તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

ઉપરવાસમાં અવિરત પડતા વરસાદથી ફરીથી ઓરસંગ બે કાંઠે

3 વર્ષ પહેલા
  • કૉપી લિંક

છોટાઉદેપુર: ઓરસંગ નદીમાં તા. 21ના સવારે ઉપરવાસ(મધ્યપ્રદેશ)માં વધુ વરસાદ થતાં ફરીથી બે કાંઠે પાણી આવ્યું હતું. ગત રાત્રીના તા. 21થી છોટાઉદેપુર પંથકમાં ફરી સતત વરસાદ શરૂ થઈ ગયો છે.


 ઓરસંગ નદીને પીપલેજ ગામનું એક કોતર મળે છે ત્યાં આગળથી એક અજાણી વ્યક્તિની લાશ મળી આવી હતી. લાશને વહીવટી તંત્ર ઓળખી શક્યું નથી. ગત રાત્રીથી તા. 21ના બપોરે 2 વાગ્યા સુધીમાં છોટાઉદેપુર તાલુકામાં 47 મિમી બે ઈંચ જેવો વરસાદ પડ્યો હતો. સતત વરસાદ રહેતા જન જીવન તદ્દન પાંગળુ બની ગયું હતું. શાળા કોલેજોમાં પણ પાંખી હાજરી જોવા મળી હતી. સમગ્ર છોટાઉદેપુર જિલ્લામાં અગાઉના ત્રણ વર્ષની સરખામણીમાં ઘણો સારો વરસાદ પડી ગયો છે. છેલ્લા 15 દિવસથી સતત વરસાદ થઈ રહ્યો છે. જેથી હવે ખેડૂતો પણ વરસાદ ખમૈયા થાય તેમ ઈચ્છે છે નહીંતો ખેતી પાકને ઘણું મોટું નુકસાન થશે તેમ અત્યારે ખેતરોમાં પાણી જોતા લાગી રહ્યું છે. ચાલુ સિઝન દરમ્યાન સૌથી વધારે વરસાદ છોટાઉદેપુર તાલુકામાં અને  સૌથી ઓછો વરસાદ નસવાડી તાલુકામાં નોંધાયો છે.

 

સંખેડામાંથી વહેતી ઉચ્છ-હેરણ નદી બે કાંઠે વહેવા લાગી


સંખેડાના ઈન્દ્રાલ પાસેથી હેરણ નદી પસાર થાય છે. વહેલી સવારે છ વાગ્યા સુધીમાં કવાંટ તાલુકામાં બે ઇંચ કરતા વધારે વરસાદ પડતા હેરણ નદી કાંઠે વહેવા લાગી હતી.હેરણમાં બીજી વખત વધારે પાણી આવ્યું હતું.જ્યારે દિવસ દરમિયાન પણ કવાંટ,છોટાઉદેપુર,જેતપુર પાવી અને બોડેલી તેમજ નસવાડી અને સંખેડામાં વરસાદ નોંધાયો હતો.જેથી જિલ્લાની ઉચ્છ સીઝનમાં ત્રીજી વખત ઉચ્છ નદી બે કાંઠે વહેવા લાગી છે. ઉચ્છ અને ઓરસંગ નદીના હેઠવાસમાં પાણીની આવક સારા પ્રમાણમાં થતા જમીનમાં પાણીના સ્તર ઊંચા આવવા સાથે પીવાના પાણીના વોટરવર્કસના કૂવા પણ રિચાર્જ થયા છે.

 

સંખેડા તાલુકા સદનના ગેટ પાસે ઝાડના ડાળી તૂટી પડી


સંખેડા પંથકમાં ગત રાત્રે ઝરમર ઝરમર વરસાદ ચાલુ રહ્યો હતો. જેથી સંખેડા ગામમાં તાલુકા સેવાસદનની બાજુમાં સ્ટેટ આર એન્ડ બીનું ગોડાઉન આવેલું છે. તેના કમ્પાઉન્ડમાં લીમડાનું વર્ષો જૂનું ઝાડ આવેલું છે. ગત રાત્રે પડેલા વરસાદથી લીમડાની ડાળી તૂટી ગઇ છે.લીમડાની ડાળી વિજ વાયર પર પડતા સ્ટેટ આર એન્ડ બી કમ્પાઉન્ડના ગોડાઉનમાં વિજ વાયર પણ તૂટ્યો હતો.