નવસારી કૃષિ યુનિ.નું નેશનલ લેવલે ગૌરવ વધારતા એગ્રી બિઝનેસ મેનેજમેન્ટ ઇન્સ્ટિટ્યૂટ વિદ્યાર્થીઓ

નવસારી | નવસારી કૃષિ યુનિવર્સિટીની અસ્પી એગ્રી બિઝનેસ મેનેજમેન્ટ ઇન્સ્ટિટ્યૂટનાં 11 વિદ્યાર્થીઓએ તામિલનાડુ કૃષિ યુનિવર્સિટી, કોઈમ્બતુર, તામિલનાડુ ખાતે યોજાયેલી રાષ્ટ્રીય કક્ષાની 12મી એગ્રી બિઝનેસ મીટ ‘પ્રબંધાઝ 2020’ સ્પર્ધામાં ભાગ લીધો હતો. આ સ્પર્ધામાં દેશની 8 જેટલી ખ્યાતનામ કૃષિ યુનિવર્સિટીઓ અને મેનેજમેન્ટ મહાવિદ્યાલયોએ પણ ભાગ લીધો હતો. આ સ્પર્ધામાં માર્કેટીંગ, હ્યુમન રીસોર્સ મેનેજમેન્ટ, ફાઇનાન્સિયલ મેનેજમેન્ટ, ઇનોવેટીવ બિઝનેસ પ્લાન અને ઓપરેશન રિસર્ચ જેવી અલગ અલગ સબ- સ્પર્ધાઓ યોજાઇ હતી. અત્રે ઉલ્લેખનીય છે કે નવસારી કૃષિ યુનિવર્સિટીનાં એમબીએ એગ્રી બિઝનેસ મેનેજમેન્ટ ઇન્સ્ટિટ્યૂટ વિદ્યાર્થીઓએ આ પૈકીની ફાયનાન્સિયલ મેનેજમેન્ટ, માર્કેટિંગ મેનેજમેન્ટ અને ઇનોવેટીવ બિઝનેસ પ્લાનની સ્પર્ધામાં પ્રથમ સ્થાન મેળવીને ‘ઓવરઓલ વિજેતા-પી.જી ચેમ્પિયન’ થયા હતા અને સમગ્ર યુનિવર્સિટી અને ગુજરાતનું ગૌરવ વધાર્યું છે.