મિત્રને વેચેલી કારની RC બૂક લઈ ભળતી કાર ફેરવતો યુવક ઝડપાયો

ડુમસરોડ પરથી પોલીસે બોગસ નંબર પ્લેટ અને આરસીબુકનો ઉપયોગ કરી કાર ફેરવતા એક યુવકને ઝડપી પાડ્યો હતો. તે મિત્રને વેચેલી કારની આરસી બુકનો ઉપયોગ કાર માટે કરી રહ્યો હતો તથા બોગસ નંબર પ્લેટવાળી કાર મંુબઈ રહેતા તેના મામાએ મોકલી હોવાનું બહાર આવતાં પોલીસે બંને સામે ગુનો નોંધ્યો છે.

પીપલોદ ડુમસ રોડ પર ઝોન-2 સ્કોડે બાતમીના આધારે ઈન્ડોર સ્ટેડિયમ નજીક મેઘમયુર એપાર્ટમેન્ટ ખાતે રહેતા અને કારના શોરૂમમાં નોકરી કરતા જતીન બલીયાને ઝડપી પાડ્યો હતો. પોલીસે કારના દસ્તાવેજની માંગણી કરતા તેણે પોતાના મિત્ર મુશ્તાક શેખને વેચી દીધેલી કારની આરસીબુક રજૂ કરી હતી. પોલીસે પુછપરછ કરતા તેની પાસેથી મળી આવેલી કાર તેને મુંબઈ મલબારહીલ નવયુગ નિકેતન એપાર્ટમેન્ટમાં રહેતા તેના મામા પંકજ ઠક્કરે ત્યાંથી નંબર પ્લેટ બદલીને મોકલી હોવાનું જતીને જણાવતાં પોલીસે બંને સામે ગુનો નોંધી જતીનની ધરપકડ કરી હતી. પોલીસે પ્રકરણમાં પંકજની શોધખોળ શરૂ કરી છે. નજીકના દિવસોમાં કાર ચોરીનું મોટુ કૌભાંડ બહાર આવે તેવી શક્યતા છે.

બોગસ નંબર પ્લેટવાળી કાર મુંબઈ રહેતા મામાએ મોકલી હતી