સ્કૂટર પરથી પડી જતાં રિફાઇનરીના ઇજનેરનું મોત

પોતાના ઘરેથી મેસ્ટ્રો સ્કૂટરેટ લઇને નીકળેલા યુવકનું અકસ્માતમાં ઘાયલ થયા બાદ આજે સારવાર દરમિયાન મોત નિપજ્યું હતું. ન્યૂ અલકાપુરી ગોત્રીની પ્રથમવાટિકા સોસાયટીમાં રહેતા નીતિન બાબુલાલ ગુપ્તા (ઉવ.28) ગુજરાત રિફાઇનરીમાં આસિસ્ટન્ટ મેનેજર હતા. તેમનાં પત્ની પણ રિફાઇનરીમાં જ કોઇ વિભાગમાં મેનેજર તરીકે કાર્યરત છે. તેઓ ગુરુવારે બપોરે બે વાગ્યાના સુમારે પોતાના મિત્ર સાથે ઘરેથી નોકરીએ જવા નીકળ્યા હતા. તેમના મિત્ર એક્ટિવા પર સવાર હતા. બપોરે 2.05 વાગ્યાના સુમારે ઊંડેરાની ગોકુલધામ સોસાયટી પાસે તેમના મિત્રને ખયાલ આવ્યો કે નીતિનભાઇ પાછળ પડી ગયા છે. તેમણે જઇને જોયું તો નીતિનભાઇ બેભાન હાલતમાં હતા. તેમના ગળા અને માથાના ભાગે ગંભીર ઇજાઓ થઇ હતી. તેમને સારવાર માટે સૌ પ્રથમ રિફાઇનરી હોસ્પિટલમાં લઇ જવામાં આવ્યા પણ ત્યાંથી ગોરવાની ભાઇલાલ અમીન હોસ્પિટલમાં લઇ જવામાં આવ્યા હતા પણ ત્યાં ફરજ પરના તબીબે તેમને મૃત જાહેર કર્યા હતા. આ અંગે જવાહરનગર પોલીસે વધુ તપાસ હાથ ધરી છે.