ગડકરીને જાનથી મારવાની ધમકી:કેન્દ્રીય મંત્રી નીતિન ગડકરીની નાગપુર ઓફિસના લેન્ડ લાઇનમાં ઉપરા ઉપરી ફોન આવ્યા

કેન્દ્રીય મંત્રી નીતિન ગડકરીને જાનથી મારી નાખવાની ધમકી મળી છે. કોઈ વ્યક્તિએ એક કલાકમાં ત્રણ વખત નાગપુર ઓફિસના લેન્ડ લાઈનમાં ફોન કરીને આ ધમકી આપી હતી. મીડિયા રિપોર્ટ્સ અનુસાર ફોન કરનારે ખંડણી પણ માંગી છે. પોલીસે ફોન કરનારનો ફોન ટ્રેસ કર્યો છે. આ કોલ કર્ણાટકના અમુક વિસ્તારમાંથી કરવામાં આવ્યો હતો. પોલીસે આરોપીને પકડવા તજવીજ હાથ ધરી છે.

સવારે 11:40 થી 12:40 વચ્ચે ફોન આવ્યા
નીતિન ગડકરીની નાગપુરની ઓફિસમાં સવારે 11:40 થી 12:40 વચ્ચે એક કલાકમાં ત્રણવાર ધમકીના ફોન આવ્યા હતા. જો કે શરૂઆતની દસ મિનિટમાં જ બે ફોન આવ્યા હતા. ગડકરીની ઓફિસ તરફથી પોલીસ ફરિયાદ કરવામાં આવી છે. કેન્દ્રીય મંત્રીનું કાર્યાલય નાગપુરમાં ખામલા ચોકમાં આવેલું છે અને આ ઓફિસથી તેમનું ઘર માત્ર એક કિલોમીટરના અંતરે છે.

ગડકરીએ સરકાર સામે તીર તાંક્યું હતું
પાંચ મહિના પહેલાં ભાજપના સંસદીય બોર્ડમાંથી કેન્દ્રીય મંત્રી નીતિન ગડકરીને હટાવાયા બાદથી જ તેના અનેક અર્થ કાઢવામાં આવી રહ્યા છે. આ દરમિયાન નીતિન ગડકરીએ કેન્દ્રની ભાજપ સરકાર વિરુદ્ધ એક મોટું નિવેદન આપ્યું છે.

તેમણે કહ્યું કે સરકાર સમયસર નિર્ણયો કરતી નથી તે જ સૌથી મોટી સમસ્યા છે. નીતિન ગડકરીએ તેમના આ નિવેદનથી કેન્દ્ર સરકાર પર સીધા પ્રહાર કર્યા હતા. તેમણે કહ્યું કે આ સમય ખૂબ જ મહત્ત્વપૂર્ણ છે. સમય જ આપણું અસલ ધન છે અને સરકાર વિકાસનાં કાર્યોને લઈને સમયસર નિર્ણયો લઈ રહી નથી, તે એક મોટી સમસ્યા છે. ગડકરીએ આ ટિપ્પણી નેશનલ કન્વેન્શન ઓફ સિવિલ એન્જિનિયર્સના સંમેલનમાં કરી હતી.