ગચ્છાધિપતિ આચાર્ય અભયદેવસૂરિનું 25મીએ સવારે સુરતમાં સામૈયું કરાશે

સુરતમાં ગચ્છાધિપતી આચાર્ય અભયદેવસૂરિ મહારાજનાં આશીર્વાદથી આચાર્ય મોક્ષરત્નસૂરિ મહારાજે પાલ ગુરૂરામ પાવનભૂમિમાં અંજનશલાકા મહોત્સવની પત્રિકા રવિવારે લખી હતી. આ પ્રસંગે બે હજારથી વધુ શ્રાવકો ઉપસ્થિત રહ્યાં હતા. સમગ્ર મહોત્સવનો પ્રારંભ 7 ફેબ્રુઆરીથી થઈ રહ્યો છે, તજેમાં 14 ફેબ્રુઆરીએ પરમાત્માની પ્રતિષ્ઠા કરાશે.

ગુરૂ રામસૂરિ સમુદાયના ગચ્છાધિપતી આચાર્ય અભયદેવસૂરિ મહારાજ બોરસદથી વિહાર કરી સુરત 25મીએ પધરામણી કરશે. આ અંગે આચાર્ય મોક્ષરત્નસૂરિ મહારાજે કહ્યું કે આચાર્ય અભયદેવસૂરિ મહારાજની નિશ્રામાં ગુરૂ રામસૂરિ મહારાજની યાદમાં ગુરૂરામ પાવનભૂમિ પર ફેબ્રુઆરી મહિનામાં જિનાલયનો અંજનશલાકા મહોત્સવ શરૂ થવાનો છે. આ નિમિત્તે ગચ્છાધિપતી આચાર્ય અભયદેવસૂરિ મહારાજ 25મીએ સુરત પધરામણી કરશે. આ પ્રસંગે સવારે 9 કલાકે સામૈયા સાથે ગુરૂ ભગવંતોનો પ્રવેશ કરાશે. ત્યારબાદ 1 જાન્યુઆરી સુધી દીક્ષા મહોત્સવ ચાલવાનો છે. 26 જાન્યુઆરીએ સવારે 9 કલાકે વિવિધ સંકુલોની તકતીનું અનાવરણ કરાશે અને ઘરે ઘરે તોરણ અપાશે. 30મીએ સવારે 6 કલાકે કૈલાસનગર જૈન સંઘથી ગુરૂરામ દર્શન યાત્રા પાલ પહોંચશે. ત્યારબાદ ગુરૂરામસૂરિના જન્મદિન મહાસુદ પાંચમ નિમિત્તે ગુણાનુવાદ સભા યોજાશે. બપોરે 1.30 કલાકે પાદૂકાપૂજન અને રાતે 8 કલાકે ભાવનાના કાર્યક્રમો. 31મીએ સવારે 5.30 કલાકે શક્રસ્તવ અભિષેક ત્યારબાદ ચાર મુમુક્ષુઓની વરસીદાન શોભાયાત્રા નીકળશે. સવારે 10.30 કલાકે બેઠુ વરસીદાન, સાંજે 4.30 કલાકે અંતિમ વાયણું કરી રાતે 8 કલાકે વિદાય સમારોહ યોજાશે. મહા સુદ સાતમ 1 ફેબ્રુઆરીએ 4 મુમુક્ષુઓની દીક્ષાનો સવારે 8 કલાકે પ્રારંભ થશે. 2 ફેબ્રુઆરીએ સુરત શહેર પોલીસના પરિવારજનો માટે સર્વરોગ નિદાન કેમ્પ સાથે સમારોહનું સમાપન કરાશે.