. નવાઝ શરીફ લશ્કરની કઠપૂતળી બની ગયા છે. લશ્કરે તોઇબાના હાફિસ સઇદ જેવા આતંકવાદીઓ તેમ પાકિસ્તાનની ગુપ્તચર સંસ્થાઓ ઉપર પણ તેમનો કોઇ કાબુ રહ્યો નથી. ભારતના વડા પ્રધાન નરેન્દ્ર મોદી વારંવાર પાકિસ્તાન જઇને નવાઝ શરીફ સાથે મૈત્રીનો સેતુ બાંધી આવ્યા, પણ પાકિસ્તાનમાં નવાઝ શરીફનું કાંઇ ઉપજતું નથી. તાજેતરમાં યુનોની બેઠકમાં નવાઝ શરીફ કોઇ છાપેલું ભાષણ વાંચતા હતા ત્યારે પાકિસ્તાનના લશ્કરના ટોચના અફસર તેમના કાનમાં કંઇક ગણગણ્યા ત્યારે નવાઝ શરીફે પોતાની સ્ક્રિપ્ટ બદલી નાખવી પડી હતી. બીજાં એક સમ્મેલનમાં ડોનાલ્ડ ટ્રમ્પે નવાઝ શરીફને જોઇને પોતાનું મોંઢું ફેરવી કાઢ્યું હતું.

પાકિસ્તાનની સ્થાપના થઇ ત્યારથી તેનો અંકુશ લગભગ લશ્કરના હાથમાં રહ્યો છે. પાકિસ્તાનના આયુષ્યનાં ૭૦ વર્ષમાં કોઇ ચૂંટાયેલી સરકાર પોતાની પાંચ વર્ષની મુદ્દત પૂરી કરી શકી હોય તેવું એક વખત બન્યું છે. નવાઝ શરીફનું ભવિષ્ય હવે પાકિસ્તાનની સુપ્રિમ કોર્ટના હાથમાં છે. સુપ્રિમ કોર્ટ જો સ્પેશિયલ ઇન્વેસ્ટિગેટિવ ટીમનો રિપોર્ટ સ્વીકારે તો નવાઝ શરીફે રાજીનામું આપવું પડશે. નવાઝ શરીફનાં રાજીનામાં સાથે લશ્કરી શાસનના ભણકારા વાગવા લાગશે. બીજો વિકલ્પ સંસદની ચૂંટણી વહેલી કરવાનો છે, જે એક વર્ષ પછી થવાની છે. તે દરમિયાન જો પાકિસ્તાનનો શાસક પક્ષ કોઇ નવા નેતાની પસંદગી કરી શકે તો લશ્કરી શાસનને ટાળી શકાય તેમ પણ છે.

@sanjay.vora@dbcorp.in

અન્ય સમાચારો પણ છે...