યુક્રેનમાં નવા કેબિનેટની ટૂંકમાં રચના, રાયટ પોલીસના દળનું વિસર્જન

યુક્રેનમાં પોલીસ દ્વારા પ્રજામાં વિશ્વાસનો સંચાર કર્યા પછી પશ્વિમ તરફી નવી કેબિનેટની જાહેરાત કરાશે. પદભ્રષ્ટ રાષ્ટ્રપતિ વિકટર યાનુકોવીચના વિરોધમાં ત્રણ મહિના સુધી ચળવળ માટેના કેન્દ્ર બની રહેલા રાજધાની કિવના ઈન્ડિપેન્ડન્સ સ્કવેર ખાતે નવી કેબિનેટની રચનાની જાહેરાત કરાશે.
પૂર્વ બોક્સિંગ ચેમ્પિયન વિકટર ક્લિસકોના પક્ષના સાંસદ વાલેરી પાટસ્કાને એક નિવેદનમાં જણાવ્યું હતું કે નવી સરકાર માટે અમે સાંજે સાત વાગે સ્કવેર ખાતે તૈયાર કરેલા મંચ પર આવીશું.

જોકે વચગાળાની સરકાર મહિનાઓ સુધીની ચળવળ પછી ભાગલાવાદ તથા દેવાની બેવડી સમસ્યાથી પીડાય છે.

દરમિયાન પ્રજાજનોમાં વિશ્વાસ પેદા કરવા કાર્યકારી ગૃહપ્રધાન આર્સેન આવાકોવે જણાવ્યું હતું કે સરકાર વિરોધી દેખાવકારો પર વારંવાર સપાટો બોલાવનાર રાયટ પોલીસના ઈલાઈટ યુનિટનું તેમણે વિસર્જન કર્યું છે. ભાગી ગયેલા રાષ્ટ્રપતિએ યુરોપિયન યુનિયન (ઈયુ) સાથે છેડો ફાડવાનો રશિયાની તરફેણમાં નિર્ણય કરતાં નવેમ્બર મહિનાથી સરકાર વિરોધી તોફાનો ફાટી નીકળ્યા હતા. સરકાર વિરોધી દેખાવોમાં 100 જેટલાં લોકોના મોત થયા છે.

બીજી બાજુ રશિયાના પ્રમુખ વ્લાદીમીર પુટીને ઈયુ સાથેના નજીકના સંબંધને કારણે યુક્રેન માટેના મોટા બેઈલઆઉટ પેકેજને સ્થગિત કરી દેતાં આ દેશની સમસ્યા વધુ વિકટ બની છે.