CBIની કડક કાર્યવાહી:વિઝા માટે ચીની નાગરિકો પાસેથી 50 લાખની લાંચ લેવાના મામલે કાર્તિ ચિંદબરમની નજીકની વ્યક્તિ રમનની ધરપકડ

સેન્ટ્રલ બ્યુરો ઓફ ઇન્વેસ્ટિગેશન (CBI)એ કોંગ્રેસ નેતા પી. ચિદમ્બરમના પુત્ર કાર્તિ ચિદમ્બરમના નજીકના સાથી એમ ભાસ્કર રમનની ધરપકડ કરી છે. વિઝા ભ્રષ્ટાચારના કેસમાં આ ધરપકડ કરવામાં આવી છે. સૂત્રોનું માનીએ તો CBIની ટીમે મોડી રાત્રે પૂછપરછ બાદ રમનની ધરપકડ કરી છે. આ પહેલા મંગળવારે CBIએ કાર્તિ ચિદમ્બરમ સાથે જોડાયેલા 10 સ્થળો પર દરોડા પાડ્યા હતા. CBIના જણાવ્યા અનુસાર આ મામલો 50 લાખની લાંચ લઈને 263 ચીની નાગરિકોના વિઝા મેળવવાનો છે.

CBIએ કોંગ્રેસના નેતા અને લોકસભા સાંસદ કાર્તિ ચિદમ્બરમ વિરુદ્ધ લાંચ લઈને ચીનના નાગરિકોને ભારતીય વિઝા અપાવવા બદલ નવો કેસ નોંધ્યો છે. કેસ નોંધ્યા બાદ CBIએ મંગળવારે સવારે કાર્તિના ચેન્નઈ અને દિલ્હી નિવાસ સહિત દેશભરમાં 10 સ્થળો પર દરોડા પાડ્યા હતા. CBI અનુસાર, જ્યારે તેમના પિતા પી ચિદમ્બરમ કેન્દ્રીય ગૃહ મંત્રી હતા ત્યારે કાર્તિએ 50 લાખ રૂપિયાની લાંચ લઈને 263 ચીની નાગરિકોને વિઝા આપ્યા હતા.

શું છે સમગ્ર મામલો
પંજાબના મનસામાં એક ખાનગી કંપની 1980 મેગાવોટનો થર્મલ પાવર પ્લાન્ટ લગાવી રહી હતી. તેની જવાબદારી ચીનની એક કંપનીને આપવામાં આવી હતી. આરોપ છે કે આ પ્રોજેક્ટમાં વિલંબ થઈ રહ્યો છે. કામ ઝડપથી થાય તે માટે ચીની પ્રોફેશનલ્સને મનસામાં લાવવામાં આવ્યા હતા. તેમના માટે વિઝાની વ્યવસ્થા ચેન્નઈના એક વ્યક્તિએ તેના કેટલાક સાથીદારોની મદદથી કરી હતી. તેમણે નિયમોની અવગણના કરી. કુલ 263 પ્રોજેક્ટ વિઝા આપવામાં આવ્યા હતા.

ડુપ્લીકેટ બિલ મારફતે પેમેન્ટ કરવામાં આવ્યું
એટલું જ નહીં, આ ખાનગી કંપનીએ ગૃહ મંત્રાલયને પત્ર લખીને આ તમામ વિઝા ધારકોને ફરીથી વિઝા આપવા વિનંતી કરી હતી . તેની મંજુરી પણ એક મહિનામાં મળી ગઈ હતી. આરોપ છે કે ચેન્નઈના એક વ્યક્તિએ તેના સહયોગીઓની મદદથી 50 લાખ રૂપિયાની લાંચ માંગી હતી. આ લાંચ માણસાની ખાનગી કંપની દ્વારા મુંબઈની એક કંપનીના નકલી બિલ દ્વારા ચેન્નઈ મોકલવામાં આવી હતી.

ખબર નથી કેટલી વાર... હવે તે રેકોર્ડ બની ગયો હશે: કાર્તિ
CBIના દરોડા પછી કાર્તિ ચિદમ્બરમે ટ્વીટ કર્યું હતું, ખબર નહીં કેટલી વાર, હું ગણતરી કરવાનું ભૂલી ગયો. 'રેકોર્ડ' તો બન્યો જ હશે! થોડા સમય પછી કાર્તિએ બીજી ટ્વિટ કરી. તેમણે કહ્યું હતું કે મારી ઓફિસમાંથી 'રેકોર્ડ' વિશેની માહિતી હમણાં જ મળી છે. 2015માં બે વાર, 2017માં એક વાર, 2018માં બે વાર અને આજે. કુલ 6 વખત! આ પછી કોંગ્રેસના વરિષ્ઠ નેતા પી ચિદમ્બરમે ટ્વીટ કર્યું, “CBIની ટીમે ચેન્નઈ અને દિલ્હીમાં મારા આવાસ પર દરોડા પાડ્યા છે. ટીમે મને એક FIR બતાવી જેમાં મને આરોપી બનાવવામાં આવ્યો નથી.

CBIની ટીમને કશું મળ્યું નહીં
કોંગ્રેસના નેતા પી ચિદમ્બરમે ટ્વીટ કર્યું CBIની ટીમને અમારા ઘરેથી કંઈ મળ્યું નથી, ન તો આ લોકો કંઈ જપ્ત કરી શક્યા . પરંતુ આ બધું હોવા છતાં CBIના દરોડાનો સમય રસપ્રદ હતો. જો કે, કોંગ્રેસના નેતાઓ કયા સમયની વાત કરી રહ્યા છે તેનો ટ્વીટમાં ઉલ્લેખ કરવામાં આવ્યો નથી.