વિશ્વની સૌથી લાંબી રિવર ક્રૂઝ યાત્રા શરૂ:PM મોદીએ વિદેશી પ્રવાસીઓને ભારત આવવા અપીલ કરી, વ્યક્તિદીઠ ખર્ચ 19 લાખ

24 દિવસ પહેલા

વડાપ્રધાન નરેન્દ્ર મોદીએ વારાણસીને બે ભેટ આપી છે. પહેલી ભેટ ગંગા વિલાસ ક્રૂઝ અને બીજી 5 સ્ટાર ટેન્ટસિટી. વડાપ્રધાને વર્ચ્યુઅલી ઉદઘાટન કર્યું છે. ગંગા વિલાસ ક્રૂઝ દુનિયાની સૌથી લાંબી રિવર ક્રૂઝ યાત્રા પર નીકળશે. આ દરમિયાન એ 3200 કિલોમીટરની સફર કરશે. એ વારાણસીથી આસામના ડિબ્રુગઢ સુધી જશે.

કાર્યક્રમનાં લાઈવ અપડેટ્સ

  • PMએ કહ્યું, "હું આ ક્રૂઝ પર સવાર વિદેશી પ્રવાસી સાથીઓને કહીશ કે ભારત પાસે બધું જ છે. ભારતને શબ્દોમાં વ્યાખ્યાયિત કરી શકાતું નથી. ભારતને અનુભવી શકાય છે. આ ક્રૂઝ પ્રવાસ નવા અનુભવો લાવવા જઈ રહ્યો છે. "ક્રૂઝમાં સવાર પ્રવાસીઓને ભારતનાં ધર્મ, કલા, સંસ્કૃતિ, પર્યાવરણ, નદીઓ અને સમૃદ્ધ ભોજનથી પરિચિત થવાની તક મળશે."
  • "આ ક્રૂઝ જ્યાંથી પસાર થશે ત્યાં વિકાસની નવી લાઇન બનાવશે. શહેરો વચ્ચે લાંબી રિવર ક્રૂઝની યાત્રા ઉપરાંત અમે નાના ક્રૂઝને પણ પ્રોત્સાહન આપીશું. આ માટે દેશમાં તમામ પ્રકારની સુવિધાઓ વિકસાવવામાં આવી રહી છે. માતા ગંગાની ગોદમાં નવી ટેન્ટસિટી કાશી આવતા પ્રવાસીઓ અને શ્રદ્ધાળુઓને એક નવો અનુભવ આપશે.
  • "નદીના જળમાર્ગો હવે ભારતની નવી તાકાત બનશે. ગંગા વિલાસ ક્રૂઝની શરૂઆત કોઈ સામાન્ય વાત નથી. 3200 કિલોમીટરથી વધુની આ યાત્રા ભારતમાં આંતરદેશીય જળમાર્ગોના વિકાસનું ઉદાહરણ છે. 2014 પહેલાં ત્યાં કોઈ જળમાર્ગો નહોતા. દેશમાં એનો બહુ ઓછો ઉપયોગ હતો. ભારતમાં જળમાર્ગોનો પ્રાચીન ઇતિહાસ હતો. 2014 પછી અમે દેશની મુખ્ય નદીઓમાં જળમાર્ગોના વિકાસ માટે કાયદો બનાવ્યો. 2014માં 5 રાષ્ટ્રીય જળમાર્ગો હતા. દેશમાં આજે 24 રાજ્યમાં 111 જળમાર્ગો વિકસાવવાનું કામ ચાલી રહ્યું છે.
  • "ગંગા આપણા માટે માત્ર એક જળપ્રવાહ નથી. એ ભારતની તપસ્યાની સાક્ષી છે. આનાથી વધુ કમનસીબી શું હોઈ શકે કે ગંગા કિનારે વિકાસને બદલે એ પછાત થઈ ગઈ. આ જ કારણ છે કે લાખો લોકોએ ગંગા કિનારેથી સ્થળાંતર કર્યું, તેથી જ અમે નમામિ ગંગે શરૂ કર્યું.
  • "બીજી તરફ, અર્થ ગંગા દ્વારા, ગંગાના કિનારે રાજ્યોમાં આર્થિક પ્રવૃત્તિઓ વધારવાનું કામ શરૂ કરવામાં આવ્યું છે. ગંગા વિલાસ રિવર ક્રૂઝ ઉત્તરપ્રદેશ, બિહાર, ઝારખંડ, પશ્ચિમ બંગાળ આસામ અને બાંગ્લાદેશની યાત્રા દ્વારા એક નવું પરિમાણ બનાવશે."

પહેલા ક્રૂઝની તસવીર જુઓ...

યાત્રાનો સમય-51 દિવસ
અંતર-3200 કિલોમીટર
ભાડું-19 લાખ રૂપિયા, સ્યૂટનું ભાડું 38 લાખ.

ક્રૂઝનો રૂટ-ગંગા-ભાગીરથી-હુગલી રિવર સિસ્ટમ(નેશનલ વોટર વે 1), કોલકાતાથી ધુબરી(ઈન્ડો બાંગ્લા પ્રોટોકોલ રૂટ) અને બ્રહ્મપુત્ર(નેશનવ વોટર વે 2). રસ્તામાં 27 નદીઓ પડે છે. ગંગા, ભાગીરથી, હુગલી, વિદ્યાવતી, માતલા, સુંદરવન રિવર સિસ્ટમ-5, મેઘના, પદ્મા, જમુના અને બ્રહ્મપુત્ર જેવી 27 નદી વચ્ચે આવે છે.

આ ક્રૂઝ 5 રાજ્ય અને બાંગ્લાદેશમાંથી પસાર થશે: યુપી, બિહાર, ઝારખંડ, પશ્ચિમ બંગાળ, આસામ અને બાંગ્લાદેશ. વારાણસી, પટના, કોલકાતા, ઢાકા, ગુવાહાટી, ડિબ્રુગઢ સહિત 50 મુખ્ય પ્રવાસન સ્થળોનો સમાવેશ થાય છે.

સુવિધાઓ: 18 સ્યૂટ્સ, રેસ્ટોરાં, બાર, સ્પા, સનડેક, જિમ. 40 સીટ ધરાવતી રેસ્ટોરાંમાં કોન્ટિનેન્ટલ અને ભારતીય ફૂડ સાથે બુફે કાઉન્ટર છે. આઉટડોર બેઠકમાં સ્ટીમર ચેર અને કોફી ટેબલ સાથેનો બાર છે. બાથટબ, કન્વર્ટિબલ બેડ, ફ્રેન્ચ બાલ્કની, LED ટીવી, સેફ, સ્મોક એલાર્મ, લાઇફ વેસ્ટ અને સ્પ્રિંકલર સાથેના બાથરૂમ પણ છે.

ખાસિયત-62.5 મીટર લાંબી અને 12.8 મીટર પહોળી, 40 હજાર લિટરની ઇંધણની ટાંકી અને 60 હજાર લિટરની પાણીની ટાંકી. અપ સ્ટ્રીમમાં ક્રૂઝની ઝડપ 10થી 12 કિમી પ્રતિ કલાક છે. ડાઉન સ્ટ્રીમમાં ક્રૂઝની ઝડપ 15થી 20 કિમી પ્રતિ કલાક છે.

5 સ્ટાર સુવિધાઓ જેવી ટેન્ટસિટી, જાણો શું છે એમાં ખાસ
કાશીમાં ગંગાના કિનારે 30 હેક્ટરમાં 265 ટેન્ટ લગાવીને પ્રવાસીઓ માટે લક્ઝરી ટેન્ટસિટી બનાવવામાં આવી છે, જેમાં રહીને તમે 5 સ્ટાર હોટલની લક્ઝરી સુવિધાઓનો આનંદ માણી શકો છો. ઊગતા સૂર્યનો નજારો અને ગંગા આરતી, રમતો અને ઘોડેસવારી તમને સુકૂન આપશે.

PMના ઉદઘાટન બાદ 15 જાન્યુઆરીથી અહીં પ્રવાસીઓ આવવાનું શરૂ થશે. ટેન્ટસિટીનો આ પ્રવાસન પ્રોજેક્ટ પાંચ વર્ષ માટે છે. દર વર્ષે પૂર દરમિયાન ટેન્ટસિટી થોડા મહિનાઓ માટે દૂર કરવામાં આવશે. ગંગાના જળસ્તર સામાન્ય થતાં જ ટેન્ટસિટી ફરી વસાવવામાં આવશે.

ફિટનેસ માટે ખાસ વ્યવસ્થા
યોગ, સ્પા, લાઇબ્રેરી અને આર્ટ ગેલરીની સુવિધાઓનો આનંદ લેવા ઉપરાંત અહીં ઊંટ અને ઘોડેસવારી પણ કરી શકાશે. અહીં 32 ફૂટ ઊંચો ગંગા ટાવર બનાવવામાં આવશે, જ્યાંથી પ્રવાસીઓ ઘાટનો અદભુત નજારો જોઈ શકશે. ગંગામાં પ્રવાસીઓના સુરક્ષિત સ્નાન માટે અહીં ફ્લોટિંગ બાથ જેટી બનાવવામાં આવી છે.

હેન્ડિક્રાફ્ટ પ્રોડક્ટનું થશે માર્કેટ
ઉત્તરપ્રદેશના GI અને ODOP ઉત્પાદનો સહિત અન્ય હેન્ડિક્રાફ્ટ પ્રોડક્ટનું નવું માર્કેટ જોવા મળશે. ટેન્ટસિટીમાં એક મોટો ડાઈનિંગ હોલ અને કોન્ફરન્સ માટે પણ સુવિધાયુક્ત હોલ છે, જ્યાં 800 પ્રતિનિધિ એકસાથે જઈ શકે છે.

અન્ય સમાચારો પણ છે...