ભાસ્કર ઓપિનિયનરાજસ્થાન:ગેહલોતની જીતનો સવાલ જ નથી, શક્ય છે કે પાઇલટ પોતે ચરણજિત સિંહ ચુન્ની બનવાનું જોખમ લેવા માગતા ન હોય

રાજસ્થાનના મુદ્દાઓ.... હવે મુદ્દાઓ પર શું કહેવું, વિવાદો આ દિવસોમાં ચર્ચામાં છે. સાંભળવામાં આવે છે કે હાલમાં ગેહલોત-પાઇલટ વિવાદમાં ગેહલોત ભારે પડ્યા છે. કારણ એ છે કે ગેહલોત છાવણીના ત્રણ નેતા, જેમના પર અનુશાસનહીનતાની તલવાર લટકતી હતી, તેમને માફ કરી દેવામાં આવ્યા છે. એ ખરેખર સાચું છે કે રાજકારણમાં કંઈ પણ શક્ય છે, પરંતુ શાંતિ ધારીવાલ સહિત ત્રણ નેતાની માફી એ કોઈ છાવણીની જીત કે હાર ન કહી શકાય.

એ પણ શક્ય છે કે સચિન પાઇલટે પોતે જ હથિયાર હેઠા મૂક્યા હોય, કારણ કે વિધાનસભાની ચૂંટણીને માત્ર આઠ મહિના જ બાકી છે ત્યારે પાઇલટ શા માટે મુખ્યમંત્રી બનીને ચરણજિત સિંહ ચુન્ની બનવાનું જોખમ લેવા માગે છે? જોકે ગેહલોત જૂથના ત્રણેય નેતા સામે કાર્યવાહીની માગ ખુલ્લેઆમ ખુદ પાઇલટ દ્વારા જ રાખવામાં આવી હતી, પરંતુ એવું લાગે છે કે કોંગ્રેસના કેટલાક વરિષ્ઠ નેતાઓએ પાઇલટને સમજાવ્યું છે કે જ્યારે ભવિષ્ય યુવાનોનું છે, ત્યારે એ ખરા અર્થમાં તમારું છે. તો પછી બિનજરૂરી વાતમાં આઠ મહિના શા માટે વેડફવા?

ગેહલોતને સત્તા ભોગવવા દો, એક વર્ષ પછી નહીં, તો છ વર્ષ પછી, નેતૃત્વ તો આખરે તમારે સંભાળવું પડશે, તો થવા દો જે થાય છે. ત્યારે આ વખતે માત્ર પાઇલટને જ સંમતિ આપવા બદલ ઈનામ મળશે. એવું લાગે છે કે સચિન આ સમજી ગયા હશે. આ જ કારણ છે કે રાજસ્થાનમાં રાહુલની ભારત જોડો યાત્રા ઘણા દિવસો પછી પણ કોઈ વિવાદનું કારણ બની નથી.

કર્નલ કિરોડી સિંહ બૈંસલાના પુત્રએ રાહુલને રાજસ્થાનમાં પ્રવેશ ન દેવાની ચીમકી પણ શાંત પડી ગઈ છે. ગુર્જરોએ આજ સુધી કોઈ આંદોલન શરૂ કર્યું નથી. શક્ય છે કે પાઇલટે પોતે આ આંદોલનકારી ગુર્જરોને સમજાવીને શાંત કર્યા હોય! આ જ કારણ છે કે પાર્ટી હાઈકમાન્ડ સચિન પાઇલટ પ્રત્યે સોફ્ટ કોર્નર રાખી રહી છે. ત્રણેય નેતાને માફી આપીને આ નિર્ણય ભલે અત્યારે ગેહલોતની તરફેણમાં દેખાતો હોય, પરંતુ રાજકીય દૃષ્ટિકોણ કહે છે કે આ નિર્ણયથી સચિન પાઇલટને ફાયદો થશે.

જોકે ગેહલોત જૂથ ખુશ છે અને ભારત જોડો યાત્રામાં ઉત્સાહપૂર્વક ભાગ લઈ રહ્યું છે. આ દરમિયાન અજય માકનનો કોઈ ઉલ્લેખ નથી. એક બાજુ, તેમને રાજસ્થાનના પ્રભારી પદ પરથી હટી જવું પડ્યું. બીજી તરફ, તેઓ જેમની સામે કાર્યવાહી કરવા માટે અડગ હતા તે ત્રણેય નેતાને પણ માફી મળી ગઈ. રાજકારણ તો આવું જ છે. માકન રાજસ્થાનના મુદ્દાને પ્રતિષ્ઠાનો મુદ્દો બનાવવા માગતા ન હતા.