અમરેલી: પ્રતિબંધ છતાં જિલ્લામાં ગૌવંશની કતલ

7 વર્ષ પહેલા
  • કૉપી લિંક
- ઘાતકી|ઢોરની હેરાફેરી અને કતલની પ્રવૃત્તી એટલી હદે ફૂલી ફાલી છે કે, પેધી ગયેલા તત્વોને કોઇની પરવા નથી
- જો પોલીસ આ દૂષણને ડામવામાં નિષ્ફળ રહી તો આવનારા દિવસોમાં ઘર્ષણના એંધાણ

અમરેલી: ગૌવંશની કતલ પર રાજયસરકારે ભલે પ્રતિબંધ મુક્યો હોઇ પરંતુ અમરેલી જીલ્લામાં પોલીસ અને ગૌપ્રેમીઓની લાખ કોશીષ છતાં ગૌવંશન સાથે અને અન્ય પશુઓની કતલની પ્રવૃતિ બેફામપણે ચાલી રહી છે. અને અમરેલી જીલ્લામાં આવી પ્રવૃતિઓ કેટલાક નિશ્ચિત સ્થળોએથી વિશેષ પ્રમાણમાં ચાલી રહી છે. પોલીસ દ્વારા આ વિશેષ સ્થળોને જડમુળથી નેસ્ત નાબુદ કરવા કેમ કાર્યવાહી થતી નથી તે પેચીદો પ્રશ્ન છે. પાછલા પાંચ વર્ષમાં જીવદયાના ક્ષેત્રે અનેક સંગઠનો પણ સામે આવ્યા છે. પરંતુ કસાઇઓ દ્વારા તેમના પર હુમલાની ઘટનાઓ પણ બની રહી છે. ખાસ કરીને ચિતલ-બાબરા પંથકમાં આવી ઘટનાઓ વધી છે. પોલીસ જો આ દુષણને ડામવામાં સફળ નહી રહે તો આવનારા દિવસોમાં ઘર્ષણના એંધાણ વર્તાઇ રહ્યા છે.

અમરેલી જીલ્લામાં ગૌવંશની કતલ અને હેરાફેરીની સૌથી વધુ પ્રવૃતિ જો ક્યાંય ચાલતી હોય તો તે અમરેલી શહેર અને અમરેલી તાલુકાના ચિતલમાં ચાલી રહી છે. ચિતલ અને મોણપુર ગામ આ પ્રવૃતિઓ અડ્ડો બન્યુ છે. જીલ્લાભરમાંથી અહિં પશુઓને લાવી એકઠા કરવામાં આવે છે. બળદ,ભેંસ, વાછરડાઓને ક્રુરતાથી બાવળની કાંટમાં બાંધી રખાય છે અને બાદમાં તેની કતલ કરી દેવામાં આવે છે. ચિતલમાંથી મોટા પ્રમાણમાં માંસની સૌરાષ્ટ્ર અને ગુજરાતના વિવિધ વિસ્તારોમાં સપ્લાય થાય છે. અહિંથી પશુઓના ટ્રક પણ ભરાય છે. અમરેલીમાં પણ મોટા પ્રમાણમાં પશુઓની કતલ બેફામ રીતે થઇ રહી છે.

અમરેલી જિલ્લામાં ગેરકાયદે પ્રવૃતિ કેટલાક વિશેષ સ્થાનો પર ફુલી ફાલી છે. અહિંના કેટલાક પેધી ગયેલા તત્વો કાયદાને પણ ગણકારતા જ નથી. પોલીસ દ્વારા કરાતા કેસની તેમને કોઇ પરવા નથી. કાયદાની જોગવાઇઓનો લાભ લઇ આવા તત્વો ઝડપથી છુટી જાય છે અને બમણા વેગથી તેમની પ્રવૃતિ શરૂ રાખે છે. તો બીજી તરફ જીવદયાના ક્ષેત્રે કામ કરતા સંગઠનોની સંખ્યા વધી રહી છે. આવા સંગઠનો દ્વારા આવી પ્રવૃતિ પર નઝર રખાય છે અને તેને અટકાવવા પ્રયાસો પણ થાય છે. ભુતકાળમાં બગસરા, ચિતલ, બાબરા પંથકમાં જીવદયાપ્રેમીઓ પર આવી પ્રવૃતિ કરનારા તત્વો દ્વારા હુમલાની ઘટનાઓ પણ પોલીસ ચોપડે ચડી ચુકી છે. પોલીસ દ્વારા જેટલી કાર્યવાહી થાય છે તેના કરતા વધુ તો જીવદયા પ્રેમીઓ દ્વારા કરવામાં આવી રહી છે.

છેલ્લા કેટલાક સમયથી અમરેલી જીલ્લામાં પોલીસ દ્વારા ઢોરની હેરાફેરી અને કતલ કરતા તત્વો સામે કાયદાનો દંડો પછાડવામાં આવી રહ્યો છે. જો કે પોલીસ દ્વારા આ પ્રવૃતિ માટે બદનામ કેટલાક વિશેષ સ્થળોને અલગ તારવી અહિં જડમુળમાંથી આ પ્રવૃતિ અટકે તેવા પ્રયાસો થાય તેવી જીવદયા પ્રેમીઓ માંગણી ઉઠાવી રહ્યા છે. તાજેતરમાં ડીઆઇજીની અમરેલીની મુલાકાત વખતે વિહીપના આગેવાનોએ પણ આ મુદો ઉઠાવ્યો હતો. ઉલ્લેખનીય છે કે, અમરેલી િજલ્લો ગૌ વંશની કતલ માટેની અને ઢોરની હેરાફેરી માટે જાણે એપી સેન્ટર હોય એ રીતે દરરોજ હજારો કિલોની સંખ્યામાં અહીંથી રાજય અને રાજયની બહાર માસની હેરાફેરી થઇ રહી છે. ત્યારે આ દૂષણને ડાંમવા અને આ પ્રવૃત્તી સાથે જોડાયેલા તત્વો સામે તંત્ર કડક પગલા ભરે એવી ગૌ પ્રેમીઓમાંથી માંગ ઉઠવા પામી છે.

ક્યાં થાય છે વધુ કતલ અને હેરાફેરી ?

અમરેલીમાં કસ્બા વિસ્તાર, અમરેલીમાં બહારપરા વિસ્તાર, અમરેલીમાં સાવરકુંડલા બાયપાસ, ફતેપુરની સીમમાં, ચિત્તલ, મોણપુર, બગસરા બાયપાસ વિસ્તાર, સાવરકુંડલા,વડીયા

અમદાવાદ તરફ થાય છે માંસની નિકાસ

અમરેલી જીલ્લામાંથી આમ તો પશુઓને જ સીધા કતલખાને ધકેલી દેવામાં આવતા હતાં પરંતુ જીવદયા પ્રેમીઓની ભીંસ વધતા આવી પ્રવૃતિ કરતા તત્વોએ નવો રસ્તો શોધી અહિં જ પશુઓની કતલ કરી તેનું તૈયાર માંસ ગુજરાત તરફ મોકલવાનું શરૂ કર્યુ છે. પોટલા, બોક્સ કે થેલાઓમાં ભરી માંસ અમદાવાદ અને અન્ય શહેરોમાં મોકલવામાં આવે છે.

એસટી મારફત માંસની હેરાફેરી થાય છે

પશુઓની કતલ કરતા તત્વોને જાણે કોઇ રોકનાર ન હોય તેમ ભુતકાળમાં એસટી મારફત માંસના પોટલાઓ અમદાવાદ તરફ મોકલવાનું કૌભાંડ ઝડપાયુ હતું. આ ઉપરાંત બોલેરો જીપ, મારૂતી વાન, ટ્રક અને ખાનગી બસો મારફત પણ માંસની હેરાફેરી થઇ રહી છે. આવી હેરાફેરી માટે મહિલાઓનો ઉપયોગ પણ કરવામાં આવી રહ્યો છે.

હજુ પણ ચાલે છે પ્રવૃતિ-ડો. ગજેરા

અમરેલી જીલ્લા વિહીપના સૌરાષ્ટ્ર પ્રાંતના અધ્યક્ષ ડો. જી.જે. ગજેરાએ જણાવ્યુ હતું કે હજુ પણ જીલ્લાના દરેક તાલુકામાં ગૌવંશ અને પશુઓના કતલની પ્રવૃતિ ચાલે છે જે બંધ થવી જોઇએ. તેમણે શહેરના આગેવાનો સાથે ડીઆઇજીની બેઠકમાં પણ આ મુદો ઉઠાવ્યો હતો અને જણાવ્યુ હતું કે પોલીસ દ્વારા આ પ્રવૃતિ અટકાવવા પાછલા થોડા સમયમાં ઘણી કાર્યવાહી થઇ છે. આમ છતાં આ પ્રવૃતિ સદંતર અટકાવવા હજુ ઘણુ કરવાનું બાકી છે. આ માટે પહેલ આપણાથી કરવી જોઇએ.