• Gujarati News
  • કોલસાના વેપારીનાં ખાતામાંથી ~૧૮.પ૦ લાખ ટ્રાન્સફર થઈ ગયા

કોલસાના વેપારીનાં ખાતામાંથી ~૧૮.પ૦ લાખ ટ્રાન્સફર થઈ ગયા

8 વર્ષ પહેલા
  • કૉપી લિંક
ભાસ્કર ન્યૂઝ . અમદાવાદ
અમદાવાદના વેપારીના ખાતામાંથી ઓનલાઈન બારોબાર ટ્રાન્સફર થઈ ગયેલા રૂ.૧૮.પ૦ લાખની રકમમાંથી ૧૮ લાખ રૂપિયા ઉપાડી લેવામાં ગઠિયાઓ અસફળ રહ્યા હતા. વેપારીની એલ‌ર્ટનેસ અને ક્રાઈમબ્રાંચની સમયસૂચકતાને કારણે આ શક્ય બન્યું હતું. લાખોની રકમ ટ્રાન્સફર થતાની સાથે જ કોલસાના વેપારીએ બેન્ક અને ક્રાઈમબ્રાંચને જાણ કરતા નાણાં ટ્રાન્સફર થતા સ્થગિત કરી દેવાયા હતા. પરંતુ પચાસ હજારની રકમ ઉપાડી લેવામાં ગઠિયાને સફળતા મળી હતી.
બોડકદેવ સ્થિત પેસ્ટીઝ ટાવરમાં રહેતા દીપક દિનકરભાઈ બ્રભટ્ટ ચામુંડા કોલ પ્રાઈવેટ લિમિટેડના નામે કોલસાનો વેપાર કરે છે. રાજ્ય બહાર અને વિદેશમાં વેપાર સાથે સંકળાયેલા દીપકભાઈના ધંધાકીય વ્યવહાર માટે કરંટ બેંક એકાઉન્ટ ડીસીબી બેન્કમાં છે. સામાન્ય રીતે તેમના ખાતામાંથી કોઈ પેમેન્ટ ટ્રાન્સફર થાય તો તેનો એલ‌ર્ટ મેસેજ પ‌ર્સનલ મોબાઈલમાં મળતો હોય છે.
૨૨ ઓક્ટોબરે સવારે સાડા દસ વાગ્યાના અરસામાં દીપકભાઈને તેમના મોબાઈલમાં એલ‌ર્ટ મેસેજ મળ્યો હતો કે, તમારા બેંક ખાતામાંથી રૂ.૧૮.પ૦ લાખ આરટીજીએસથી ટ્રાન્સફર થયેલા છે. દીપકભાઈએ તાત્કાલિક ડીસીબી બેન્ક પહોંચ્યા હતા અને સત્તાધીશો સમક્ષ પોતે આ પ્રકારે કોઈ ટ્રાન્ઝેકશન કરેલું નથી તેવી કેફિયત આપી હતી. બીજી તરફ, ક્રાઈમબ્રાંચને પણ આ અંગે અરજી આપી હતી. પોલીસ અને બેંક દ્વારા ફ્રોડ ટ્રાન્ઝેકશનની રકમ સ્થગિત કરી દીધી હતી. પણ આ દરમિયાનમાં એટીએમ દ્વારા રૂ.પ૦ હજાર બારોબાર ઉપાડી લેવાયા હતા. આ અંગે દીપકભાઈએ ક્રાઈમબ્રાંચમાં ફરિયાદ નોંધાવતા આઈડી એડ્રેસ શોધવાની તજવીજ હાથ ધરી છે.