સ્વાહા...:ઠંડી દૂર કરવા લાખોની કડકડતી નોટો અને સોના-ચાંદીના દાગીનાનું કરી દીધું તાપણું, સાથે 2 એન્ડ્રોઇ ફોન પણ હતા

શિયાળામાં લોકો ઠંડી દૂર કરવા વિવિધ ઉપાય કરતા હોય છે, પરંતુ ઉત્તરપ્રદેશના મહોબા જિલ્લામાં એક માનસિક વિકલાંગ વ્યક્તિએ ઠંડી દૂર કરવાનો જે ઉપાય કર્યો છે એ દરેકને આશ્ચર્ય કરે એવો છે. મહોબા શહેરના કોતવાલી વિસ્તારના જૂના શાકભાજી માર્કેટમાં એક માનસિક વિકલાંગ વ્યક્તિએ ઠંડીથી બચવા માટે 500-500ની નોટો આગમાં સળગાવી દીધી છે. બુંદેલખંડ જેવા વિસ્તારોમાં ખૂબ ગરીબી જોવા મળે છે, એવા સમયે અહીં આ પ્રકારની ઘટના સામે આવતાં આ લોકોમાં ચર્ચાનો વિષય બન્યો છે.

આસપાસના સ્વચ્છતા કાર્યકર્તાઓના જણાવ્યા પ્રમાણે, આ વ્યક્તિએ કચરાના ઢગલામાં લાખોની રોકડ, બે એન્ડ્રોઈડ ફોન, સોના-ચાંદીના દાગીના અને એક તેજ હથિયાર સળગાવી દીધાં છે. આસપાસના લોકોનું કહેવું છે કે આ વ્યક્તિ પહેલેથી પાગલ છે અને તે અહીં-તહીં ફરતી રહેતી હોય છે. આ ઘટના પછી પણ તે હસતો રહે છે અને કહે છે કે શું કરું, મને ઠંડી લાગી તો જે મળ્યું એને સળગાવીને ઠંડીથી છુટકારો મેળવી લીધો.

ઘટનાની માહિતી મળતાં જ પોલીસ ઘટનાસ્થળે પહોંચી ગઈ અને તેમણે તપાસ શરૂ કરી દીધી છે. પોલીસે આ મામલે ઘણા મુદ્દાઓને ધ્યાનમાં રાખીને તપાસ શરૂ કરી દીધી છે, પરંતુ મુખ્ય સવાલ એ ઊભો થાય છે કે આ પાગલ માણસ પાસે આટલીબધી રોકડ અને દાગીના આવ્યા ક્યાંથી. જોકે હવે આ વિચિત્ર ઘટના વિશે પોલીસ અને પ્રશાસન પણ કઈ બોલવા તૈયાર નથી.