2023માં ભારતીય સ્પોર્ટ્સમાં 5 અપેક્ષા:ક્રિકેટમાં યશસ્વી-યાસ્તિકા પર રહેશે નજર, વેઇટલિફ્ટિંગમાં 20 વર્ષીય જેરેમી પાસે મેડલની આશા

આજે વર્ષ 2023નો પહેલો દિવસ છે અને અમે તમારા દિવસની શરૂઆત નવી આશાઓ સાથે કરવા જઈ રહ્યા છીએ. એટલા માટે આજે અમે તમારી સમક્ષ એવા સ્પોર્ટ્સ સ્ટાર્સની સ્ટોરી લાવ્યા છીએ જેઓ 2023માં ભારતની નવી આશા બનશે અને સ્પોર્ટ્સ જગતમાં પોતાનું ગૌરવ ફેલાવશે.

આ વાર્તામાં, અમે તે સ્ટાર્સ વિશે વાત કરી જે 25 વર્ષથી ઓછી ઉંમરના છે. જેઓ ભારતીય રમતોનું ભવિષ્ય છે... આપણે જાણીશું કે આ સ્ટાર્સે 2022માં કઈ સિદ્ધિઓ હાંસલ કરી છે અને 2023માં તેઓ કયા નવા રેકોર્ડ બનાવી શકે છે.

1.લક્ષ્ય સેન
બેડમિન્ટન સ્ટાર લક્ષ્ય સેનનું નામ ચર્ચામાં રહ્યું. તે 2022માં ભારતીય ટીમનો હિસ્સો હતા જેણે 73 વર્ષમાં પ્રથમ વખત થોમસ કપ જીત્યો હતો. ફાઈનલની પ્રથમ સિંગલ્સ મેચમાં લક્ષ્યે એન્થોની સિન્સુકા ગિંટીંગને 8-21, 21-17, 21-16થી હરાવ્યો હતો. આ પહેલાં લક્ષ્યએ જુલાઈ-ઓગસ્ટમાં કોમનવેલ્થ ગેમ્સમાં ગોલ્ડ જીત્યો. માત્ર 21 વર્ષની ઉંમરમાં લક્ષ્યે આ રમતમાં પોતાની ધાક જમાવી લીધી છે. ઓલ ઇંગ્લેન્ડ ઓપન બેડમિન્ટનમાં મેડલ જીતનાર તેઓ ત્રીજા ભારતીય પુરુષ ખેલાડી છે. તેમણે 21 વર્ષ પછી ભારતમાં મેન્સ કેટેગરીમાં મેડલ અપાવ્યો.

2023માં નજર...
નવા વર્ષની શરૂઆત ઈન્ડિયા ઓપનમાં હિસ્સો લઈને કરશે. 2023માં તેમની નજર ઓલ ઈંગ્લેન્ડ સુપર 1000માં મેડલના રંગમાં ફેરફાર કરવા પર હશે. છેલ્લી વખત ભારતે 2001માં પુલેલા ગોપીચંદ દ્વારા ઓલ ઈંગ્લેન્ડ ઓપન જીત્યું હતું. હવે લક્ષ્ય પાસે જીતની આશા છે.

2.જેરેમી લાલરીનુંગાએ
મિઝોરમના આ વેઈટ લિફ્ટરે કોમનવેલ્થમાં મેડલ જીત્યો હતો. વર્ષની શરૂઆતમાં જેરેમીને કરોજરજ્જુમાં ઈજા થઈ હતી, પરંતુ ભારતીય આર્મીના નાયબ સૂબેદારે પોતાની મહેનતના બળ પર વાપસી કરી હતી. આ પહેલાં જેરેમીએ 2018માં આર્જેન્ટિનામાં યોજાયેલી યુથ ઓલિમ્પિકમાં પણ ગોલ્ડ જીત્યો હતો.

2023માં નજર...
જેરેમી માટે આ વર્ષ મહત્ત્વનું રહેશે. જેરેમી મે 2023માં એશિયન ચેમ્પિયનશિપમાં ઊતરશે. ત્યાર પછી સપ્ટેમ્બરમાં 19મી એશિયન ગેમ્સમાં ભાગ લેશે. આમાં તે એશિયાના ટોચના વેઈટલિફ્ટર્સ સાથે સ્પર્ધા કરશે. આ મહિને IWF વેઈટલિફ્ટિંગ ચેમ્પિયનશિપ પણ યોજાશે, જે ઓલિમ્પિક માટે ક્વોલિફિકેશન ઈવેન્ટ પણ છે.

3.યશસ્વી જયસ્વાલ
મુંબઈના ક્રિકેટર યશસ્વી જયસ્વાલ માટે વર્ષ 2022 શાનદાર રહ્યું. આ વર્ષે તેમણે રણજી ટ્રોફીની 10 મેચમાં 1270 રન બનાવ્યા. સાથે જ મુશ્તાક અલી ટ્રોફીની 10 મેચમાં 141.49ની સ્ટ્રાઈક રેટથી 266 રન બનાવ્યા. વિજય હજારે ટ્રોફીમાં 6 મેચમાં 79.20ની એવરેજથી 396 રન બનાવ્યા. ઈન્ડિયા Aમાં યશસ્વીનું પ્રદર્શન શાનદાર રહ્યું. તેમણે બાંગ્લાદેશ A વિરુદ્ધ તેમની ધરતી પર 146 રનની ઈનિંગ રમી.

2023 પર નજર...
ડોમેસ્ટિક ક્રિકેટમાં તેમના શાનદાર પ્રદર્શનને ધ્યાનમાં રાખીને તેમને 2023માં રાષ્ટ્રીય ટીમમાં લેવામાં આવી શકે છે. આ ઉપરાંત તેઓ રાજસ્થાન રોયલ્સ તરફથી IPL રમતા જોવા મળશે. એવી અપેક્ષા છે કે તેઓ થોડાં વર્ષોમાં ભારત માટે વર્લ્ડ કપ પણ રમતા જોવા મળી શકે છે.

4.યાસ્તિકા ભાટિયા
ભારતીય મહિલા ક્રિકેટ ટીમ સાથે કોમનવેલ્થ ગેમ્સની સિલ્વર મેડલ વિજેતા ટીમનો ભાગ હતી. તેમણે રાષ્ટ્રીય ટીમમાં પોતાનું સ્થાન નિશ્ચિત કર્યું છે. મિડલ ઓર્ડર બેટર યાસ્તિકાએ ODI કરિયરમાં 16 મેચમાં 376 રન બનાવ્યા હતા.

2023 પર નજર...
યસ્તિકા 2023માં દક્ષિણ આફ્રિકા અને વેસ્ટ ઈન્ડિઝ સામેની ત્રિકોણીય શ્રેણીમાં ભાગ લેશે. આ પછી તે મહિલા ટી20 વર્લ્ડ કપ પણ રમશે. આ સાથે તે મહિલા IPLમાં પોતાનું શાનદાર પરફોર્મન્સ આપશે.

5. અર્શદીપ સિંહ
અર્શદીપ માટે 2022 T20 વર્લ્ડ કપમાં પાકિસ્તાન સામેની મેચ હાઇલાઈટ રહી. MCGમાં પાકિસ્તાન વિરુદ્ધ અર્શદીપે વર્લ્ડ કપની પોતાની પહેલી મેચ રમી હતી. મેચની પહેલી ઓવરમાં જ અર્શદીપે સ્વિંગ અને સ્પીડથી પાકિસ્તાનની ઓપનિંગ જોડીને પેવેલિયન મોકલી દીધી હતી. પહેલી ઓવરમાં બાબરને આઉટ કર્યો. પછી રિઝવાનની વિકેટ લીધી.

ઓસ્ટ્રેલિયામાં રમાયેલા T20 વર્લ્ડ કપમાં અર્શદીપે સિંહ ભારતના સૌથી સફળ બોલર રહ્યા. ભારત તરફથી તેમણે સૌથી વધુ વિકેટ લીધી હતી. કુલ 6 મેચમાં 10 વિકેટ લીધી હતી. તેમના સિવાય હાર્દિક પંડ્યાએ 8 અને અશ્વિને 6 વિકેટ લીધી. અર્શદીપે 2022માં કુલ 33 વિકેટ લીધી.

2023 પર નજર...
અર્શદીપના શાનદાર પરફોર્મન્સને જોતા તેમને વન-ડે ટીમમાં સામેલ કરવામાં આવી શકે છે. સાથે જ IPLમાં પંજાબ કિંગ્સની ટી-શર્ટમાં રમતા જોવા મળશે. તેમના ખભે ટીમની બોલિંગ લાઈનઅપ સંભાળવાની જવાબદારી રહેશે.