વિશ્વભરના સમાચારો તસવીરોમાં:ક્રિસમસ માસ પૂર્વે ચર્ચમાં ડિસઈન્ફેક્ટન્ટનો છંટકાવઃ સાઉથ જ્યોર્જિયા નજીક વિશાળ હિમશિલા તૂટી; હવાઈમાં બન્યું લાવાનું તળાવ

ક્રિસમસ સેલિબ્રેશન

સાઉથ જ્યોર્જિયા નજીક હિમશિલા તૂટી, વિજ્ઞાનીઓ ચિંતિત

હવાઈના જ્વાળામુખીમાં ભયાનક વિસ્ફોટ, ભભૂકતા લાવાનું બન્યું તળાવ
હવાઈ ટાપુના એક જ્વાળામુખીમાં લાવા 3 ફૂટ પ્રતિ કલાકની ઝડપે વધી રહ્યો હતો. આખરે જ્વાળામુખીમાં વિસ્ફોટ શરૂ થઈ ગયા અને તેના કારણે 82 ફૂટની ઊંચાઈ સુધી લાવા ઉડી રહ્યો છે. જેના કારણે જ્વાળામુખી આસપાસ એક ભભૂકતા લાવાનું એક તળાવ સર્જાઈ ગયું છે. આ કિલાએવા જ્વાળામુખીમાં 1952થી અત્યાર સુધીમાં 54 વખત વિસ્ફોટ થઈ ચૂક્યા છે.

દાર્જિલિંગમાં ક્રિસમસથી જોયરાઈડ ફરી શરૂ થશે
નોર્થઈસ્ટ ફ્રન્ટીયર રેલવે (એનએફઆર) દ્વારા પશ્ચિમ બંગાળમાં દાર્જિલિંગ અને ઘૂમ સ્ટેશનો વચ્ચે ટોય ટ્રેન જોયરાઈડ ક્રિસમસથી ફરી શરૂ કરાશે. અગાઉ કોવિડ-19 મહામારીના કારણે આ ટોયટ્રેન બંધ કરવામાં આવી હતી.

અમેરિકામાં બરફનું તોફાન
અમેરિકામાં સાઉથ ડાકોટા તથા મિનિયાપોલિસ ખાતે બરફનું તોફાન ત્રાટક્યું છે, જેને કારણે તાપમાન શૂન્ય ડીગ્રી સે.થી પણ નીચે પહોંચી ગયું છે. મિનિયાપોલિસ અપર મિડવેસ્ટનું સૌથી વ્યસ્ત ટ્રાવેલ હબ છે, જ્યાં ઓછામાં ઓછી 330 ફ્લાઈટ્સ રદ થઈ છે અથવા તો વિલંબિત થઈ છે. જ્યારે બરફના થર જામતાં અનેક હાઈવે પણ બંધ કરી દેવાયા છે.

મરિયમ નવાઝે ઈમરાન ખાનને ઘેર્યા
પાકિસ્તાનના પૂર્વ વડાપ્રધાન નવાઝ શરીફની પુત્રી મરિયમ નવાઝે વડાપ્રધાન ઈમરાન ખાન પર તેમના જ એક નિવેદનના આધારે નિશાન તાક્યું છે. મરિયમે કહ્યું, ‘ઈમરાન પોતે કહી રહ્યા છે કે તેઓ પીએમ બનવા તૈયાર નહોતા તો તેઓ શેરવાની પહેરીને તૈયાર કેમ થઈ ગયા?

બેબી ડોલ્ફિનને બચાવાઈ
દુનિયાભરમાં અદ્ભુત જળચર પ્રાણીઓમાં સામેલ એક ડોલ્ફિનને બચાવવામાં આવી, આ બેબી ફ્રાન્સિસ્કોના ડોલ્ફિન સાન ક્લેમેન્ટે ડેલ ટુયુના સમુદ્રકિનારે ઘસડાઈ આવી હતી, જેને મુંડો મરીનો ફાઉન્ડેશનના કર્મચારીઓએ બચાવી લીધી હતી.

દેશભરમાં શીત લહેર
દેશમાં શિયાળો જમાવટ કરી રહ્યો છે. ગુજરાતમાં હાડ થીજવતી ઠંડી પડી રહી છે, તો રાજસ્થાનથી લઈને મધ્યપ્રદેશમાં ઠંડીથી કોઈ જ રાહત મળશે તેવી શક્યતા જોવા નથી મળી રહી. પંજાબમાં આગામી 2 દિવસ સુધી શીતપ્રકોપની સાથે ભારે ધુમ્મસભર્યું વાતાવરણ જોવા મળશે. બિહારમાં પણ ઠંડીના પગલે બે દિવસનું ઓરેન્જ અલર્ટ જાહેર કરવામાં આવ્યું છે.

કોરોના વાઇરસનો કહેર, યુકે છોડવાની લાગી હોડ
યુકેમાં કોરોના વાઇરસનો નવો સ્ટ્રેન જોવા મળ્યા પછી લોકો યુકે છોડી દેવા એરપોર્ટ્સ પર ભીડ જમાવી રહ્યા છે. વિશ્વભરમાં અનેક દેશોએ યુકેથી આવતી ફ્લાઈટ્સ પર પ્રતિબંધ મૂક્યો છે, પરંતુ હજુય જ્યાં પણ જઈ શકાય છે એવા દેશોમાં પહોંચી જવા માટે યુકેમાં વસતા લોકોએ દોડધામ મચાવી છે.

નાઈટ કર્ફ્યૂમાં મુંબઈમાં સૂમસામ સન્નાટો
દિવસ-રાત ધમધમતા મુંબઈ શહેરની રોનક રાત્રે તો કંઈક ઓર હોય છે, પણ કોરોના વાઇરસનો કહેર એવો છે કે જાણે બધું થંભી ગયું છે. મુંબઈમાં નાઈટ કર્ફ્યૂએ અહીંની નાઈટ લાઈફની રોનક છીનવી લીધી છે.

પેરૂમાં ફાર્મવર્કર્સ વીફર્યા, નવા કૃષિ બિલનો ઉગ્ર વિરોધ
ભારતમાં નવા 3 કૃષિ બિલના વિરોધમાં લગભગ છેલ્લા એક મહિનાથી ખેડૂતો દિલ્હી બોર્ડર પર હજારોની સંખ્યામાં એકત્ર થઈને દેખાવો કરી રહ્યા છે અને કેન્દ્ર સરકારને ભીડવવાની કોશિશ કરી રહ્યા છે, પરંતુ હિંસાનો માર્ગ અપનાવ્યો નથી. આવી જ કંઈક સ્થિતિ પેરૂમાં જોવા મળી છે. પેરૂમાં ખેતરોમાં કામ કરતા કામદારોએ નવા એગ્રિકલ્ચરલ પ્રમોશન લૉનો વિરોધ શરૂ કર્યો છે, જેમાં પોલીસ સાથે અથડામણના તો કેટલાંક સ્થળે આગચંપીના બનાવો પણ બન્યા છે.

ઝૂમાં પ્રાણીઓને અપાઈ નાતાલની ટ્રીટ
છેલ્લા એક વર્ષથી દુનિયાભરમાં કોરોના વાઇરસનો કહેર વરસી રહ્યો છે. સમગ્ર દુનિયામાં નાતાલ પર્વ આડે બે દિવસ રહ્યા છે, પરંતુ કોરોના વાઇરસનો ભય એવો છે કે મોટા ભાગના લોકોએ પોતપોતાનાં ઘરોમાં જ નાતાલની ઉજવણી કરીને સંતોષ માની લેવો પડશે. સૌના જીવનમાં કોરોના વાઇરસે ઊથલપાથલ મચાવી દીધી છે અને મોટા ભાગનાં જાહેર સ્થળો બંધ રાખવામાં આવ્યાં છે.

એવામાં વિશ્વભરમાં અનેક પ્રાણીસંગ્રહાલયો પણ હજુ બંધ જ છે. જોકે અનેક ઝૂમાં રહેતાં પ્રાણીઓની નાતાલ મોજમજાથી પસાર થવાની છે. યુકે, અમેરિકા, ઓસ્ટ્રેલિયા સહિતના દેશોમાં વિવિધ પ્રાણીસંગ્રહાલયોમાં પ્રાણીઓને નાતાલની ભેટસોગાદ સાન્તા ક્લોઝ દ્વારા આપવામાં આવી રહી છે તો ક્યાંક પ્રાણીઓને ભેટની સાથે સંગીતની મોજ પણ માણવા મળી રહી છે. લાઈટ શો તથા રોશની દ્વારા આ પ્રાણીસંગ્રહાલયોને શણગારવામાં આવ્યાં છે, જ્યારે થાઈલેન્ડમાં તો હાથીઓને જ સાન્તા ક્લોઝ બનાવી દેવાયા છે. હાથીઓ દ્વારા સ્કૂલના વિદ્યાર્થીઓમાં ફેસ માસ્ક વહેંચીને કોરોના અંગેની જાગૃતિ ફેલાવવાનો પ્રયાસ કરાયો છે. કોરોનાકાળમાં નાતાલ પર્વની ઉજવણી જ આ રીતે સમૂળગી બદલાઈ ગઈ છે.