રાહત:22 મેથી મેલ, એક્સપ્રેસ અને શતાબ્દી ટ્રેન શરૂ થવાના સંકેત

રેલવેએ સ્પેશિયલ ટ્રેનોની સાથોસાથ ટૂંક સમયમાં મેલ, એક્સપ્રેસ અને શતાબ્દી જેવી ટ્રેનો દોડાવવાના પણ સંકેત આપ્યા છે. રેલવે બોર્ડ દ્વારા બુધવારે જારી પરિપત્રથી આવો અંદાજ બાંધવામાં આવી રહ્યો છે. તેમાં 22 મે અને ત્યાર પછીની ટ્રેનો માટે વેઇટિંગ ટિકિટ આપવા આદેશ કરાયો છે. આ બુકિંગ 15 મેથી કરાવી શકાશે. આદેશમાં વેઇટિંગ લિસ્ટની લિમિટ નક્કી કરાઇ છે, જે મુજબ થર્ડ એસીમાં 100, સેકન્ડ એસીમાં 50, સ્લીપરમાં 200, ચેર કારમાં 100 અને ફર્સ્ટ એસી તથા એક્ઝિક્યુટિવ ક્લાસમાં 20-20 ટિકિટ વેઇટિંગ લિસ્ટની રખાશે.
નાના શહેરો માટે પણ ટ્રેન સેવા શરૂ થઇ શકે
આ આદેશ સંકેત આપે છે કે રેલવે ભવિષ્યમાં હાલની એસી ટ્રેનો સિવાયની ટ્રેનો પણ શરૂ કરવાની તૈયારીમાં છે. મોટા શહેરો માટે દોડાવાતી રાજધાની ટ્રેનો ઉપરાંત નાના શહેરો માટે પણ ટ્રેન સેવા શરૂ થઇ શકે છે.