ઉપરાષ્ટ્રપતિ જગદીપ ધનખડનો સવાલ...:સંસદે બનાવેલા કાયદા પર સુપ્રીમની મહોર કેમ જરૂરી?

રાજસ્થાન વિધાનસભામાં બુધવારથી અખિલ ભારતીય પ્રિસાઇડિંગ ઓફિસર્સની 83મી કોન્ફરન્સ શરૂ થઈ છે. આમાં ઉપરાષ્ટ્રપતિ જગદીપ ધનખડ સાથે લોકસભા અધ્યક્ષ ઓમ બિરલાની સાથે દેશભરના વિધાનસભાના અધ્યક્ષ અને વિધાન પરિષદના અધ્યક્ષોએ ભાગ લીધો હતો. કોન્ફરન્સમાં સંસદ દ્વારા બનાવેલા કાયદાઓ પર કોર્ટના હસ્તક્ષેપ અંગે ખુલ્લી ચર્ચા કરવામાં આવી હતી.

ઉપરાષ્ટ્રપતિ, લોકસભા સ્પીકર, રાજસ્થાનના સીએમ અશોક ગેહલોત અને વિધાનસભાના સ્પીકર સી.પી. જોશીએ કહ્યું કે કોર્ટના કામ તેની મર્યાદામાં જ થવા જોઈએ.ઉપરાષ્ટ્રપતિ ધનખડે કહ્યું કે સંસદ કાયદો બનાવે છે અને સુપ્રીમકોર્ટ તેને રદ કરી દે છે. શું સંસદે બનાવેલો કાયદો ત્યારે જ કાયદો બનશે જ્યારે તેને કોર્ટની મંજૂરી મળે? 1973માં ખોટી પરંપરા શરૂ થઈ હતી. કેશવાનંદ ભારતી કેસમાં સુપ્રીમે આદેશ આપ્યો હતો કે સંસદ બંધારણમાં સુધારો કરી શકે છે, પરંતુ મૂળભૂત માળખામાં ફેરફાર કરી શકતી નથી. તેણે કહ્યું, હું આ સાથે સહમત નથી. શું એવી મંજૂરી આપી શકાય કે કોઈ અન્ય સંસ્થા સંસદના નિર્ણયની સમીક્ષા કરે?

અંતિમ સત્તા સંસદ પાસે છે. જો અન્ય કોઈ સંસ્થા સંસદના કાયદાને અમાન્ય કરે તો તે લોકશાહી માટે સારું નથી. ધનખડે કહ્યું કે, 2015માં જ્યુડિશિયલ એકાઉન્ટેબિલિટી એક્ટ પસાર કરવામાં આવ્યો હતો. 16 ઓક્ટોબર 2015ના રોજ તેને સુપ્રીમકોર્ટે ફગાવી દીધો હતો. દુનિયામાં ક્યાંય આવું બન્યું નથી. કારોબારી અને ન્યાયતંત્ર પાસે કાયદો બનાવવાની સત્તા નથી. લોકસભા સ્પીકર બિરલાએ કહ્યું, અમે ન્યાયતંત્રનું સન્માન કરીએ છીએ. બંધારણે જે ગૌરવ આપ્યું છે, આપણે તેનું પાલન કરીએ છીએ અને ન્યાયતંત્રે પણ તેનું પાલન કરવું જોઈએ.