ઈન્દોરમાં કારચાલકની ગુંડાગીરી, VIDEO:કોન્સ્ટેબલને બોનેટ પર લટકાવી 4 કિમી સુધી ગાડી દોડાવી, રસ્તાની વચોવચ ટ્રક મૂકીને અટકાવ્યો

ઈન્દોરમાં ચેકિંગ દરમિયાન એક ટ્રાફિક પોલીસકર્મીનો જીવ માંડ માંડ બચ્યો હતો. હકીકતમાં જ્યારે એક પોલીસકર્મીએ કારચાલકને રોકવાનો ઈશારો કર્યો તો તે ભાગવા લાગ્યો. આ જોઈને પોલીસકર્મી પણ કારના બોનેટ પર લટકી ગયો. ત્યારપછી પણ કારચાલકે કાર રોકી નહીં અને પોલીસકર્મીને લગભગ 4 કિલોમીટર સુધી ચલાવતો રહ્યો. બાદમાં અન્ય પોલીસકર્મીઓએ કારનો પીછો કરી અન્ય સાથીદારોની મદદથી રસ્તાની વચોવચ ટ્રક મૂકીને કારચાલકને અટકાવ્યો હતો. આરોપી કારચાલકની ધરપકડ કરવામાં આવી છે. તેની પાસેથી એક પિસ્તોલ મળી આવી છે. આ સમગ્ર ઘટનાનો વીડિયો સામે આવ્યો છે.

હેડ કોન્સ્ટેબલે કહ્યું- મેમો આપવાની વાત કરતા કાર દોડાવી
હેડ કોન્સ્ટેબલ શિવ સિંહે જણાવ્યું કે કારચાલક દેવાસ નાકાથી ગાડી ચલાવતી વખતે મોબાઈલ પર વાત કરતો જોવા મળ્યો હતો.ગાડી રોકાવી અને મેમો ફાડવાનું કહેતાં તે પાછો કારમાં બેસી ગયો અને ભાગવાનો પ્રયાસ કર્યો. તેને રોકવા હું પણ કૂદીને કારના બોનેટ પર લટકી ગયો.

મેં બંને હાથ વડે બોનેટ પકડી રાખ્યું. આ દરમિયાન ક્યારેક બ્રેક લગાવીને તો ક્યારેક કટ કરીને તેને પાડવાનો પ્રયાસ કર્યો હતો. જેથી હું ઉછળીને પડી જાઉં પણ મેં મારી બધી તાકાતથી બોનેટ બંને હાથે પકડી રાખ્યું હતું. દરમિયાન સાથી સુરેન્દ્ર સિંહ બુલેટથી પીછો કરતા ત્યાં પહોંચ્યા હતા. અહી ટ્રક અને અન્ય વાહનચાલકોની મદદથી વાહનો લગાવીને કારચાલકને અટકાવ્યો હતો.

આરોપી પાસેથી લાઇસન્સવાળી પિસ્તોલ મળી આવી
ટ્રાફિકકર્મી સુરેન્દ્ર સિંહે જણાવ્યું કે આરોપી પાસેથી એક લાઇસન્સવાળી પિસ્તોલ મળી આવી છે. હેડ કોન્સ્ટેબલનો જીવ બચી ગયો. તેમણે આરોપીઓને ભાગવા ન દીધો અને પોતાના જીવની પરવા કર્યા વગર ફરજ બજાવી. લગભગ 4 કિમી સુધી કારના બોનેટ પર લટકી રહ્યા. આરોપીએ કારને લસુડિયા પોલીસ સ્ટેશનની બહાર પણ લોક કરી રાખી હતી. કારમાંથી ઉતરતો ન હતો. ટ્રાફિક ઈન્સ્પેક્ટર સંતોષ દૂધીના આવ્યા બાદ તે કારમાંથી બહાર આવ્યો હતો. આરોપી સામે કેસ નોંધવામાં આવ્યો છે.