ગોવા બાર કેસમાં કોંગ્રેસના નેતાઓને નોટિસ:દિલ્હી હાઈકોર્ટે કહ્યું- સ્મૃતિ ઈરાનીની પુત્રી પર કરવામાં આવેલી તમામ સોશિયલ મીડિયા પોસ્ટ ડિલીટ કરો

દિલ્હી હાઈકોર્ટે ગોવામાં ગેરકાયદે બાર કેસમાં શુક્રવારે કોંગ્રેસના નેતાઓને સમન્સ પાઠવ્યા છે. ગેરકાયદે બારમાં પુત્રી જોઈશનું નામ સામે આવ્યા બાદ કેન્દ્રીય મંત્રી સ્મૃતિ ઈરાનીએ કોર્ટમાં કેસ દાખલ કર્યો હતો. દિલ્હી હાઈકોર્ટે જયરામ રમેશ, પવન ખેરા અને નેટ્ટા ડિસોઝાને સમન્સ પાઠવ્યું છે અને જોઈશ સામેના આરોપો લગાડતા તમામ ટ્વીટ ડિલીટ કરવા કહ્યું છે.

આરોપોથી સ્મૃતિ ઈરાનીની છબી ખરડાઈ છે: HC
જસ્ટિસ મિની પુષ્કર્ણની સિંગલ જજની બેન્ચે કહ્યું કે ત્રણેય નેતાઓને 18 ઓગસ્ટ સુધીમાં જવાબ દાખલ કરવાનો નિર્દેશ આપવામાં આવ્યો છે. કોર્ટે કહ્યું કે સ્મૃતિની પુત્રી જોઈશ પર તથ્યોની ચકાસણી કર્યા વિના જ આરોપો લગાવવામાં આવ્યા છે. તેનાથી સ્મૃતિ ઈરાનીની છબી ખરડાઈ છે: કોર્ટે એમ પણ કહ્યું કે ઈરાનીને ક્યારેય કોઈ લાઇસન્સ આપવામાં આવ્યું નથી. 24 જુલાઈના રોજ સ્મૃતિએ કોંગ્રેસ અને તેની ત્રણેય વિરુદ્ધ 2 કરોડ રૂપિયાનો માનહાનિનો કેસ પણ દાખલ કર્યો હતો.

જયરામ રમેશે કહ્યું- અમે કોર્ટ સમક્ષ સત્ય લાવીશું
સમન્સના સમાચાર બાદ કોંગ્રેસ નેતા જયરામ રમેશે ટ્વીટ કર્યું. તેમણે લખ્યું, "દિલ્હી હાઈકોર્ટે અમને સ્મૃતિ ઈરાની દ્વારા દાખલ કરવામાં આવેલા મામલામાં જવાબ આપવા માટે નોટિસ જારી કરી છે. અમે કોર્ટ સમક્ષ તથ્યો મૂકવા માટે આતુર છીએ. અમે ઈરાનીની દલીલને ફગાવી દઈશું અને તેને ફરીથી પડકારીશું."

મામલો ત્યારે શરૂ થયો જ્યારે કોંગ્રેસે આરોપ લગાવ્યા કે સ્મૃતિ ઈરાનીની પુત્રી જોઈશ ઈરાની ગોવામાં સિલી સોલ્સ કેફે એન્ડ બાર નામથી જે રેસ્ટોરન્ટ ચલાવે છે તેનું લાઇસન્સ ગેરકાયદેસર છે. માલિકોએ દારૂના લાઇસન્સને જેના નામે રિન્યુ કરાવ્યું હતું, તેનું 13 મહિના પહેલા જ અવસાન થયું હતું. આ અંગે વકીલ એરેઝ રોડ્રિગ્ઝે ફરિયાદ કરી હતી.