- વિશેષતા: વર્ષ ૧૯૬પમાં બનેલું આ મંદિર રાજ્યનું સૌથી પ્રાચીન સાંઈ મંદિર છે
- સાંઇબાબાની ૯પમી પુણ્યતિથિ નિમિત્તે પરોઢિયે કાકડ આરતી થશે

શહેરના મધ્યમાં આવેલા ખાડિયા-રાયપુર વિસ્તારમાં બાલાહનુમાન પાસે ગુજરાતનું સૌથી પ્રાચીન સાંઇ મંદિર આવેલું છે. ૪૭ વર્ષ જૂના આ સાંઇ મંદિર ખાતે સાંઇબાબાની પુણ્યતિથિ એટલે કે માત્ર દશેરાના દિવસે વહેલી સવારે કાકડ આરતી કરે છે. વર્ષમાં એક જ વાર આ આરતી થતી હોઇ આ દિવસે મોટી સંખ્યામાં ભાવિકો વહેલી સવારે આરતી ઉતારવા માટે આવે છે.

ખાડિયા ખાતેનું આ સાંઇબાબાનું મંદિર ૧૯૬પના વર્ષમાં બનાવવામાં આવ્યું હતું. મંદિરના ટ્રસ્ટી ભૂષણભાઇ ભટ્ટે જણાવ્યું હતું કે સાંઇબાબાની આ મૂર્તિ‌નું સ્વરૂપ શિરડીના સાંઇબાબા જેવું જ છે. ત્યાં કરતાં અહીંયાની સાંઇબાબાની પ્રતિમા થોડીક યુવાન લાગે છે. આ મંદિરની પ્રતિમા પણ ૪૭ વર્ષ જૂની છે.

રવિવારે દશેરાના રોજ સાંઇબાબાની ૯પમી પુણ્યતિથિ છે જે નિમિત્તે મંદિરમાં પૂજનનું આયોજન કરાયું છે અને ત્યારબાદ તેમની શોભાયાત્રા પણ કાઢવામાં આવશે. મંદિરના ટ્રસ્ટી મિલનભાઇ પંચોલીએ જણાવ્યું હતું કે, શિરડીમાં જે પ્રકારે સાંઇબાબાની આરતી -પૂજન કરવામાં આવે છે તે જ અહીંયા પૂજા કરવામાં આવે છે.

- સાંઇબાબાની પુણ્યતિથિ નિમિત્તે શોભાયાત્રા-ભંડારો

દુધેશ્વર વિસ્તારમાં આવેલા સાંઇધામ મંદિર ખાતેથી રવિવારે સાંજે ૪.૩૦ કલાકે શોભાયાત્રા નીકળી ધોબીઘાટ ચાર રસ્તાથી હનુમાનપુરા, દિલ્હી દરવાજા, હલીમની ખડકી, શાહપુર દરવાજા થઇ લાલાકાકા હોલ, શક્તિનગર ચાર રસ્તા થઇ નિજમંદિરે પરત ફરશે. સાંજે ૪ કલાકે મહાઆરતી, ૪.૩૦ કલાકે ધજાપૂજન અને પ.૩૦ કલાકે ભંડારો યોજાશે.

- કાકડ આરતી શું છે?

સાંઇબાબાની પરોઢિયે આરતી ઉતારવામાં આવે છે જેને કાકડ આરતી કહેવામાં આવે છે. આ આરતી મરાઠી ભાષામાં હોય છે. શિરડીમાં પણ કાકડ આરતી પરોઢિયે મરાઠી ભાષામાં ગવાય છે.

- પુણ્યતિથિ નિમિત્તે નીકળશે શોભાયાત્રા

સાંઇનાથ ભગવાનની શોભાયાત્રા સવારે ૯.૩૦ કલાકે મંદિરેથી નીકળીને ગાંધીરોડ, ખાડિયા ચાર રસ્તા, સારંગપુર ચકલા થઇ, રાયપુર ચકલા, ચકલેશ્વર મહાદેવ, માણેકચોક, સાંકડી શેરીથી રાયપુર ચકલા, સેવકાની વાડી થઇને નીજમંદિરે પરત ફરશે. શોભાયાત્રામાં બેન્ડવાજા અને શણગારેલી બગીઓ સાથે મોટી સંખ્યામાં વાહનો લઇને લોકો જોડાશે.