1.કચ્છ ભાજપના એક સમયના પ્રમુખ અને પૂર્વ ધારાસભ્ય જયંતી ભાનુશાળીની નિર્મમ હત્યા કેસના મુખ્ય આરોપી અને વિદેશ ભાગી ગયેલા અબડાસાના માજી ધારાસભ્ય છબીલ પટેલ પોતાના ફેન કલબ નામના વ્હોટસએપ ગ્રુપમાં સક્રિય હોવાના અને ભાજપના પદાધિકારીઓને બર્થડેની શુભેચ્છા પાઠવતા હોવાના હેવાલ દિવ્ય ભાસ્કરમાં પ્રસિદ્ધ થયા હતા. 

2.પોલીસે દિવસો પૂર્વે જેને ભાજપના મોભીની હત્યાનો આરોપી ઠરાવી દેવાયો છે અને પ્રદેશ ભાજપ પ્રમુખ જીતુ વાઘાણીએ જેને ભાજપના પ્રાથમિક સભ્યપદેથી દુર કરી દીધો છે, એવા છબીલ પટેલની ફેન કલબના ગ્રુપમાં નખત્રાણા પંથકના ભાજપના હોદ્દેદારો અને પોલીસકર્મી સહિતનાઓ ફેન જ રહ્યા હતાં.

3.દિવ્યભાસ્કરમાં છબીલ પટેલ દ્વારા ભાજપના પદાધિકારીને જન્મદિનની શુભેચ્છાના સમાચાર પ્રસિદ્ધ થતાં જ આજે આ ગ્રુપ છોડી દેવામાં હોડ લાગી હતી. ગ્રુપ છોડી દેવામાં પીએસઆઇ બોડાણા, નરેશ મહેશ્વરી, બર્થડે બોય હિરેન ભટ્ટ, ચંદનસિંહ રાઠોડ, શૈલેષ મારાજ, લાલજી રામાણી વગેરેનો સમાવેશ થાય છે.

4.આ ગ્રુપમાં એક સભ્ય એવા નરેશ મહેશ્વરીને ભાજપથી કોઇ સબંધ ન હોવાનો ખુલાસો આજે જિલ્લા પંચાયતની સામાજિક ન્યાય સમિતિના ચેરમેન રહી ચૂકેલા નરેશ મહેશ્વરીએ કર્યો હતો. તેમના કહેવા મુજબ એ બીજા નરેશ મહેશ્વરી છે.