રૈયાધારની પાણીની લાઇન તૂટી, 30 વિસ્તારમાં પાણી વિતરણને અસર

ઇન્ફ્રાસ્ટ્રકચર રિપોર્ટર | રાજકોટ

ઠંડીમાં વધારો થવાથી મહાનગરપાલિકાની પાણીની લાઇન તૂટવાનું પ્રમાણ વધી ગયું છે. 150 ફૂટ રિંગરોડ પર રૈયાધારની પાણીની મુખ્ય લાઇન તૂટી જતા વોર્ડ નં.2,9 અને 10ની અંદાજે 30 જેટલા વિસ્તારમાં ચારથી પાંચ કલાક પાણી વિતરણ મોડું થયું હતું. બીજી તરફ ડ્રેનેજ કામ કરતા કોન્ટ્રાક્ટરની બેદરકારીના કારણે વોર્ડ નં.14ની વોર્ડ ઓફિસ પાસે જ પાણીની લાઇન તૂટી હતી જે તુરંત રિપેરિંગ કરી દેવામાં આવતા પાણી વિતરણ પર કોઇ અસર થઇ નથી.

ઠંડીમાં લોખંડ સંકોચાતું હોવાથી પાણીની લાઇનના સાંધા ખુલ્લી રહ્યા છે જેના કારણે પાણીની લાઇન લીકેજ થઇ રહી છે. 150 ફૂટ રિંગરોડ પર રૈયાધારથી પસાર થતી મુખ્ય 300 એમ.એમ.ની લાઇન ગુરૂવારે મોડીરાત્રીએ લીકેજ થઇ હતી. પરિણામે વોર્ડ નં.2નાં રંગ ઉપવન તથા વોર્ડ નં.9નાં શિવપરા, હીરામનનગર તથા વોર્ડ નં.10માં તિરૂપતી સહિતનાં વિસ્તારોમાં ચારથી પાંચ કલાક સુધી પાણી વિતરણ ખોરવાયેલું રહ્યું હતું.

લાઈન તૂટતાં રસ્તા પર પાણીની રેલમછેલ થઈ હતી.