જામનગર: સાંસદ પૂનમ માડમ 8 ફૂટ ઊંડા નાળામાં પડ્યા, બીજા બે લોકો પણ પડ્યા

જામનગરઃ જામનગર ખાતે જલારામ ઝૂંપડપટ્ટીમાં ડિમોલિશન વખતે કેનાલ પરની પાપડી તૂટવાની ઘટનામાં ઇજાગ્રસ્ત થયેલા સાંસદ પૂનમબેન માડમની મુંબઇ સ્થિત હોસ્પિટલમાં સર્જરી કરવામાં આવી હતી. હાલ તેમની તબિયત સુધારા પર હોવાનું જણાવવામાં આવ્યું છે. નોંધનીય છે કે સોમવારે કોર્પોરેશન દ્વારા ઓપરેશન ડિમોલેશન હાથ ધરવામાં આવ્યું હતું, જે સબબ પૂનમબેન માડમ રહેવાસીઓ માટે બે દિવસની મુદ્દત માગવા સંદર્ભે કોર્પોરેશનના અધિકારીઓ સાથે ચર્ચા કરવા ગયા હતા. દરમિયાન કેનાલ પર મુકવામાં આવેલી પાપડી તૂટી પડી હતી. જેમાં પૂનમબેનને માથાના ભાગે ઇજા થઇ હતી. તેમને સારવાર માટે સ્થાનિક ખાનગી હોસ્પિટલમાં અને ત્યારબાદ તાત્કાલિક ધોરણે મુંબઇ સ્થિત હરિકિશન રિલાયન્સ મેડિકલ ફાઉન્ડેશન હોસ્પિટલ ખાતે ખસેડવામાં આવ્યા હતા.