IRCTCનો ઈસ્કોન મંદિર સાથે કરાર:હવે ટ્રેનમાં સાત્વિક ગોવિંદા રેસ્ટોરન્ટનું ભોજન મળશે

ટ્રેનમાં મુસાફરી કરતા અને શાકાહારી ભોજન જમતા મુસાફરો માટે આઈઆરસીટીસીએ તમારા માટે ખાસ વ્યવસ્થા કરી છે. તેના માટે તેણે ઈસ્કોન મંદિર સાથે કરાર કર્યો છે. આ કરાર હેઠળ મુસાફરી દરમિયાન તમને ઈસ્કોન મંદિરની ગોવિંદા રેસ્ટોરન્ટનું સાત્વિક ભોજન મળશે. પ્રથમ તબક્કે હજરત નિઝામુદ્દીન રેલવે સ્ટેશનથી આ સુવિધા શરૂ કરાશે.

જોકે ટૂંક સમયમાં તે અન્ય સ્ટેશનોએ પણ શરૂ થશે. ખરેખર અનેક પેસેન્જરને ટ્રેનમાં લાંબી મુસાફરી વખતે શુદ્ધ શાકાહારી ભોજન ન મળવાથી મુશ્કેલી પડે છે. ખાસ કરીને એવા પેસેન્જર જે ડુંગળી અને લસણવાળું ભોજન નથી જમતા. આવા પેસેન્જર પેન્ટ્રી કારથી મળતા કે પછી ઈ-કેટરિંગના માધ્યમથી મળતા ભોજનને લઈને આશંકામાં રહે છે. આ કારણે જ તે પેન્ટ્રીનું ભોજન જમવાથી પરહેજ કરે છે.