તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

ડ્રીમ સિટીમાં ટેક્સટાઇલ માટે 1200ના ભાવે જમીન આપો: ફોસ્ટા

7 વર્ષ પહેલા
  • કૉપી લિંક
ડ્રીમ સિટીમાં ટેક્સટાઇલ માટે 1200ના ભાવે જમીન આપો: ફોસ્ટા
જરી ઉદ્યોગના પ્રમોશન માટે ચેમ્બરનો પણ સાથ લેવાશે
હીરા વેપારીઓની જેમ 3200 ચૂકવવા સક્ષમ ન હોવાની રજૂઆત

સુરત: ફેડરેશન ઓફ સુરત ટેક્સટાઇલ ટ્રેડર્સ એસોસી. (ફોસ્ટા) દ્વારા આગામી 8 ફેબ્રુઆરીએ કેન્દ્રીય ઉદ્યોગ મંત્રી સહિતના અગ્રણીઓને ટેક્સટાઇલ ઝોન અંગે આવેદન પત્ર આપવાની તૈયારી કરાઈ રહી છે. આ અંગે જાણ થતા મહાનગર પાલિકાના કમિશનરે તમામ અગ્રણીઓને સર્કિટ હાઉસ ખાતે બોલાવીને મિટિંગ કરી હતી તેમજ તેમના માટે અલાયદી વ્યવસ્થાની માંગણીના તથ્યો તપાસ્યા હતા. સાથો સાથ આ મામલે ચેમ્બર મારફત વાટાઘાટો કરવાનું પણ નક્કી કરવામાં આવ્યુ છે.

ફોસ્ટાના મહામંત્રી ચંપાલાલ બોથરા સહિતના અગ્રણીઓએ સર્કિટ હાઉસ ખાતે પાલિકા કમિશનર મિલિંદ તોરવણેને જણાવ્યું હતું કે, સુરતમાં ખજોદ ખાતે બનનારા ડ્રીમ સિટી પ્રોજેક્ટમાં ટેક્સટાઇલ ઉદ્યોગકારો માટે પણ અલગ જગ્યા ફાળવવામાં આવે ખાસ કરીને ટેક્સટાઇલ ઉદ્યોગકારો હીરા ઉદ્યોગકારોની જેમ રૂ.3200ના સ્ક્વેર ફૂટના ભાવે જગ્યા ખરીદવા સક્ષમ ન હોવાથી તેમને રૂ.1200માં જમીન અપાય આ જગ્યામાં ટેક્સટાઇલ ઉદ્યોગકારો ઉપરાંત જરી ઉદ્યોગના નિકાસકારોને પણ સમાવાશે. ટેક્સટાઇલ તેમજ જરી ઉદ્યોગની નિકાસ આ સ્થળ પરથી થઇ શકે તે માટેની વ્યવસ્થા પણ ઉભી કરવાની માંગણી કરવામાં આવી છે.

ટેક્સટાઇલ ઝોન માટે નિર્ણય કરવા ફોસ્ટાના અગ્રણીઓ દ્વારા મંગળવારે સાંજે ચાર વાગ્યાના સુમારે વેપારીઓની એક બેઠક રાખવામાં આવી છે જેમાં આ મામલે વધારે સ્પસ્ટતા સાથે આવેદનપત્ર તૈયાર કરાશે. પાલિકા દ્વારા આ મુદ્દે ચેમ્બરને સાથે રાખીને દરખાસ્ત મેળવવાથી માંડીને અન્ય કાર્યવાહી માટેની રૂપરેખા તૈયાર કરવાની પણ તજવીજ હાથ ધરાઈ છે.
પાલિકા 20 કરોડ, સુડા 5 કરોડ અપાશે
હીરા ટેક્સટાઇલ તેમજ જરી ઉદ્યોગના પ્રમોશન માટે પ્લાન થઇ રહેલા ડ્રીમ સિટી પ્રોજેક્ટમાં પાલિકા દ્વારા પણ તેનું યોગદાન અપાશે. પાલિકા દ્વારા આ પ્રોજેક્ટમાં રૂ.20 કરોડ ફાળવવામાં આવશે જ્યારે સુરત અર્બન ડેવલપમેન્ટ ઓથોરીટી (સુડા) દ્વારા પણ રૂ.5 કરોડનું યોગદાન આપવામાં આવશે.