ખેડૂત આંદોલનનો 82મો દિવસ:કોંગ્રેસ નેતાએ પક્ષની ફજેતી કરતું વિવાદાસ્પદ નિવેદન આપ્યું- ખેડૂત આંદોલન આપણે ચલાવવાનું છે, ખેડૂતોને પૈસા કે શરાબ આપી મદદ કરીએ

ખેડૂત આંદોલનનું સમર્થન કરી રહેલા કોંગ્રેસ નેતા રાહુલ અને પ્રિયંકા ગાંધી મોદી સરકાર પર સતત હુમલા કરી રહ્યા છે. દરમિયાન કોંગ્રેસના એક નેતાના નિવેદને પાર્ટીની ફજેતી કરી છે. હરિયાણાના નેતા વિદ્યા રાણીએ કહ્યું કે ખેડૂત આંદોલન આપણા નેતાઓએ ચલાવવાનું છે. ખેડૂતોને તમામ પ્રકારે મદદ કરો. જે પૈસા આપી શકે છે તે પૈસા આપે. કેટલાક લોકો શરાબ પણ આપી શકે છે. વિદ્યા રાણીએ આ નિવેદન રવિવારે આપ્યું હતું. બાદમાં આ વીડિયો વાઈરલ થયો છે.

વિદ્યા રાણી હરિયાણાના જીંદમાં કોંગ્રેસ નેતાઓ સાથે વાતચીત કરી રહ્યા હતા. આ સમયે તેમણે કહ્યું કે ખેડૂત આંદોલન તો ખતમ થઈ ગયું હતું, પણ 26 જાન્યુઆરી બાદ ફરી તે ફરીથી મજબૂત થઈને ઉભરી આવ્યું છે. હવે આપણે લોકોએ આ આંદોલનને આગળ લઈ જવાનું છે. આ સંજોગોમાં આંદોલન કરી રહેલા ખેડૂતોને તમામ પ્રકારની મદદ કરવી જોઈએ. જે શાકભાજી આપી શકે તે શાકભાજી આપે, જે ઘી આપી શકે તે ઘી આપે. પૈસાથી પણ તેમને મદદ કરવી જોઈએ.

વિદ્યા રાણી જીંદ જિલ્લાના ગામ દનોદાની રહેવાસી છે. તે કોંગ્રેસની ટિકિટ પર વર્ષ 2014 અને 2019માં નરવાનાથી વિધાનસભા ચૂંટણી લડી ચુકી છે. બન્ને વખત તેની હાર થઈ હતી. કેન્દ્રીય મંત્રી હરદીપ પુરીએ આ નિવેદનની ટીકા કરી છે. તેમણે કહ્યું કે કોંગ્રેસ આ લેવલ સુધી ઉતરી આવી છે. તે દર્શાવે છે કે ખેડૂતોનું આંદોલન કોંગ્રેસ માટે શું મહત્વ ધરાવે છે.

કિસાન પંચાયતમાં પ્રિયંકા ગાંધી સામેલ થયા

કોંગ્રેસ 27 જીલ્લામાં મહાપંચાયત કરશે
આ મહાપંચાયત 'જય જવાન-જય કિસાન'અભિયાન હેઠળ યોજાઈ રહી છે. કોંગ્રેસે પ્રદેશના 27 જીલ્લામાં કૃષિ કાયદાનો વિરોધ કરવાના અભિયાન હેઠળ મહાપંચાયત કરવાનો નિર્ણય કર્યો છે. તેની શરૂઆત સહારનપુરથી થઈ હતી.