મહુવામાં ખડકાયા ગેરકાયદે દબાણો

7 વર્ષ પહેલા
  • કૉપી લિંક
(પ્રતિકાત્મક તસવીર)
- મહુવામાં ખડકાયા ગેરકાયદે દબાણો
- ઠેર ઠેર દબાણો ખડકાઇ રહ્યા હોવા છતા તંત્રને દેખાતા નથી નિયમોનું પણ ઉલ્લંઘન થતું હોવાની ફરિયાદોથી કાર્યવાહી કરવા થયેલી માંગ


મહુવા : અમદાવાદ, સુરત જેવા મોટા શહેરોમાં ગેરકાયદેસર બાંધકામો અને દબાણો યુદ્ધના ધોરણે દુર કરવામાં આવે છે. પરંતુ મહુવામાં નગર સેવા સદન દ્વારા ગેરકાયદેસર દબાણ, બાંધકામ અટકાવવા માટે કોઇ પગલા ન લેવાતા નગરજનોમાં ભારે આક્રોશ ઉભો થવા પામેલ છે. ભુતકાળમાં ડીમોલીશન દ્વારા કરવામાં આવેલા દબાણો જેમ ના તેમ થઇ ચુક્યા છે અને કેટલીક જગયાએ તો આવા દબાણો કાચામાંથી પાકા થઇ ગયા છે.

શહેરમાં જુદી જુદી જગ્યાએ ગેરકાયદેસર બાંધકામ તેમજ બન્ને બિલ્ડીંગો સામે કોઇ પગલા લેવામાં આવતા નથી. માત્ર નોટીસો આપી કુલડીમાં ગોળ ભાંગવામાં આવતો હોવાની ચર્ચા નગરજનોમાં થઇ રહી છે. માત્ર નોટિસો આપીને સંતોષ માનવાની જગ્યાએ તંત્રએ કડક હાથે કાર્યવાહી હાથ ધરવા માંગણી ઉઠી છે.થોડા સમય પહેલા જમીનના પ્લોટ પાડી જમીન ઉંચા ભાવમાં વેચવાના પૂર્વ આયોજન સ્વરૂપે વહાલા દવલાની નીતી અપનાવી દબાણો હટાવવાની નીતી રીતિ અખત્યાર કરવામાં આવેલ તે કેટલા અંશે વ્યાજબી ગણાય?
ચોક્કસ દબાણો નહી, તમામ દબાણો હટાવવા જોઇએ અને અડચણ રૂપ દબાણો માટે નાગરિકોએ પણ જાગૃતતા દાખવી નગર સેવા સદનના ચીફ ઓફીસર અને નાયબ કલેક્ટર કચેરીમાં ગેરકાયદેસર બાંધકામ અને દબાણો અંગે અરજ કરી જાહેરમાં ખુલ્લા પાડવા જોઇએ.મહુવા જૂના શહેરમાં અને સોસાયટી વિસ્તારમાં રોડને અડચણ રૂપ કે રોડ પચાવવા આડશ ઉભી કરી રોડને પોતાના પ્લોટમાં વાળી લીધેલ દબાણો હટાવવા માટે લોકો આગળ આવે, ફરીયાદ કરે, પ્રતીક ઉપવાસ કરે ત્યારે જ સત્તાધિશોને દબાણ કે ગેરકાયદેસર બાંધકામ અચાનક દેખાવા લાગે છે.

બાંધકામ માટે સમાન નિયમો બનાવવા જોઇએ
રાજય સરકારે રાજય ભરમાં સમાન બાંધકામના નિયમો બનાવવા જોઇએ તેમજ હાલના અવ્યવહારૂ નિયમો બદલાવી સુયોગ્ય નિયમો અમલમાં મુકવામાં આવે તો કોઇપણ આસામી ગેરકાયદેસર બાંધકામ ન કરે. હવે ઇમ્પેક્ટની બાબત પુરી થઇ ગઇ હોય લોકોએ આ કાયદાનો પુરતા પ્રમાણમાં લાભ લીધો ન હોય રાજય સરકારે બાંધકામના નિયમો બદલવા જોઇએ. જો રાજય સરકાર સમાન નિયમો ન બનાવે તો નગરપાલિકા ર્બોડે પોતાના નિયમો સુધારી સરકાર સમક્ષ મંજુરી માટે મુકવા જોઇએ તેવી લાગણી આમ જનતામાં ઉભી થવા પામી છે.

આસામીઓને નોટીસો અપાઇ છે
ગેરકાયદેસર દબાણ અને બાંધકામ અંગે આસામીઓને નોટીસ આપી આવા પ્રકરણનો અહેવાલ ર્બોડ સમક્ષ રજુ કરેલ છે. ર્બોડ નિર્ણય લઇ યોગ્ય આદેશ બહાર પાડે ત્યાર બાદ આગળની કાર્યવાહી હાથ ધરવામાં આવશે.
- હિ‌તેશભાઇ પટેલ, ઇજનેર, મહુવા નગર સેવા સદન